អនុប្រធានសភាបារាំង សន្យាជួយតស៊ូមតិរឿងអនុគ្រោះពន្ធដល់កម្ពុជា ក្នុងកិច្ចប្រជុំសភាអឺរ៉ុប

ជាតិ

នយោបាយជាតិ

អនុប្រធានសភាបារាំង សន្យាជួយតស៊ូមតិរឿងអនុគ្រោះពន្ធដល់កម្ពុជា ក្នុងកិច្ចប្រជុំសភាអឺរ៉ុប

19, Dec 2018 , 10:19 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ បារាំងត្រៀមខ្លួនរួចជាស្រេច ក្នុងការជួយតស៊ូមតិរឿងអនុគ្រោះពន្ធ(Everything But Arms) ដល់កម្ពុជា ក្នុងកិច្ចប្រជុំសភាអឺរ៉ុបខាងមុខនេះ។ ការសន្យានេះ ធ្វើឡើងនៅក្នុងជំនួបរវាងលោក Sylvain WASERMAN អនុប្រធានបារាំង និងសម្ដេច ហេង សំរិន ប្រធានរដ្ឋសភា កាលពីថ្ងៃទី១៧ ធ្នូ។ នេះបើតាមការចុះផ្សាយរបស់ទីភ្នាក់ងារព័ត៌មានជាតិAKP។

លោក Sylvain WASERMAN បាននិយាយថា សកម្មភាពដែលកម្ពុជាកំពុងធ្វើ រួមទាំងការបកស្រាយរបស់គណៈប្រតិភូកម្ពុជាកន្លងមក បានឮទៅដល់សភាបារាំងហើយ។ តាមរយៈការទទួលបានព័ត៌មានមួយចំនួននេះ សភាបារាំងនឹងត្រៀមក្រុមតាមគណៈកម្មការនានា ដើម្បីជួយផ្ដល់មតិនៅក្នុងកិច្ចប្រជុំសភាអឺរ៉ុប ទាក់ទងនឹងការព្រមានដកប្រព័ន្ធអនុគ្រោះពន្ធដល់កម្ពុជា។ បារាំងនឹងជំរុញឲ្យមានការពន្លឿនដោះស្រាយបញ្ហាអនុគ្រោះពន្ធដល់កម្ពុជា មុនពេលដែលប្រធានសភាអឺរ៉ុប នឹងត្រូវចប់អាណត្តិ នៅខែមិថុនា ឆ្នាំ២០១៩ ខាងមុខ។ នេះបើតាមលោក ឈាង វុន អ្នកនាំពាក្យរដ្ឋសភារបស់គណបក្សប្រជាជនកម្ពុជា ដែលបានស្រង់សម្តីរបស់លោក Sylvain ក្នុងជំនួបជាមួយប្រធានរដ្ឋសភា។

ទីភ្នាក់ងារសារព័ត៌មានជាតិAKP ដែលស្រង់សម្តីបន្តពីលោក ឈាង វុន បានសរសេរដូច្នេះថា៖«អនុប្រធានសភាបារាំងលើកឡើងថា បារាំងនឹងជួយកម្ពុជា ដើម្បីតស៊ូរឿងអនុគ្រោះពន្ធ(EBA) ព្រោះបារាំងយល់ឃើញថា កម្ពុជាមិនដូចការចោទប្រកាន់»។

អនុប្រធានរដ្ឋសភាបារាំង មកបំពេញទស្សនកិច្ចជាផ្លូវការនៅកម្ពុជា រយៈពេល៦ថ្ងៃ ចាប់ពីថ្ងៃទី១៥ ដល់ទី២០ ខែធ្នូ ឆ្នាំ២០១៨ ដើម្បីរឹតចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរ ជាពិសេសទំនាក់ទំនងស្ថាប័ននីតិប្បញ្ញត្តិកម្ពុជា-បារាំង។ ក្នុងដំណើរទស្សនកិច្ចនេះ លោក Sylvain បានជួបជាមួយប្រធានរដ្ឋសភា សម្ដេច ហេង សំរិន , លោកឧបនាយករដ្ឋមន្ត្រី ហោ ណាំហុង, លោក ឈាង វុន ប្រធានគណៈកម្មការកិច្ចការបរទេសសហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភាកម្ពុជា រួមទាំងអភិបាលខេត្តសៀមរាបផងដែរ។

លោក ឈាង វុន បានប្រាប់អនុប្រធានរដ្ឋសភាបារាំងថា កម្ពុជាមិនដែលទទួលយកការដាក់សម្ពាធពីខាងក្រៅទេ ហើយកម្ពុជា ក៏មិនយកអធិបតេយ្យភាព ឯករាជ្យជាតិទៅដូរនឹងជំនួយ ឬសម្ពាធដែរ។

អត្ថបទទាក់ទង

ឯកអគ្គរដ្ឋទូតអឺរ៉ុប ៖ នយោបាយកម្ពុជាកំពុងបោះជំហានវិជ្ជមាន ដែលជាផ្នែកសំខាន់នៃEBA

EuroCham៖«តើគណៈកម្មការអឺរ៉ុបចង់ឲ្យកម្ពុជាធ្វើអ្វី ឲ្យប្រាកដ?»

នីតិវិធីនៃការដក ឬ មិនដកការអនុគ្រោះពន្ធរបស់ EU មានរយៈពេល១២ខែ

សភាអឺរ៉ុប នឹងបើកកិច្ចប្រជុំទាក់ទងដំណោះស្រាយលើបញ្ហាប្រទេសនានា នៅពាក់កណ្ដាលខែមករា ឆ្នាំ២០១៩នេះ។ ទាក់ទងនឹងបញ្ហាប្រព័ន្ធអនុគ្រោះពន្ធដល់កម្ពុជានេះ សហភាពអឺរ៉ុប កំពុងបន្តដំណើរការនីតិវិធីខ្លួន រយៈពេល១ឆ្នាំ ក្នុងការប្រមូលព័ត៌មាន និងតាមដានត្រួតពិនិត្យលើបញ្ហាស្ថានការណ៍ប្រទេសកម្ពុជា មុននឹងឈានដល់ការសម្រេចចុងក្រោយថា បន្ត ឬដកប្រព័ន្ធអនុគ្រោះពន្ធពីកម្ពុជា ។

EBA (Everything But Arms) គឺសំដៅលើប្រព័ន្ធអនុគ្រោះពន្ធ លើទំនិញនិងផលិតផលសព្វបែបយ៉ាង ដូចជា សម្លៀកបំពាក់ និង អង្ករ ជាដើម ដែលកម្ពុជា នាំចូលទៅកាន់ទីផ្សារអឺរ៉ុប ដោយលើកលែងតែអាវុធប៉ុណ្ណោះ ដែលមិនរាប់បញ្ចូល។ កម្ពុជា ជាប្រទេសមួយ ដែលបានចុះកិច្ចព្រមព្រៀងជាមួយសហភាពអឺរ៉ុបស្តីពី EBA នេះ ហើយតែងតែទទួលបានការអនុគ្រោះពន្ធ។ កម្ពុជាបានចំណេញពីការអនុគ្រោះពន្ធនេះ ជាង៦០០លានដុល្លារក្នុងឆ្នាំ សម្រាប់ទំនិញនាំចូលទៅកាន់ទីផ្សារអឺរ៉ុបនេះ។