បទ «Celica អស់សាំង» កំពុងមានប្រជាប្រិយភាពយ៉ាងខ្លាំងនៅកម្ពុជា។ បទនេះ បកស្រាយដោយតារាចម្រៀងខ្មែរ-អាមេរិក Jay Chan។ នៅក្នុងទំព័រ Youtube របស់ខ្លួន តារាចម្រៀង ដែលមានមូលដ្ឋាននៅក្រុង Modesto រដ្ឋ California សហរដ្ឋអាមេរិក អះអាងថា ខ្លួនច្រៀងតាមលំនាំ (Cover) បទរាំវង់ដ៏ពេញនិយមនាអំឡុងទសវត្សរ៍ឆ្នាំ៨០-៩០ ។
ការលើកឡើងរបស់តារាចម្រៀង Jay Chan សំដៅលើបទ «មិនីកាអស់សាំង» ដែលបកស្រាយដោយតារាចម្រៀង គង់ ឌីណា។ បទនេះត្រូវបានថតជាខារ៉ាអូខេ នាអំឡុងឆ្នាំ១៩៩០ ដែលសំដែងដោយ លោក យុទ្ធ តារា ឆានី និងអ្នកនាង ប៉ែន សុផានី។
ប៉ុន្តែបើកម្រងអាល់ប៊ុមចម្រៀងអត្ថាធិប្បាយរបស់ក្រុមហ៊ុនវត្តភ្នំ សម្រាប់បទមុនឆ្នាំ១៩៧៥ (Oldies Songs Before 1975) លោក គង់ ឌីណា មិនមែនជាម្ចាស់សំនៀងដើមនោះឡើយ។ តាមពិតលោក កង ផាន់ណូ តារាចម្រៀងអំឡុងឆ្នាំ១៩៧០ គឺជាម្ចាស់សំនៀងដើម ជាមួយនឹងចំណងជើងដើមថា «នារីមីនីកា»។
សារព័ត៌មាន ThmeyThmey មិនមានព័ត៌មានលំអិតទាក់ទងនឹងលោក កង ផាន់ណូ ឡើយ ប៉ុន្តែលោកមានបទល្បីៗជាច្រើនកាលពីសម័យដើម ដែលក្នុងនោះមានដូចជា បទក្បត់ចិត្តស្នេហ៍, អួននាងឈ្មោះអី?, មាននឹកបងទេ?, ស្នេហ៍ស្រីមេមាយ និងបទសម្រេចចិត្តយកប្រពន្ធ ជាដើម។
បទ «Celica អស់សាំង» ដែលច្រៀងដោយលោក Jay Chan មានការកែសម្រួលឃ្លាជាច្រើនពីបទដើម ជាពិសេសការប្តូរប្រភេទរថយន្តពី មីនីកា (Mini Car) ទៅជា Celica»។ ដោយឡែកបទដែលលោក គង់ ឌីណា ច្រៀង ក្រៅពីប្តូរចំណងជើងពី «នារីមីនីកា» ទៅជា «មីនីកាអស់សាំង» អត្ថន័យខុសពីបទដើមរបស់លោក កង ផាន់ណូ តែមួយពាក្យប៉ុណ្ណោះត្រង់ឃ្លា « ប្រុសៗឃើញ [តាម] ចោមស្នេហ៍ស្រីៗសម័យ» ដោយទៅជា «ឃើញ [ដេញ] ចោមស្នេហ៍»។
បទ Cover របស់លោក Jay Chan «Celica អស់សាំង» មានការទស្សនាជិត៤លានដងក្នុងរយៈពេលតែ៤ខែប៉ុណ្ណោះ។ ក្នុងឃ្លីបដំបូង លោកបកស្រាយនៅក្នុងស្ទីតយោ ហើយបន្ទាប់មក លោកថតជាឈុតខារ៉ាអូខេ។
I.ស្រីស្រស់សង្ហាជិះ Celica ពាក់វែនតាធំៗ
បើកឡានដៃមួយសើចដាក់ខ្ញុំ ឱ! ក្រមុំរូបស្រស់
ដៃម្ខាងច្រូងសក់ ភ្នែកសម្លក់ហើយសួរខ្ញុំថា
នែ៎! ប្រុសជីវ៉ាទៅណាមកណា ឃើញតែញ៉ែតាមផ្លូវ។
II.អុញ! ឡានអស់សាំង ឈប់គាំងរាំងកណ្ដាលផ្លូវ
ឡានរុញមិនទៅ ស្ទះគេពេញផ្លូវ ផ្អើលប៉ូលិសមកដេញ
ស្រីស្រស់ទុក្ខម្នេញ ចេញមកឈរហើយធ្វើមុខជូរ
មុខដូចគំនូរ មិនគួរយកកេរ្តិ៍ចោលកណ្ដាលផ្លូវ។
III.ខ្ញុំឃើញស្រីល្អ ងាកកឈរធ្វើមុខក្រញូវ
ដួងចិត្តហ្មងសៅ ឱ! ស្រីពៅខ្មាសគេអស់អ្នកផ្សារ
ខ្ញុំដើរឈរជិត ញញឹមដាក់ហើយស្រែកឱ្យថា
នែ៎! ស្រស់ជីវ៉ា ជិះ Celica អស់សាំងកណ្ដាលផ្លូវ៕
បទ «មីនីកាអស់សាំង» ច្រៀងដោយ លោក គង់ ឌីណា និងបទដើម «នារីមីនីកា» ដែលច្រៀងដោយលោក កង ផាន់ណូ ខុសគ្នាតែមួយពាក្យប៉ុណ្ណោះ។
សំនៀងលោក គង់ ឌីណា៖
សំនៀងលោក កង ផាន់ណូ៖
I.ស្រីស្រស់សង្ហាបើកមីនីកា ពាក់វែនតាធំៗ
បើកឡានដៃមួយសើចដាក់ខ្ញុំ ឱ! ក្រមុំរូបស្រស់
ប្រុសៗឃើញ (ដេញ) តាម ចោមស្នេហ៍ស្រីៗសម័យ
ស៊ីវិល័យមែនភពផែនដែនខ្មែរ ប្រដូចមិនបាន
II.អុញ! ឡានអស់សាំង មុខស្លាំងជាប់គាំងកណ្ដាលផ្លូវ
ឡានរុញមិនទៅ ធ្វើស្ទះផ្លូវ ប៉េអឹមមកដេញ
ស្រីពៅចុះចេញ ដេញស៊ីក្លូធ្វើមុខជូរ
មុខដូចគំនូរ ពុំគួរធ្វើចោលកេរ្តិ៍កណ្តាលខ្មាស់
III.ប្រុសផ្អើលឈូឆរ ឃើញស្រីល្អឈរកណ្តាលផ្លូវ
រុញឡានមិនទៅ ពៅចង់យំឈរក្រៀមចំបែង
កើតទុក្ខម្នាក់ឯងចង់ធ្វើខែង ថ្លែងប្រាប់គេថា...
ស្រីស្រស់សង្ហាបើកមីនីកា អស់សាំងកណ្តាលផ្លូវ៕