ស្ត្រីអៀរឡង់ដែលរៀបការជាមួយខ្មោចចោរសមុទ្រអាយុ៣០០ឆ្នាំ ប្រកាសលែងលះ

ប្លែកៗ

អន្តរជាតិ

ស្ត្រីអៀរឡង់ដែលរៀបការជាមួយខ្មោចចោរសមុទ្រអាយុ៣០០ឆ្នាំ ប្រកាសលែងលះ

16, Dec 2018 , 9:19 pm

រូបភាព

ដោយ: ធីតា

ស្ត្រីឈ្មោះ Amanda Teague អាយុ៤៦ឆ្នាំ ដែលរស់នៅក្រុង Drogheda ប្រទេសអៀរឡង់ បានរៀបការជាមួយរូបថតខ្មោចចោរសមុទ្រ កាលពីដើមឆ្នាំកន្លងមក។ ប៉ុន្តែមិនដល់មួយឆ្នាំស្រួលបួលផង គាត់បានប្រកាសពីការលែងលះគ្នា។

Amanda បានសម្រេចចិត្តរៀបការជាមួយបុរសដែលជា «គូព្រេង» ខ្លួននៅលើនាវាមួយក្នុងសមុទ្រនៃប្រទេសអៀរឡង់។ បុរសនោះមិនមែនជាមនុស្សពិតប្រាកដនោះឡើយ ប៉ុន្តែជារូបថតចោរសមុទ្រជនជាតិហៃទីម្នាក់ឈ្មោះ Jack ដែលឯកសារនានាបានអះអាង ត្រូវបានគេប្រហារជីវិតតាំងពីអំឡុងឆ្នាំ១៧០០ ។

ក្នុងបទសម្ភាសមួយជាមួយ Ireland AM ស្ត្រីឈ្មោះ Amanda បានអះអាងថា ពិធីអាពាហ៍ពិពាហ៍ជាមួយនឹង «ដួងវិញ្ញាណ» ត្រូវអនុញ្ញាត និងមានប្រជាប្រិយខ្លាំងណាស់នៅក្នុងប្រទេសហៃទី។ គាត់បានបញ្ជាក់ថា វិញ្ញាណមនុស្សអាចប៉ះគ្នា និងទាក់ទងគ្នាដូចជាមនុស្សធម្មតា។

មិនដល់គម្រប់មួយឆ្នាំផង Amanda បានប្រកាសថា៖ «អូខេ ខ្ញុំគិតថា វាដល់ពេលវេលាសម្រាប់ខ្ញុំដើម្បីប្រកាសពីការបញ្ចប់ចំណងអាពាហ៍ពិពាហ៍ […] ខ្ញុំនឹងពន្យល់នៅពេលសមស្របណាមួយ ប៉ុន្តែសម្រាប់ពេលនេះ ខ្ញុំចង់នៅស្ងៀមស្ងាត់ ដោយសារនៅមានទំនាក់ទំនងជាមួយខាងព្រលឹងវិញ្ញាណនៅឡើយ»។

តាមពិតទៅ Amanda ផ្ទាល់គឺជាអ្នកគាំទ្រផ្កាប់មុខម្នាក់តួអង្គក្នុងរឿងភាពយន្តចោរសមុទ្រតំបន់ការ៉ាអ៊ីប (Pirates of the Caribbean) ពោលគឺតួអង្គ Jack Sparrow ដែលសំដែងដោយ Johnny Depp។ ក្រោយមក គាត់បានដក់ចិត្តស្រឡាញ់តែម្តង៕