ច្បាប់ដែលឲ្យអតីតថ្នាក់ដឹកនាំបក្សប្រឆាំង ចូលធ្វើនយោបាយវិញ ត្រូវបានអនុម័តហើយ

ជាតិ

នយោបាយជាតិ

ច្បាប់ដែលឲ្យអតីតថ្នាក់ដឹកនាំបក្សប្រឆាំង ចូលធ្វើនយោបាយវិញ ត្រូវបានអនុម័តហើយ

13, Dec 2018 , 8:55 am

រូបភាព

ដោយ: សារព័ត៌មានថ្មីៗ

ការធ្វើវិសោធនកម្មលើមាត្រា៤៥ថ្មី (ស្ទួន) ស្តីពីគណបក្សនយោបាយ ត្រូវបានអនុម័តដោយរដ្ឋសភាហើយ ក្នុងកិច្ចប្រជុំពេញអង្គ នាព្រឹកថ្ងៃទី១៣ ខែធ្នូ ឆ្នាំ២០១៨នេះ។ ក្រោយធ្វើវិសោធនកម្ម មាត្រា៤៥ថ្មី (ស្ទួន) បានក្លាយជាមាត្រាថ្មី៤៥ថ្មី (ស្ទួន១) ហើយនឹងត្រូវចូលធរមាននិងដាក់ឲ្យអនុវត្ត នៅពេលណាព្រះមហាក្សត្រ ចេញព្រះរាជក្រម។

មាត្រា៤៥ថ្មី (ស្ទួន) ចែងថា តុលាការកំពូល អាចហាមថ្នាក់ដឹកនាំនៃគណបក្សណាមួយ ដែលត្រូវបានរំលាយចោល មិនឲ្យធ្វើនយោបាយរយៈពេល៥ឆ្នាំ។ ប៉ុន្តែ មាត្រា៤៥ថ្មី (ស្ទួន១) ដែលទើបនឹងត្រូវបានធ្វើវិសោធនកម្ម បានផ្តល់សិទ្ធិឲ្យនាយករដ្ឋមន្ត្រី អាចថ្វាយសំណើទៅព្រះមហាក្សត្រ ដើម្បីសុំឲ្យព្រះអង្គប្រទាននីតិសម្បទា និងអនុញ្ញាតឲ្យអ្នកជាប់បម្រាម ចូលធ្វើនយោបាយវិញ។

នាយករដ្ឋមន្ត្រី ទើបនឹងប្រកាសថា ក្រោយមាត្រានេះ ត្រូវបានធ្វើវិសោធនកម្មរួច អតីតថ្នាក់ដឹកនាំគណបក្សប្រឆាំង អាចដាក់សំណើជាលក្ខណៈបុគ្គល ឬជាក្រុមដែលមានគ្នាបួន-ប្រាំនាក់ ដើម្បីសុំចូលធ្វើនយោបាយវិញ។ បន្ទាប់មក នាយករដ្ឋមន្ត្រី នឹងពិចារណាថាឲ្យឬមិនឲ្យ។

បច្ចុប្បន្ន កម្ពុជា មានមនុស្ស១១៨នាក់ (ស្លាប់ម្នាក់) ជាអតីតថ្នាក់ដឹកនាំគណបក្សប្រឆាំង ដែលត្រូវបានតុលាការកំពូល ដកសិទ្ធិនយោបាយ៕