ជាតិ
ប្រវត្តិវិទូ ស៊ន សំណាង៖ វិមានឯករាជ្យឧទ្ទិសដល់ឯករាជ្យភាពពីបារាំង វិមានឈ្នះឈ្នះឧទ្ទិសដល់ការបញ្ចប់សង្គ្រាមស៊ីវិលទាំងស្រុង លោកប្រវត្តិវិទូ ស៊ន សំណាង
× ប្រវត្តិវិទូ ស៊ន សំណាង បានចូលរួមផ្តល់គំនិតក្នុងការសាងសង់វិមានអនុស្សាវរីយ៍ឈ្នះឈ្នះ ដែលឧទ្ទិសដល់នយោបាយឈ្នះឈ្នះរបស់សម្តេចនាយករដ្ឋមន្ត្រី ដែលបាននាំដល់ការបញ្ចប់សង្គ្រាមស៊ីវិលទាំងស្រុង និងនាំដល់ឯកភាពទឹកដីកម្ពុជា។ លោកសាស្ត្រាចារ្យ ស៊ន សំណាង បានផ្តល់បទសម្ភាសដល់លោក លាង ដឺលុច អគ្គនាយកនៃសារព័ត៌មានថ្មីៗ ដើម្បីពន្យល់លម្អិតអំពីអត្ថន័យ និងសារសំខាន់នៃវិមានឈ្នះឈ្នះនៅក្នុងប្រវត្តិសាស្ត្រកម្ពុជា។
លោក លាង ដឺលុច៖ លោកសាស្ត្រាចារ្យ តើហេតុអ្វីបានជាវិមានអនុស្សាវរីយ៍នៃនយោបាយ ឈ្នះឈ្នះ មានអត្ថន័យសំខាន់សម្រាប់កូនខ្មែរជំនាន់ក្រោយ?
ប្រវត្តិវិទូ ស៊ន សំណាង៖ វាពិតជាសំខាន់។ គឺជាសំណង់មួយដ៏មានអត្ថន័យនាសម័យក្រោយអង្គរ។ វាជាសំណង់និមិត្តរូបនៃនយោបាយបង្រួបបង្រួមជាតិ និងឯកភាពទឹកដីទាំងស្រុង ដោយគ្មានអ្នកឈ្នះ និងគ្មានអ្នកចាញ់ តាមរយៈនយោបាយឈ្នះឈ្នះរបស់សម្តេច ហ៊ុន សែន ដើម្បីបញ្ចប់សង្គ្រាមស៊ីវិលជាមួយកងទ័ពខ្មែរក្រហម។ បើយើងក្រឡេកមើលប្រវត្តិសាស្ត្រ កម្ពុជាយើងបានបែកបាក់គ្នាមានជម្លោះជាតិសាសន៍ឯងតាំងពីចុងសតវត្សរ៍ទី១៥រហូតមក ពោលគឺពីឆ្នាំ១៤៧៤។ រាប់មកដល់ពេលនេះ គឺជាង៥០០ឆ្នាំ។ ខ្ញុំសូមរំឭកបន្តិចទៅចុះ គឺពីឆ្នាំ១៤៧៤ នោះ មហាក្សត្រ៣អង្គបានបែងចែកទឹកដីខ្មែរត្រួតត្រាផ្សេងៗគ្នា។ ព្រះបាទស្រីរាជា បានកាន់កាប់ទឹកដីភាគខាងជើង ដោយយកស្រុកបរិបូរណ៍ជារាជធានី។ ព្រះបាទស្រីសុរិយោទ័យ ដែលបានយកបាសានជារាជធានី បានត្រួតត្រា១៥ខេត្តនៅភាគខាងកើត។ រីឯព្រះធម្មរាជាដែលត្រួតត្រា ភាគខាងត្បូងដោយមានចតុមុខជារាជធានី។
លោក លាង ដឺលុច៖ លោកសាស្ត្រាចារ្យ តើគេអាចនិយាយបានឬទេថា វិមានឈ្នះឈ្នះ គឺជាសំណង់របត់ប្រវត្តិសាស្ត្រទីពីរ បន្ទាប់ពីវិមានឯករាជ្យ នៅកម្ពុជាក្នុងសម័យទំនើប ពោលគឺបន្ទាប់ពីកម្ពុជាបានទទួលឯករាជ្យពីអាណាព្យាបាលបារាំង?
