ម្ចាស់មេដាយមាសអាស៊ីនៅមីយ៉ាន់ម៉ា កីឡាការិនី ហេង ស៊ីវឡាង បានអះអាងថា កីឡាប្រណាំងកង់ជួយឲ្យមនុស្សមានសុខភាពល្អ និងកាយសម្បទារឹងមាំ ពិសេសជួយឲ្យស្ត្រីមានស្មារតីរឹងមាំ និងរហ័សរហួនក្នុងការប្រឈមនិងដោះស្រាយបញ្ហា។ អតីតកីឡាការិនីប្រណាំងកង់ជម្រើសជាតិរូបនេះ សង្កេតឃើញថា បច្ចុប្បន្នវិស័យកីឡាប្រណាំងកង់នៅកម្ពុជាមានការរីកចម្រើនគួរឲ្យកត់សម្គាល់ តែហាក់ខ្សត់ខ្សោយកីឡាការិនី។
សម្រាប់កីឡាការិនី ហេង ស៊ីវឡាង អតីតកីឡាការិនីប្រណាំងកង់ជម្រើសជាតិ ការជិះកង់មិនត្រឹមតែជួយឲ្យមានសុខភាពល្អ និងបង្កើតមិត្តភាព និងទំនាក់ទំនងល្អក្នុងសង្គមប៉ុណ្ណោះទេ ថែមទាំងជួយឲ្យមានស្មារតីរឹងមាំ និងរហ័សរហួនទៀតផង។ លើលពីនេះ វាជួយអភិវឌ្ឍន៍ និងពង្រឹងស្មារតីស្ត្រីឲ្យរឹងមាំមិនចាញ់បុរសឡើយ ពេលប្រឈមនឹងឧបសគ្គនានា។ មួយវិញទៀត វាជួយឲ្យមានចិត្តក្លាហាន មិនរារែកក្នុងការចិត្ត ដើម្បីធ្វើអ្វីមួយក្នុងជីវភាពរស់នៅប្រចាំថ្ងៃ និងការប្រកបរបរផ្សេងៗ។
ក្នុងបទសម្ភាសជាមួយអ្នកសារព័ត៌មានកាលពេលថ្មីៗកីឡការិនី ហេង ស៊ីវឡាង បានរៀបរាប់ដូច្នេះថា៖«ក្រៅពីការប្រកួតប្រជែង កីឡាជិះកង់នាំមកនូវសុខភាព មិត្តភាព និងជួយឲ្យគាត់រហ័សរហួន ពិសេសមានស្មារតីរឹងមាំក្នុងការដោះស្រាយបញ្ហាពេលប្រឈមជាមួយឧបសគ្គម្តងៗ។ បើគាត់មានការចូលរួម និងប្រកួតប្រជែង គឺក្នុងការរស់នៅរបស់គាត់ក៏ដូចគ្នា គឺគាត់មិនមានការរារែកចិត្តក្នុងការធ្វើអ្វីមួយ និងជួយជំរុញទឹកចិត្តគាត់ឲ្យកាន់តែក្លាហានថែមទៀត»។
ទោះបីកីឡាប្រណាំងកង់កំពុងមានប្រជាប្រិយ និងពេញនិយមសម្រាប់កីឡាករកីឡាការិនី និងមហាជនជិះកម្សាន្តដើម្បីសុខភាពក៏ដោយ តែគេសង្កេតឃើញហាក់ខ្សត់ខ្សោយកីឡាការិនីចូលរួមនៅឡើយ។ បើតាមអតីតកីឡាការិនីជម្រើសជាតិខាងលើ បញ្ហានេះអាចបណ្តាលមកពីកត្តាជីវភាពកីឡាករ ស្ថានភាពគ្រួសារ និងកត្តាសង្គមជាដើម។
