លោក ទៀ សីហា ចូលកាន់តំណែងផ្លូវការជាអភិបាលខេត្តសៀមរាប

ជាតិ

នយោបាយជាតិ

លោក ទៀ សីហា ចូលកាន់តំណែងផ្លូវការជាអភិបាលខេត្តសៀមរាប

13, Dec 2018 , 9:14 am

រូបភាព

លោក ទៀ សីហា ទទួលលិខិតតែងតាំងពីសម្តេច ស ខេង

ដោយ: រួបរួម

លោក ទៀ សីហា បានចូលកាន់តំណែងផ្លូវការជាអភិបាលខេត្តសៀមរាប ក្នុងពិធីផ្លូវការមួយដែលរៀបចំនៅសាលាខេត្តសៀមរាប ក្រោមអធិបតីភាពសម្តេចឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ នាព្រឹកថ្ងៃទី១៣ ខែធ្នូ នេះ។

អត្ថបទទាក់ទង

លោក ឃឹម ប៊ុនសុង ក្លាយជារដ្ឋលេខាធិការក្រសួងការពារជាតិ និងពាក់ផ្កាយ៤

កូនសម្ដេច ទៀ បាញ់ ត្រូវបានតែងតាំងជាអភិបាលខេត្តសៀមរាប ជំនួសលោក ឃឹម ប៊ុនសុង

លោក ទៀ សីហា ដែលជាកូនប្រុសទីពីររបស់សម្តេចឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ ត្រូវជំនួសតំណែងលោក ឃឹម ប៊ុនសុង ដែលត្រូវបានដំឡើងតំណែងជារដ្ឋលេខាធិការក្រសួងការពារជាតិ និងជានាយឧត្តមសេនីយ៍នៃកងយោធពលខេមរភូមិន្ទ។

លោក ទៀ សីហា កើតនៅថ្ងៃទី៣១ ខែសីហា ឆ្នាំ១៩៨០។ លោកបានទៅសិក្សានៅប្រទេសបារាំងតាំងពីកម្រិតមធ្យមសិក្សា ហើយរហូតដល់ឆ្នាំ២០០១ លោកទទួលបានបរិញ្ញាបត្រផ្នែកពាណិជ្ជកម្មពីមហាវិទ្យាល័យ Passy Saint-Honore នៅក្រុងប៉ារីស។ បន្ថែមពីលើនេះ លោកក៏បានចូលសិក្សាពេញមួយឆ្នាំនៅសាលាយោធា Ecole Speciale Militaire de Saint-Cyr នៃបណ្ឌិត្យសភាយោធាបារាំងផងដែរ។

លោកបានវិលមកកម្ពុជាវិញនៅឆ្នាំ២០០១ ពោលគឺក្រោយពីបញ្ចប់ការសិក្សាភ្លាមៗនៅបារាំង។ លោកបានចាប់ផ្តើមបម្រើការងារជាមន្ត្រីកងរាជអាវុធហត្ថរាជធានីភ្នំពេញ និងបន្តការសិក្សានៅរាជបណ្ឌិត្យសភា រដ្ឋបាលជាន់ខ្ពស់នៅឆ្នាំ២០០៧-២០០៨។

ក្រោយមក លោកត្រូវបានតែងតាំងជាប្រធានសហភាពសហព័ន្ធយុវជនកម្ពុជាប្រចាំខេត្តសៀមរាប។ នៅឆ្នាំ២០១៤ លោកត្រូវបានដំឡើងឋានន្តរស័ក្តិថ្នាក់ឧត្តមសេនីយ៍ទោ នៃកងយោធពលខេមរភូមិន្ទ។

លោកក៏ជាសមាជិកគណៈកម្មាធិការកណ្តាលរបស់គណបក្សប្រជាជនកម្ពុជា និងជាសមាជិកអចិន្ត្រៃយ៍នៃសហភាពសហព័ន្ធយុវជនកម្ពុជាផងដែរ។ លោកបានកាន់តំណែងអភិបាលរងខេត្តសៀមរាបពីខែសីហា ឆ្នាំ២០១៧ មុននឹងឡើងកាន់តំណែងផ្លូវការជាអភិបាលខេត្ត បន្តពីលោក ឃឹម ប៊ុនសុង៕