សុខភាព
អន្តរជាតិ
សិង្ហបុរីត្រៀមអនុវត្តវិធានការបន្ថយការផឹកភេសជ្ជៈជាតិស្ករខ្ពស់ ទប់ស្កាត់កំណើនអ្នកកើតទឹកនោមផ្អែម
× ក្រសួងសុខាភិបាលរបស់សិង្ហបុរីកំពុងណែនាំសាធារណៈជនសិង្ហបុរីឲ្យបានដឹងពីវិធានការថ្មី ដែលមានគោលដៅកាត់បន្ថយការផឹកភេសជ្ជៈដែលសម្បូរជាតិស្ករ ដើម្បីធានាសុខភាពប្រជាជន និងទប់ស្កាត់ការកើនឡើងនៃអ្នកជំងឺទឹកនោមផ្អែម។
វិធានការថ្មីរបស់សិង្ហបុរីនេះដែលនឹងត្រូវអនុវត្តនោះ ផ្តោតលើការបញ្ឈប់ការលក់ និងបន្ថែមតម្លៃពន្ធទៅលើផលិតផលមានជាតិស្ករខ្ពស់ក្នុងទីផ្សារ។ នេះបើតាមការផ្សាយទូរទស្សន៍ Channel News Asia នៅដើមខែធ្នូនេះ។
វិធានការនេះត្រូវបានដាក់ចេញ ក្រោយពីពេលក្រសួងសុខាភិបាលរកឃើញថា សិង្ហបុរីបានក្លាយជាប្រទេសមួយដែលសម្បូរអ្នកជំងឺទឹកនោមផ្អែមក្នុងចំណោមបណ្តាប្រទេសអភិរឌ្ឍ។ អ្នកនាំពាក្យក្រសួង បានលើកឡើងថា ប្រសិនបើវិធានការនេះមិនត្រូវបានអនុវត្តទាន់ពេលវេលាទេនោះ គេប៉ាន់ស្មានថា ប្រជាជនសិង្ហបុរីប្រហែលមួយលាននាក់នឹងមានជំងឺទឹកនោមផ្អែមនៅពេលអនាគតក្នុងឆ្នាំ ២០៥០ខាងមុខ។
ប្រជាជនសិង្ហបុរី ជាមធ្យមបរិភោគជាតិស្ករប្រមាណជា៦០ក្រាមក្នុងមួយថ្ងៃៗ ដែលភាគច្រើនមានប្រភពមកពីភេសជ្ជៈកំប៉ុងដែលដាក់លក់តាមទីផ្សារ។ ការកាត់បន្ថយបញ្ហាជំងឺទឹកនោមផ្អែមនេះក៏ត្រូវបានភ្នាក់ងារពាក់ព័ន្ធមួយចំនួន លើកឡើងនិងពន្យល់ដល់មហាជនតាមទីសាធារណៈនិងនៅក្នុងសាលារៀន។
ក្រសួងក៏បានហាមអាជីវករលក់ភេសជ្ជៈដែលមានបរិមាណស្ករខ្ពស់នៅតាមសាលារៀនដែរ ប៉ុន្តែអតិថិជនអាចជាវនៅកន្លែងផ្សេងបាន។ ក្រសួងក៏បានណែនាំឲ្យរោងចក្រផលិតភេសជ្ជៈផ្អែមៗមួយចំនួនកាត់បន្ថយប្រើប្រាស់បរិមាណស្ករក្នុងផលិតផលរបស់ខ្លួនតាមតែអាចធ្វើបានដែរ។ វិធានការមួយផ្សេងទៀតមានដូចជាការកាត់បន្ថយការផ្សាយពាណិជ្ជកម្មភេសជ្ជៈជាតិស្ករខ្ពស់ ជាពិសេសចំពោះកុមារាកុមារតូចៗ។
ការអនុវត្តវិធានការទាំងអស់នេះក៏ត្រូវពឹងផ្អែកយោបល់របស់ប្រជាពលរដ្ឋសិង្ហបុរីជាមុនសិនដែរ។ ពលរដ្ឋសិង្ហបុរីអាចបញ្ចេញគំនិតយោបល់ផ្ទាល់ ដើម្បីសម្រេចថា វិធានការនេះពិតជាមានអត្ថប្រយោជន៍ចំពោះសុខភាពពួកគាត់មែនឬក៏យ៉ាងណា។ ក្រសួងសុខាភិបាលនឹងស្ទង់មតិមហាជនដែរ ដើម្បីសម្រេចអនុវត្តវិធានការនេះ៕
© រក្សាសិទ្ធិដោយ thmeythmey.com