ជាតិ
ត្រីកញ្ជ្រូកក្រហម ធ្វើចរាចរផ្លាស់ទីជាហ្វូង ត្រីកញ្ជ្រូកក្រហម។ រូបភាព៖ បណ្ឌិត ហ្សេប ហូហ្គេន / អច្ឆរិយភាពនៃទន្លេមេគង្គ។
× គម្រោងអច្ឆរិយភាពនៃទន្លេមេគង្គ (Wonders of the Mekong) សូមណែនាំត្រីឥតស្រកាមួយប្រភេទ ដែលមានរស់នៅក្នុងទន្លេធំៗ និងដៃទន្លេ ដែលមានព្រៃលិចទឹកព័ទ្ធជុំវិញ ដូចជាអាងទន្លេចៅប្រាយ៉ា អាងទន្លេមេគង្គ ក្នុងទន្លេសាប បឹងទន្លេសាប ដោយវាប្រើប្រាស់អាងទឹកជ្រៅសម្រាប់ជ្រកកោនក្នុងរដូវប្រាំង។
ត្រីកញ្ជ្រូកក្រហម ជាប្រភេទត្រីទឹកសាប មានឈ្មោះវិទ្យាសាស្ត្រ (Yasuhikotakia modesta) និងឈ្មោះជាភាសាអង់គ្លេស Redtail botia មានរស់នៅតាមទន្លេធំៗ ដែលមានភក់នៅស្រទាប់ក្រោម តាមស្ទឹង អូរ បឹងទន្លេសាប និងម្តងម្កាល វាចូលទៅក្នុងតំបន់វាលលិចទឹកផងដែរ។
ត្រីកញ្ជ្រូកក្រហម មានប្រវែងដងខ្លួនអតិបរមា ២៥ ស.ម វារកចំណីស៊ីនៅពេលយប់ ដូចជាជន្លេន ពពួកសត្វឥតឆ្អឹងកង សត្វល្អិតនៅស្រទាប់បាតជាអាហារ។ ត្រីប្រភេទនេះ វាធ្វើចរាចរផ្លាស់ទីជាហ្វូង។ នៅផ្នែកខាងលើល្បាក់ខោន នៃអាងទន្លេមេគង្គ ត្រីកញ្ជ្រូកក្រហមធ្វើចរាចរផ្លាស់ទីចូលទៅតាមដៃទន្លេ និងស្ទឹងតូចៗ ទីដែលវាអាចពង-កូនអំឡុងពេលមុនរដូវទឹកជំនន់ចូលមកដល់។ បន្ទាប់មក ពេលដែលទឹកចាប់ផ្តើមស្រក វាក៏ត្រឡប់ចូលមកតាមដៃទន្លេ និងទន្លេមេគង្គវិញ។ ការធ្វើចរាចរផ្លាស់ទីឆ្ពោះទៅខ្សែទឹកខាងក្រោមល្បាក់ខោន ពីតំបន់ដីសណ្តទន្លេមេគង្គ ចាប់ពីខែវិច្ឆិកា ដល់ខែមិនា គឺកើតឡើងដោយសារទឹកទន្លេមេគង្គស្រកខ្លាំង ជាជំនួសមកវិញទឹកប្រៃក៏ហូរចូល។ ចាប់ពីខែឧសភា ដល់ខែកក្កដា ត្រីកញ្ជ្រូក ធ្វើចរាចរផ្លាស់ទីពីល្បាក់ខោន ចុះមកខ្សែទឹកខាងក្រោមចូលទៅក្នុងតំបន់ទំនាបលិចទឹក នៅភាគខាងត្បូងនៃប្រទេសកម្ពុជា និងតំបន់ដីសណ្តទន្លេមេគង្គ ក្នុងប្រទេសវៀតណាម។
ត្រីកញ្ជ្រូកក្រហម ត្រូវបានគេកត់ត្រាចូលក្នុងបញ្ជីក្រហម IUCN Red List (Least Concern) ក្នុងឆ្នាំ ២០១១ ជាប្រភេទត្រីដែលរងគ្រោះតិចតួច ដែលនឹងអាចឈានទៅផុតពូជ។ ត្រីប្រភេទនេះ ពុំមានព័ត៌មានច្បាស់លាស់អំពីបញ្ហាប្រឈមចំពោះពួកវានៅឡើយទេ៕
© រក្សាសិទ្ធិដោយ thmeythmey.com