ភ្នំពេញ៖ ប្រធានមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព ទើបតែទទួលបានពានរង្វាន់សិទ្ធិមនុស្ស និងនីតិរដ្ឋ ពីរដ្ឋាភិបាលបារាំង-អាល្លឺម៉ង នៅក្នុងថ្ងៃអបអរសិទ្ធិមនុស្សអន្តរជាតិលើកទី៧០ កន្លងមក។ មុននឹងប្រគល់ពានរង្វាន់នេះ រដ្ឋាភិបាលបារាំង-អាល្លឺម៉ង់ បានតាមដានរាល់សកម្មភាពអ្នកការពារសិទ្ធិមនុស្ស និងអ្នកបំពេញការងារក្នុងកិច្ចការសង្គមទូទាំងពិភពលោក ដើម្បីពិនិត្យនិងវាយតម្លៃ ទើបអាចសម្រេចជ្រើសរើសមនុស្សចំនួន១៥នាក់ ដែលសាកសមទទួលពានរង្វាន់ នៅក្នុងឆ្នាំ២០១៨នេះ។
លោកស្រី ចក់ សុភាព ដែលទទួលបានពានរង្វាន់នេះ បានយល់ឃើញថា ពានរង្វាន់មួយនេះ បង្ហាញពីការយកចិត្តទុកដាក់របស់រដ្ឋាភិបាលប្រទេសទាំងពីរមកលើអ្នកការពារសិទ្ធិមនុស្ស និងកិច្ចការសង្គម។ ដ្បិតត្រេកអរនឹងការទទួលបានពានរង្វាន់នេះក្តី ប៉ុន្តែលោកស្រី ចក់ សុភាព ក៏បានពន្យល់ថា ការបំពេញការងារលើផ្នែកសិទ្ធិមនុស្សនេះ មិនមែនលោកស្រីសម្លឹងមើលទៅពានរង្វាន់នោះទេ ពោលគឺខ្លួនគ្រាន់តែធ្វើអ្វីឲ្យស្របតាមបេសកកម្ម និងភារកិច្ចប៉ុណ្ណោះ។
សូមលោក- អ្នកនាង ស្ដាប់កិច្ចសម្ភាសរវាងលោក រំដួល ចិត្រា អ្នកសារព័ត៌មានថ្មីៗ ជាមួយលោកស្រី ចក់ សុភាព ប្រធានមជ្ឈមណ្ឌលសិទ្ធិមនុស្សដូចទៅ៖
កន្លងមកស្ថានទូតបារាំង បានលើកឡើងថា អ្នកស្រី ចក់ សុភាព ក៏ជាជនដ៏សកម្មក្នុងបណ្តាញសង្គម និងដែលក្រោកឈរឡើងដើម្បីសិទ្ធិមនុស្ស ហើយអង្គការដែលគាត់កំពុងដឹកនាំបានលើកកម្ពស់ការគោរពសិទ្ធិមនុស្ស និង សេរីភាពមូលដ្ឋាន ជាពិសេសការលើកកម្ពស់ សហគមន៍ ដូចជា ក្រុមអ្នកការពារសិទ្ធិមនុស្ស ក្រុមជនជាតិភាគតិច យុវជន ស្ត្រី និងក្រុម LGBTIQ+ ។
នៅឆ្នាំ២០១៨នេះ អ្នកស្រី ចក់ សុភាព ស្ថិតក្នុងចំណោមសកម្មជន១៥រូបទូទាំងពិភពលោក ដែលទទួលបានពានរង្វាន់ Prix Franco-Allemand des droits de l’Homme et de l’Etat de droit (Franco-German Prize for Human Rights and the Rule of Law)។ ពានរង្វាន់នេះ ត្រូវបានប្រកាសរួមគ្នាដោយលោក Jean-Yves Le Drian រដ្ឋមន្ត្រីបារាំងទទួលកិច្ចការអឺរ៉ុប និងការបរទេស រួមជាមួយសមភាគីអាល្លឺម៉ង់ លោក Heiko Mass។
ជ័យលាភីផ្សេងទៀតរួមមាន Vuyiseka Dubula-Majola (អាហ្វ្រិក), Yu Wensheng (ចិន), Aminata Traoré (កូតឌីវ័រ), Mohamed Lotfy (អេហ្ស៊ីប), Alfredo Okenve (ហ្គីណេអេក្វាទ័រ), Nityanand Jayaraman (ឥណ្ឌា), Hessen Sayah Corban (លីបង់), Mekfoula Mint Brahim (ម៉ូរីតានី), Liz Chicaje Churay (ប៉េរូ), Oyub Titiev (រុស្ស៊ី), Anwar al-Bunni (ស៊ីរី), Daoud Nassar (ប៉ាឡេស្ទីន), Sirikan Charoensiri (ថៃ) និង Susana Raffalli Arismendi (វេណេស៊ុយអេឡា)។
កាលពីឆ្នាំ២០១៦ លោក ធន សារាយ ប្រធានសមាគមការពារសិទ្ធិមនុស្ស និងការអភិវឌ្ឍន៍នៅកម្ពុជា អាដហុក ស្ថិតក្នុងចំណោមសកម្មជនការពារសិទ្ធិមនុស្សលើពិភពលោកចំនួន១៥នាក់ ដែលទទួលបានពានដូចគ្នានេះ នាពិធីមួយនៅទីក្រុងប៊ែរឡាំង ប្រទេសអាល្លឺម៉ង់។
រដ្ឋាភិបាលបារាំង និងអាល្លឺម៉ង់ បានរៀបចំពិធីប្រគល់ពានរង្វាន់សិទ្ធិមនុស្ស និងនីតិរដ្ឋ ក្នុងគោលបំណងលើកទឹកចិត្តដល់អ្នកដែលតស៊ូរ និងបរិច្ចាគពេលវេលាដើម្បីការពារសិទ្ធិមនុស្សនៅលើពិភពលោក៕