សេដ្ឋកិច្ចអន្តរជាតិ
អន្តរជាតិ
អ្នកជំនាញ៖ វៀតណាមប្រៀបដូចជាដែកឆក់ទាញទុនវិនិយោគបរទេសខ្លាំងជាងគេនៅអាស៊ាន
× អ្នកជំនាញសេដ្ឋកិច្ច និងពាណិជ្ជកម្មក្នុងតំបន់ បានវាយតម្លៃខ្ពស់ទៅលើស្ថិរភាពនយោបាយ និងកំណើនសេដ្ឋកិច្ចរបស់វៀតណាម ដែលធ្វើឲ្យរដ្ឋអាស៊ានមួយនេះ អាចទាក់ទាញការវិនិយោគបរទេសដោយផ្ទាល់បានកាន់តែច្រើន។ តែនេះ មិនមែនជារឿងចៃដន្យឡើយ ដែលវៀតណាម ទាក់ទាញវិនិយោគបរទេសដោយផ្ទាល់នោះ ពោលគឺ វាផ្តើមចេញពីកំណែទម្រង់ និងសូចនាករដ៏សក្តានុពលផ្សេងៗ។
«សមត្ថភាពរបស់វៀតណាមក្នុងការទាក់ទាញវិនិយោគបរទេសដោយផ្ទាល់បាន ក៏ដោយសារប្រទេសមួយនេះ មានកំណែទម្រង់សេដ្ឋកិច្ចពិតប្រាកដ, ការកើនឡើងនៃចំនួនប្រជាជនវ័យក្មេង, តម្លៃឈ្នួលកម្លាំងពលកម្មសមរម្យ, ភាពកាន់តែល្អប្រសើរនៃបរិយាកាសសធ្វើធុរកិច្ច និងស្ថិរភាពនយោបាយ»។ នេះគឺជាលើកឡើងរបស់អ្នកជំនាញហ្វីលីពីន Berly D Alvarez ដែលជាប្រធានក្រុមហ៊ុនវិនិយោគ Kaunlad Lending Investors Corporation ។
តាមការចុះផ្សាយរបស់សារព័ត៌មានថៃ The Nation តាមរយៈកិច្ចប្រជុំសេដ្ឋកិច្ចអាស៊ីប្រចាំឆ្នាំ២០១៨ ក្នុងខេត្ត Binh Duong អ្នកជំនាញបានរម្លឹកពីការលើកឡើងរបស់វៀតណាមពេលធ្វើម្ចាស់ផ្ទះនៃកិច្ចប្រជុំកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកនៅឆ្នាំ២០១៧ ក្នុងការប្តេជ្ញាចិត្តធ្វើសមាហរណកម្មសេដ្ឋកិច្ចក្នុងតំបន់ និងការធានាឲ្យបានពីភាពល្អប្រសើរនៃបរិយាកាសធ្វើធុរកិច្ចរបស់ខ្លួន។ ជាលទ្ធផល លោក សង្កេតឃើញថា វៀតណាម ពិតជាបានទាក់ទាញវិនិយោគ ពិសេសលើហេដ្ឋារចនាសម្ព័ន្ធ ដែលរាប់បញ្ចូលទាំងគម្រោងថាមពលកើតឡើងវិញ ការសាងសង់ផ្លូវ និងផ្លូវរថភ្លើងជាដើម។
ជាមួយគ្នានេះ ក្នុងវេទិកាដដែល លោក Don Lam នាយកប្រតិបត្តិរបស់ក្រុមហ៊ុនក្នុងតំបន់មួយទៀត បានមើលឃើញពីភាពរឹងមាំនៃកំណើនសេដ្ឋកិច្ចវៀតណាម ដែលអាចរក្សាបានក្នុងកម្រិត ៦.៦ ភាគរយ ខណៈអតិផរណា ក៏ស្ថិតនៅក្នុងស្ថានភាពដែលអាចគ្រប់គ្រងបានផងដែរនោះ។ ចំណុចនេះហើយ ដែលធ្វើនាយកប្រតិបត្តិរូបនេះ អាចព្យាករថា វិនិយោគដោយផ្ទាល់ នឹងហូរចូលវៀតណាមកាន់ច្រើននាពេលខាងមុខនេះ។
សម្រាប់លោក Pham Hong Hai នាយកប្រតិបត្តិក្រុមហ៊ុនវៀតណាម HSBC Vietnam បានមើលពីការប្តូរទិសនាំចូលរបស់អាមេរិកពីចិន មកកាន់ទីផ្សារអាស៊ាន ដូចជាវៀតណាមជាដើមនេះ ថា ជាសក្តានុពលពាណិជកម្មមួយ។ នោះ ក៏ព្រោះតែ លោក យល់ឃើញថា ទំនោរនេះ ធ្វើឲ្យវៀតណាម កាន់តែក្លាយជាទិសដៅសំខាន់ ហើយរដ្ឋាភិបាលវៀតណាម ក៏ត្រូវព្យាយាមធ្វើឲ្យមានភាពល្អប្រសើរគ្រប់វិស័យដើម្បីអាចឆក់យកឱកាសនេះបាន។
ថ្មីៗនេះ រដ្ឋាភិបាលវៀតណាម ក៏បានពិនិត្យឡើងវិញនូវច្បាប់ប្រឆាំងអំពើពុករលួយដើម្បីគ្រប់គ្រងសកម្មភាពមិនប្រក្រតីទាំងក្នុងសេវាសាធារណៈ និងសេវាឯកជនក្នុងការគោលដៅធានាឲ្យបានភាពល្អប្រសើរនៃបរិយាសវិនិយោគក្នុងប្រទេស ជាពិសេសការធ្វើធុរកិច្ចដោយស្មើភាពគ្នា ខណៈដែលរដ្ឋអាស៊ានមួយនេះ ក៏កំពុងតែត្រៀមទទួលយកពន្ធអនុគ្រោះពីសហភាពអឺរ៉ុប ដែលជាទីផ្សារដ៏បំផុតមួយរបស់ពិភពលោក៕
© រក្សាសិទ្ធិដោយ thmeythmey.com