ប្រវត្តិវិទូ ស៊ន សំណាង៖ ខ្ញុំសូមបញ្ជាក់បន្តិចថា មុននឹងមានវិមានឈ្នះឈ្នះនេះ យើងមានវិមានអនុស្សាវរីយ៍២ធ្នូដែលត្រូវបានសម្ពោធកាលពីឆ្នាំ២០១៣។ វិមានឯករាជ្យ គឺជាសំណង់និមិត្តរូបនៃការពួតដៃគ្នារវាងខ្មែរនិងខ្មែរដែលដង្ហែរតាមព្រះបរមរតនកោដ្ឋ ដើម្បីទាមទារឯករាជ្យពីបារាំងដោយជោគជ័យ។ រីឯសំណង់អនុស្សាវរីយ៍រណសិរ្ស២ធ្នូ គឺរំឭកដល់ការប្រមូលកម្លាំងផ្តួលរំលំរបបប្រល័យពូជសាសន៍ខ្មែរក្រហម។ ប៉ុន្តែមិនមែនមានន័យថា កម្ពុជាចប់សង្គ្រាមនោះឡើយ។ ប៉ុន្តែវិមានអនុស្សាវរីយ៍ឈ្នះឈ្នះ គឺរំឭកដល់ការអនុវត្តនយោបាយឈ្នះឈ្នះរបស់សម្តេចតេជោ ហ៊ុន សែន រហូតដល់បានបញ្ចប់សង្គ្រាមស៊ីវិលដោយទទួលបានជោគជ័យទាំងស្រុងតែម្តង។ គឺនៅក្នុងឆ្នាំ១៩៩៨នោះ ដែលខ្មែរឈ្នះទាំងអស់គ្នា។
លោក លាង ដឺលុច៖ ២០ឆ្នាំហើយដែលកម្ពុជាមានសន្តិភាព ឯកភាពទឹកដី។ បើតាមយោបល់របស់លោកសាស្ត្រាចារ្យ តើកូនខ្មែរត្រូវធ្វើអ្វីខ្លះ ដើម្បីថែរក្សាសន្តិភាព?
ប្រវត្តិវិទូ ស៊ន សំណាង៖ សូមឲ្យកូនខ្មែរពង្រឹងភាពជាម្ចាស់របស់ប្រទេស ពង្រឹងសមត្ថភាពខ្លួនឯង និងពង្រឹងភាពជាដៃគូជាមួយបរទេសដោយស្មើសិទ្ធិ។ ដើម្បីពង្រឹងភាពជាម្ចាស់បានយើងត្រូវស្គាល់ខ្លួនឯង។ បើយើងចង់មើលអនាគតកម្ពុជាឲ្យវែងប៉ុណ្ណា យើងត្រូវមើលទៅអតីតកាលឲ្យវែងប៉ុននោះដូចគ្នា។ ប្រវត្តិសាស្ត្រគឺជាស្ពានភ្ជាប់អតីតកាលមកបច្ចុប្បន្នកាល ហើយបង្ហាញផ្លូវទៅអនាគត។ កូនខ្មែរត្រូវស្គាល់ខ្មែរឲ្យច្បាស់។ នៅពេលដែលបារាំងមកគ្រប់គ្រងខ្មែរ បារាំងបានបកប្រែពង្សសាវតាខ្មែរទាំងអស់ ដើម្បីគេអាចស្គាល់ចំណុចខ្លាំង និងចំណុចខ្សោយខ្មែរ។ សូម្បីប្រវត្តិខេត្ត និងតំបន់ ក៏បារាំងស្វែងយល់ដែរ។
ដើម្បីពង្រឹងសមត្ថភាពខ្លួនឯង កូនខ្មែរត្រូវយកចំណេញពីសន្តិភាពដែលពួកគេកំពុងមាន ដើម្បីប្រឹងប្រែងសិក្សារៀនសូត្រ។ គេត្រូវដឹងថា ប្រទេសមួយរីកចម្រើនត្រូវមាន P បី។ ទីមួយគឺ Peace (សន្តិភាព) ទីពីរគឺ Prosperity (វិបុលភាព) និងចុងក្រោយគឺ Progress (វឌ្ឍនភាព)៕
Tag:
ឈ្នះឈ្នះ ប្រវត្តិសាស្ត្រ ស៊ន សំណាង
© រក្សាសិទ្ធិដោយ thmeythmey.com