ជាតិ
២៥ខេត្ត/រាជធានី
សម្តេច ហ៊ុន សែន៖ គម្រោងធំៗរបស់ចិនអាចប្រែក្លាយកោះកុងជាតំបន់អភិវឌ្ឍជាបន្តបន្ទាប់
× ខេត្តកោះកុងជាតំបន់ដែលមានសក្តានុពលខ្លាំងទាំងវិស័យទេសចរណ៍ និងការអភិវឌ្ឍទៅជាតំបន់ឧស្សាហកម្ម។ នេះបើតាមការសរសេររបស់សម្តេចនាយករដ្ឋមន្ត្រី ហ៊ុន សែន នៅលើទំព័រហ្វេសប៊ុករបស់ខ្លួននាថ្ងៃសុក្រ ទី១៤ ខែធ្នូ ឆ្នាំ២០១៨។
សម្តេច ហ៊ុន សែន បានលើកឡើងពីកត្តាភូមិសាស្ត្រអំណោយផលរបស់ខេត្តកោះកុងដែលមានព្រំប្រទល់ជាប់ខេត្តព្រះសីហនុ ជាពិសេសមានព្រំប្រទល់ជាប់ប្រទេសថៃ ដែលជាច្រកដ៏សំខាន់មួយក្នុងការនាំទំនិញចេញចូលផងដែរ ហើយអ្វីដែលពិសេសនោះ វិនិយោគិនចិនបានចំណាយលុយរាប់លានដុល្លារ ដើម្បីវិនិយោគគម្រោងអភិវឌ្ឍធំៗនៅខេត្តនេះផងដែរ។
«គម្រោងធំៗរបស់ចិនដែលអាចប្រែក្លាយខេត្ត កោះកុងជាតំបន់អភិវឌ្ឍជាបន្តបន្ទាប់ ជាក់ស្តែងដូចជាគម្រោងទីក្រុងវិស្សមកាលទេសចរណ៍តារាសាគរនេះជាដើម ដែលបានប្រមូលផ្តុំចំរុះទៅដោយ ប្រព័ន្ធហេដ្ឋារចនាសម្ពន្ធ សណ្ឋាគារផ្កាយ៥ ខុនដូរ បឹងកាឡូ អគារការិយាល័យ មជ្ឈមណ្ឌលពាណិជ្ជកម្ម ទីលានវាយកូនគោល និងសួនកំសាន្តខ្នាតអន្តរជាតិ ជាដើម»។ នេះជាការគូសបញ្ជាក់របស់ប្រមុខរដ្ឋាភិបាល។
សម្តេចបានបន្ថែមថា គម្រោងក្រុងវិស្សមកាលទេសចរណ៍នៅខេត្តកោះកុងដ៏ធំបែបនេះ នឹងកាន់តែទាក់ទាញភ្ញៀវទេសចរណ៍កាន់តែច្រើនថែមទៀតមកកាន់កម្ពុជា ហើយនឹងមានការសាងសង់សណ្ឋាគារកាន់តែច្រើនបន្ថែមទៀតដើម្បីបំពេញតម្រូវការភ្ញៀវទេសចរនាពេលខាងមុខ។
បើតាមសម្តេច ហ៊ុន សែន ខេត្តកោះកុងកំពុងប្រែក្លាយខ្លួនជាតំបន់អភិវឌ្ឍមួយកាន់តែមានសក្តានុពល តាមរយៈគម្រោងអភិវឌ្ឍរបស់ចិន។ ជាពិសេសរាជរដ្ឋាភិបាលកំពុងតភ្ជាប់ប្រព័ន្ធហេដ្ឋារចនាសម្ព័ន្ធបន្ថែមទៀត ធ្វើយ៉ាងណាឱ្យតំបន់នេះ មានភាពងាយស្រួលក្នុងការដឹកជញ្ជូនទំនិញ៕
© រក្សាសិទ្ធិដោយ thmeythmey.com