ជាតិ
សម្ដេច ស ខេង ៖ លោកស្រី រ៉ូណាល់ ស្មីត ក៏ទទួលស្គាល់ថា មតិមន្ត្រីសង្គមស៊ីវិលខ្លះ មិនត្រូវទាំងអស់ទេ
× ភ្នំពេញ៖ អ្នករាយការណ៍ពិសេសទទួលបន្ទុកផ្នែកសិទ្ធិមនុស្ស របស់អង្គការសហប្រជាជាតិ លោកស្រី រ៉ូណាល់ ស្មីត ទទួលស្គាល់ថា មតិមន្ត្រីអង្គការសង្គមស៊ីវិល ដែលផ្ដល់យោបល់ឲ្យខ្លួនកន្លងមក គឺមិនត្រូវទាំងអស់នោះទេ។ នេះជាអ្វីដែលលោកស្រី ស្មីត ធ្លាប់បាននិយាយជាមួយសម្ដេច ស ខេង រដ្ឋមន្ត្រីក្រសួងមហាផ្ទៃ។
ក្នុងពិធីផ្ទេរតំណែងអភិបាលខេត្តសៀមរាបថ្មី នៅព្រឹកថ្ងៃទី១៣ ធ្នូនេះ សម្ដេច ស ខេង បានលើកយកបញ្ហាភាពជាដៃគូសហប្រតិបត្តិការ ប្រាប់ទៅមន្ត្រីពាក់ព័ន្ធទាំងអស់ ឲ្យយល់ពីអ្វីដែលហៅថា ការអនុវត្តការងារបែបសម្របសម្រួលល្អ ហើយមិនឲ្យផលប៉ះពាល់គ្នាទៅវិញទៅមក។ និយាយចំណុចនេះ សម្ដេច ស ខេង ក៏បានលើបញ្ហាជាក់ស្ដែង ដែលកើតឡើងកាលពីថ្ងៃទី១០ ធ្នូ នៃការប្រារព្វទិវាសិទ្ធិមនុស្សអន្តរជាតិកន្លងមក ដោយកាលណោះអាជ្ញាធរ បានមិនអនុញ្ញាតឲ្យមន្ត្រីសង្គមស៊ីវិល សហជីព និងពលរដ្ឋដង្ហែរក្បួនឡើយ ប៉ុន្តែឲ្យមានការជួបជុំគ្នានៅទីលានប្រជាធិបតេយ្យ ដែលមានកងកម្លាំងសមត្ថកិច្ចឃ្លាំមើល។
ត្រង់ចំណុចខាងលើនេះ សម្ដេច ស ខេង ចាត់ទុកវាជាការអនុវត្តភាពជាដៃគូ ជាមួយភាគីពាក់ព័ន្ធហើយ ប៉ុន្តែពួកគេនៅតែមានមតិរិះគន់ថា អាជ្ញាធរមានការរិតត្បិតសិទ្ធិ និងគំរាមកំហែងពួកគេទៅវិញ តាមរយៈការដាក់ពង្រាយអាជ្ញាធរនៅតាមផ្លូវសាធារណៈ និងកន្លែងជួបជុំ។ សម្រាប់សម្ដេច ស ខេង ការរិះគន់របស់មន្ត្រីសង្គមស៊ីវិលបែបនេះ គឺជារឿងមិនត្រឹមត្រូវឡើយ។
និយាយពីរឿងនេះ រដ្ឋមន្ត្រីក្រសួងមហាផ្ទៃ ក៏បានរំឭកដល់ឈ្មោះ លោកស្រី រ៉ូណាល់ ស្មីត អ្នករាយការណ៍ពិសេសទទួលបន្ទុកផ្នែកសិទ្ធិមនុស្សរបស់អង្គការសហប្រជាជាតិ ដែលបាននិយាយប្រាប់សម្ដេចថា លោកស្រី ទទួលស្គាល់ថាមតិរបស់មន្ត្រីអង្គការសង្គមស៊ីវិល ដែលផ្ដល់យោបល់ឲ្យខ្លួនកន្លងមក គឺមិនត្រូវទាំងអស់នោះទេ។
សូមស្ដាប់ប្រសាសន៍រដ្ឋមន្ត្រីក្រសួងមហាផ្ទៃ៖
គួរបញ្ជាក់ថា លោកស្រី រ៉ូណាល់ ស្មីត បានមកទស្សនកិច្ចនៅកម្ពុជា កាលពីខែវិច្ឆិកាកន្លងមក ដោយលោកស្រី បានចំណាយពេលជាច្រើនថ្ងៃ ក្នុងការដើរជួបជាមួយមន្ត្រីជាន់ខ្ពស់រដ្ឋាភិបាល អ្នកនយោបាយ និងមន្ត្រីអង្គការស៊ីវិល ដើម្បីចង់ដឹងរឿងរ៉ាវ និងព័ត៌មានជុំវិញស្ថានការណ៍ប្រទេសកម្ពុជា។ បញ្ហាដែលលោកស្រី ស្មីត លើកយកទៅពិភាក្សាជាមួយភាគីពាក់ព័ន្ធទាំងនោះ ភាគច្រើនផ្ដោតទៅលើបញ្ហាសិទ្ធិមនុស្ស និងការអភិវឌ្ឍប្រកបដោយចីរភាពនៅកម្ពុជា៕
Tag:
ស ខេង
រ៉ូណាល់ ស្មីត
© រក្សាសិទ្ធិដោយ thmeythmey.com