ការនាំចូលរថយន្តរបស់វៀតណាម ធ្លាក់ចុះគួរឲ្យកត់សម្គាល់ក្នុងឆ្នាំនេះ

រថយន្ត

សេដ្ឋកិច្ច

អន្តរជាតិ

24, Dec 2018 , 8:39 pm

រូបភាព

ដោយ:

វៀតណាម បាននាំចូលរថយន្តប្រមាណ ៧២ ៦៥០គ្រឿងក្នុងឆ្នាំ២០១៨នេះ។ យោងតាមការឲ្យដឹងរបស់អគ្គនាយកដ្ឋានពន្ធគយវៀតណាមនៅថ្ងៃទី១៨ ខែធ្នូ តួរលេខថ្មីនេះគឺធ្លាក់ចុះជិត២០ភាគរយ បើធៀបទៅនឹងតួរលេខកាលពីឆ្នាំ២០១៧។

ទោះបីជាចំនួននៃការនាំចូលរថយន្តធ្លាក់ចុះក៏ដោយក្តី ប៉ុន្តែតម្លៃនៃការនាំចូលរថយន្តទាំងនេះ បានកើនឡើងដល់១,៦៤ពាន់លានដុល្លារ។ ហើយចំនួននេះដែរគឺកើនឡើងប្រមាណ ២១ភាគរយ បើធៀបទៅនឹងឆ្នាំ២០១៧។

ថៃ និងឥណ្ឌូណេស៊ី គឺជាអ្នកផ្គត់ផ្គង់រថយន្តធំបំផុតរបស់វៀតណាម។ តួយ៉ាង វៀតណាមបាននាំចូលរថយន្តពីថៃ ច្រើនជាង ៥២ ១៧០គ្រឿង ដែលគិតជាទឹកប្រាក់ប្រមាណ ១,០៤ពាន់លានដុល្លារ ដោយគិតចាប់ពីដើមឆ្នាំ២០១៨មក។ នេះបើតាមការចុះផ្សាយរបស់សារព័ត៌មាន Vietnam Express។

យោងតាមទិន្នន័យរបស់អគ្គនាយកដ្ឋានពន្ធគយវៀតណាម គិតចាប់ពីថ្ងៃទី០៧ ដល់ ថ្ងៃទី១៧ ខែធ្នូ ការនាំចូលរថយន្តរបស់វៀតណាមមានចំនួន២៨៣៣គ្រឿង។ យោងតាមតួរលេខនេះ ការនាំចូលរថយន្តបានថយចុះចំនួន៧០១គ្រឿង បើធៀបទៅនឹងសប្តាហ៍មុន។ ហើយបើគិតជាទឹកប្រាក់វិញគឺស្មើនឹង ៦៧លានដុល្លារ។

លោក Mike Dunne អ្នកជំនាញផ្នែកឧស្សាហកម្មដែលបានចំណាយពេលជាង៣០ឆ្នាំនៅអាស៊ី បានប្រាប់ទូរទស្សន៍អាមេរិក CNBC កាលពីថ្មីៗនេះថា វៀតណាមដែលមានប្រជាជនសរុបដល់ទៅជាង៩០លាននាក់ គឺធំជាងកូរ៉េខាងត្បូងទៅទៀត ប៉ុន្តែការប្រើប្រាស់រថយន្តមានត្រឹមតែ ៣០ម៉ឺនគ្រឿងប៉ុណ្ណោះក្នុងមួយឆ្នាំ។

ភាគច្រើនរថយន្តលក់នៅក្នុងប្រទេសវៀតណាម គឺសុទ្ធតែជាម៉ាកបរទេស។ កិច្ចព្រមព្រៀងពាណិជ្ជកម្មសេរីមួយចំនួនបានកាត់បន្ថយតម្លៃពន្ធគយ និងកំពុងបើកចំហទីផ្សាររបស់វៀតណាមឲ្យកាន់តែធំទូលាយថែមទៀត។ តួយ៉ាងពន្ធនាំចូលចំនួន៣០ភាគរយ ដែលកំណត់លើរថយន្តនាំចេញពីបណ្តាប្រទេសក្នុងតំបន់អាស៊ាន ត្រូវបានលុបចោលក្នុងឆ្នាំ២០១៨នេះ។

វៀតណាម មានជំនួញត្រឹមតែ៣៥៨ប៉ុណ្ណោះក្នុងឧស្សាហកម្មរថយន្ត។ ហើយចំនួននេះគឺទាបខ្លាំង បើធៀបទៅនឹងថៃ ដែលមានដល់ទៅ២៥០០ឯណោះ។ នេះយោងតាមក្រសួងពាណិជ្ជកម្មនិងឧស្សាហកម្មវៀតណាម៕