«តាមពិតទៅភាគច្រើនកីឡាការិនីគាត់ចង់ហាត់ តែដោយសារស្ថានភាពគ្រួសារគាត់ ជួនកាលមកពីឪពុកម្តាយ ការសិក្សា និងគ្មានការជំរុញនិងលើកទឹកចិត្តពីក្រុមគ្រួសារជាដើម។ ដូច្នេះខ្ញុំចង់ឲ្យឪពុកម្តាយ ក៏ដូចជាបងប្អូន និងបណ្តាក្លិបផ្សេងៗជួយគាំទ្រ និងបណ្តុះបណ្តាលកីឡាការិនីឲ្យបានច្រើន»។ នេះជាការបញ្ជាក់បន្ថែមរបស់កីឡាការិនី ហេង ស៊ីវឡាង ក្រោយការប្រកួតកីឡាប្រណាំងកង់ភ្នំ Cambodia MTB Series ជុំចុងក្រោយនៅគីរីរម្យកាលពីថ្ងៃទី៨ ខែធ្នូ ឆ្នាំ២០១៨។
ទន្ទឹមនឹងនេះ ម្ចាស់មេដាយមាសអាស៊ីប្រចាំព្រឹត្តិការណ៍ 2018 Asia Road & Para Cycling Championships នៅមីយ៉ាន់ម៉ា កាលពីអំឡុងខែកុម្ភៈ ឆ្នាំ២០១៨ រូបនេះ សង្កេតឃើញថា ចំនួនកីឡាការិនីចូលរួមលេងកីឡាប្រណាំងកង់មានកើនឡើងបើធៀបនឹងជំនាន់អ្នកស្រី។ ប៉ុន្តែ បើមើលពីសមត្ថភាពកីឡាការិនីទាំងនោះ ហាក់នៅមានកម្រិតនៅឡើយ។ អ្នកស្រី ស៊ីវឡាង សង្កេតឃើញថា បច្ចុប្បន្នមានតែកីឡាការិនីពីររូបប៉ុណ្ណោះ ដែលមានសមត្ថភាពអាចប្រកួតប្រជែងជាមួយកីឡាការិនីក្នុងតំបន់អាស៊ានបាន។
សម្រាប់ការប្រកួតកង់ភ្នំ Cambodia MTB Series ជុំចុងក្រោយនៅគីរីរម្យ បានទាក់ទាញកីឡាករកីឡាការិនីជាតិនិងអន្តរជាតិជិត៣០០នាក់ចូលរួម។ ចំនួននេះមានការកើនឡើងស្ទើរទ្វេដងបើធៀបនឹងជុំទី៤ ដែលរៀបចំនៅភ្នំប្រសិទ្ធិ៍ ដែលមានប្រមាណជា១៥០នាក់។ ការកើនឡើងចំនួនអ្នកចូលរួមជាជោគជ័យមួយ អ្វីដែលកាន់តែពិសេសភាគច្រើននៃអ្នកចូលរួម គឺជាយុវជន ដែលស្របតាមទិសដៅរបស់សហព័ន្ធ ក្នុងដំណើរឆ្ពោះទៅកាន់ស៊ីហ្គេមលើកទី៣២ ឆ្នាំ២០២៣។
ដោយមើលឃើញពីសារៈសំខាន់នៃព្រឹត្តិការណ៍នេះ លោកឧកញ៉ា វង្ស ខាន់ពៅ អគ្គលេខាធិការសហព័ន្ធកីឡាទោចក្រយានបានបង្ហាញពីគម្រោងពង្រីកព្រឹត្តិការណ៍នេះឲ្យកាន់តែធំនៅឆ្នាំក្រោយ ដោយគ្រោងរៀបចំនៅតាមបណ្តាខេត្តផ្សេងៗជាច្រើនទៀត។ អគ្គលេខាធិការរូបនេះបន្ថែមថា គម្រោងនេះអាចដំណើរការទៅបាន លុះត្រាមានការឧបត្ថម្ភ និងគាំទ្រពីដៃគូសហការ ពិសេសក្រុមហ៊ុនខ្មែរប៊ែវើរិជីស ដែលជាអ្នកឧបត្ថម្ភនៅឆ្នាំនេះ។ តែបើពុំមានការឧបត្ថម្ភបន្ថែមទេនោះ ព្រឹត្តិការណ៍នេះនឹងប្រព្រឹត្តទៅមួយឆ្នាំ៥ជុំដដែល។
