ជើងខ្លាំងលំដាប់ពិភពលោកល្បីៗចំនួន ៦គូ នឹងបង្ហាញខ្លួនឲ្យសង្វៀននៅទីក្រុងតូក្យូ ប្រទេសជប៉ុន នាថ្ងៃអាទិត្យ ទី ៣១ ខែមីនា ឆ្នាំ ២០១៩ ក្នុងព្រឹត្តិការណ៍ ONE: A NEW ERA ខណៈ ខ្សែក្រវាត់ ONE World Titles ចំនួន៣ កំពុងរង់ចាំម្ចាស់របស់ខ្លួន។
ជើងឯកពិភពលោក Eduard "Landslide" Folayang ពីហ្វីលីពីន ត្រូវការពារខ្សែការពារខ្សែក្រវាត់ ONE Lightweight World Title ក្នុងជំនួបតទល់ជាមួយជើងខ្លាំងនៃម្ចាស់ផ្ទះជប៉ុន Shinya “Tobikan Judan” Aoki។
ពួកគេធ្លាប់ប៉ះគ្នាកាលពីខែវិច្ឆិកា ឆ្នាំ ២០១៦ ព្រឹត្តិការណ៍ ONE: DEFENDING HONOR រួចមកហើយ ដោយកាលនោះ Folayang បានផ្តួលយកខ្សែក្រវាត់ពីជើងឯកជប៉ុនបានសម្រច។
គូសំខាន់មួយទៀត គឺអ្នកលេងក្បាច់គុនដ៏ខ្លាំងរបស់ចិន នាង Xiong Jing Nan ត្រូវការការពារខ្សែក្រវាត់ONE Women's Strawweight World Title របស់ខ្លួនពីការដណ្តើមរបស់កីឡាការិនីសិង្ហបុរី Angela Lee ដែលជាជើងឯកខ្សែក្រវាត់ONE Women's Atomweight World។
តាមពិតទៅ កីឡាការិនីលំដាប់ឆ្នើមពិភពលោកទាំងពីរ ត្រូវប៉ះគ្នាតាំងពីព្រឹត្តិការណ៍ ONE: HEART OF THE LION កាលពីខែវិច្ឆិកាមកម្ល៉េះ ប៉ុន្តែ Angela Lee មិនអាចចូលប្រកួតបាន ដោយសារមានរបួស។
ពេលនេះ កីឡាការិនីសិង្ហបុរី បានជាសះស្បើយ ហើយរាជនីក្បាច់គុនចម្រុះរូបនេះ ត្រៀមខ្លួន ដើម្បីគ្រងខ្សែក្រវាត់មួយទៀត។ ទោះបីជាយ៉ាងណាក៏ដោយ នាងត្រូវធ្វើយ៉ាងណាផ្តួល Xiong Jing Nan ឲ្យបានសិន ព្រោះថាអ្នកលេងក្បាច់គុនចិនរូបនេះមិនទាន់មានប្រវត្តិចាញ់គេឡើយនៅ ONE Championship ។
ជាមួយគ្នានេះ វជើងខ្លាំងខ្សែក្រវាត់ពីររបស់មីយ៉ាន់ម៉ា Aung La N Sang ក៏នឹងត្រូវការពារខ្សែក្រវាត់ខ្លួនដែរ ពីអធិរាជក្បាច់គុនរបស់ជប៉ុន Ken Hasegawa ក្នុងការប្រកួតប្រភេទទម្ងន់មធ្យម។
កីឡាករទាំងពីរ ធ្លាប់ប៉ះគ្នាម្តងហើយកាលពីខែមិថុនា ២០១៨ ដែលអាចនិយាយបានថាជាការប៉ះគ្នាដ៏កក្រើកមួយក្នុងប្រវត្តិសាស្ត្រ និងទទួលបានពានរង្វាន់បន្ទាប់មកថាជា ការប្រយុទ្ធដ៏អស្ចារ្យប្រចាំឆ្នាំ។ កាលនោះជើងខ្លាំងភូមា បានយកឈ្នះភាគីជប៉ុននៅទឹកចុងក្រោយ។
បន្ថែមពីលើនោះដែរ នឹងមានការប្រយុទ្ធគ្នារវាង Eddie Alvarez សមាជិកថ្មីរបស់ ONE ដែលធ្លាប់ជាអតីតជើងឯកនៅស្ថាប័ន UFC ដោយគេត្រូវប្រឈមមុខជាមួយ Demetrious Johnson តែម្តង។
Alvarez ជាកីឡាករតែម្នាក់គត់ដែលមានខ្សែក្រវាត់ទាំងនៅ UFC និងនៅ Bellator រីឯ Johnson មានប្រវត្តិការពារខ្សែក្រវាត់ខ្លួន១១ដងហើយនៅ UFC Flyweight Title។ កីឡាករទាំងពីរមានកាតាព្វកិច្ចក្នុងវគ្គជម្រុះទី៣នៃកម្មវិធី ONE Lightweight World Grand Prix ដូចគ្នាផងដែរ។
ប៉ុន្មានគូខាងលើធ្វើឲ្យសង្វៀនកក្រើកស្រាប់ហើយ តែអ្វីដែលធ្វើទស្សនិកជនរឹតតែព្រឺព្រួចទៀតនោះ គឺនឹងមានវត្តមាន Andy Souwer ជើងចាស់ខាងប្រដាល់សេរី និងជាកីឡាករលើកពាននៅ K-1 World Max Champion ត្រូវបានគេរៀបចំឲ្យតទល់ជាមួយវីរជនរបស់ថៃគឺ Yodsanklai IWE Fairtex ៕
អត្ថបទ៖ Matias Andres