ឆ្លើយតបនឹងការលើកឡើងនេះ លោក Michael Sovann ដែលជាប្រធានផ្នែកកម្មវិធី នៃក្រុមហ៊ុនខ្មែរប៊ែវើរិជីសបានបញ្ជាក់ថា លោកនឹងពិនិត្យមើលពីលទ្ធភាពក្នុងការបំប៉ោងទំហំទឹកប្រាក់ឧបត្ថម្ភនៅឆ្នាំក្រោយ។ តែយ៉ាងណាអ្នកតំណាងរូបនេះបានបង្ហាញពីជំហរ ចង់ពង្រីកព្រឹត្តិការណ៍នេះឲ្យកាន់ឡើងៗពីមួយឆ្នាំទៅមួយឆ្នាំ ដើម្បីជាការលើកទឹកចិត្តដល់កីឡាករ និងសហព័ន្ធ។
«យើងនឹងមើលពីលទ្ធភាពក្នុងការបំប៉ោងកញ្ចប់ថវិកាឧបត្ថម្ភ ព្រោះយើងចង់ធ្វើឲ្យកម្មវិធីនេះកាន់តែធំទៅៗ ពី១ឆ្នាំទៅ១ឆ្នាំ ដើម្បីលើកទឹកចិត្តឲ្យសហព័ន្ធ ក៏ដូចជាអត្តពលិក អាចពង្រឹងសមត្ថភាពបានកាន់តែប្រសើរថែមទៀត សម្រាប់ត្រៀមការប្រកួតនានានៅលើឆាកអន្តរជាតិ។ យើងនឹងបន្តឧបត្ថម្ភដល់សហព័ន្ធ ក្នុងការរៀបចំកម្មវិធីនេះនៅឆ្នាំក្រោយទៀត»។ នេះជាការលើកឡើងរបស់លោក Michael sovann។
ក្រោយឆ្លងកាត់ការប្រកួត៥ជុំ ដោយជុំទី១ធ្វើនៅព្រែកលៀប, ទី២នៅខេត្តកែប, ទី៣ភ្នំជាលខេត្តកំពង់ស្ពឺ, ទី៤នៅភ្នំប្រសិទ្ធិ៍ និងជុំទី៥នៅគីរីរម្យ កីឡាករជម្រើសជាតិ យឿន ភីយុទ្ធ គ្រងជើងឯកលើវិញ្ញាសាក្រុមជំនាញខ្លាំងបំផុត(A1)ប្រចាំឆ្នាំ២០១៨ និងលេខ២បានទៅកីឡាករ គីម ចាន់ធូ និងលេខ៣ សាំង សីហា ខណៈពួកគេទាំង៣មកពីក្លិបកង់ហោះដូចគ្នា។
ចំណែកកីឡាករជើងចាស់ Pierre Yves Catry បានក្លាយជាម្ចាស់ជើងឯកលើវិញ្ញាសាក្រុមជំនាញខ្លាំង(A2)អាយុ៣០ឆ្នាំឡើង រីឯលេខ២បានទៅកីឡាករ ប៊ុត ជឿន និងលេខ ៣ បានទៅកីឡាការិនី ហេង ស៊ីវឡាង។ សម្រាប់វិញ្ញាសាក្រុមជំនាញមធ្យមអាយុពី១៥-២៩ឆ្នាំ(B1)ម្ចាស់ជើងឯកបានទៅកីឡាករ រិន បូរិទ្ធ លេខ២ សាន ណាម៉ាវ និងលេខ៣ វន សាវីន។ ចំណែកវិញ្ញាសាក្រុមជំនាញមធ្យមអាយុ៣០ឆ្នាំឡើង(B2) លេខ១បានទៅ រិន សុគន្ធ និងលេខ២បានទៅកីឡាករ វង្ស ឈីវឈូវ៕