កីឡាការិនី នៅ ស្រីពៅ បានក្លាយជាកីឡាការិនីឆ្នើមប្រចាំឆ្នាំក្នុងកម្មវិធីប្រដាល់ World Lethwei Championship (WLC)នៅប្រទេសមីយ៉ាន់ម៉ា។ កីឡាការិនីវ័យ២២រូបនេះមិននឹកស្មានថា មីយ៉ាន់ម៉ាឲ្យតម្លៃ និងជ្រើសរើសនាងបែបនេះសោះ។ ជាមួយជោគជ័យនេះ ស្រីពៅ តាំងចិត្តដណ្តើមមេដាយពីការប្រកួតកីឡាស៊ីហ្គេមឆ្នាំ២០១៩ និងសម្លឹងឱកាសបញ្ចេញស្នាដៃនៅលើសង្វៀនក្បាច់គុនធំជាងគេ ONE Championship។
«ពេលខ្ញុំឃើញពត៌មានភ្លាម និយាយពីរំភើបខ្លាំងមែនទែន! មិនគួរឲ្យជឿតែម្តង។ ខ្ញុំមិននឹកស្មានថាប្រទេសមីយ៉ាន់ម៉ា គេឲ្យតម្លៃយើងដល់ថ្នាក់ហ្នឹងសោះ ព្រោះអីនៅស្រុកខ្មែរយើង គេមិនសូវឲ្យតម្លៃស្រីដូចគេទេ»។ ការលើកឡើងបែបនេះរបស់កីឡាការិនី នៅ ស្រីពៅ បន្ទាប់ពីនាងជាប់ជាអ្នកប្រយុទ្ធនារីឆ្នើមប្រចាំឆ្នាំនៅមីយ៉ាន់ម៉ា។
ការទទួលបានពានជាអ្នកប្រយុទ្ធនារីឆ្នើមនេះ បន្ទាប់កីឡាការិនីរបស់ក្លិប Cambodia Top Team រូបនេះ យកឈ្នះកីឡាការិនីម្ចាស់ផ្ទះមីយ៉ាន់ម៉ា Shwe Nadi ដោយពិន្ទុក្នុងព្រឹត្តិការណ៍ប្រដាល់ World Lethwei Championship កាលពីថ្ងៃទី២ ខែមិថុនា ឆ្នាំ២០១៨។
សម្រាប់ នៅ ស្រីពៅ ភាពជោគជ័យប៉ុណ្ណឹងពុំទាន់គ្រប់គ្រាន់នោះទេ ដោយនាង បានដាក់គោលដៅដណ្តើមមេដាយស៊ីហ្គេមឆ្នាំ២០១៩ ជូនកម្ពុជា។ នាង ចង់បង្ហាញសមត្ថភាពក្នុងព្រឹត្តិការណ៍វាយដាក់ទ្រុង ដ៏ធំប្រចាំតំបន់អាស៊ី ONE Championship ទៀតផង។ កីឡាការិនីមានទីលំនៅក្នុងរាជធានីភ្នំពេញរូបនេះ រំពឹងថា ឆ្នាំ២០១៩ នាង នឹងទទួលបានជោគជ័យជាងឆ្នាំ២០១៨។
«ខ្ញុំគិតថា ២០១៩ ខ្ញុំអាចល្បីខ្លាំងជាងឆ្នាំ២០១៨។ ខ្ញុំបានដាក់ចិត្តប្រដាល់ហើយ អីចឹងខ្ញុំចង់ប្រកួតឲ្យបានគ្រប់វិញ្ញាសារទាំងអស់។ ខ្ញុំប្រាប់ខ្លួនឯងថាមិនឈប់ពាក់កណ្តាលផ្លូវដាច់ខាត។ និយាយទៅធ្វើយ៉ាងណាឲ្យសម្រេចគោលដៅ គឺឲ្យគេស្គាល់ខ្ញុំច្រើន និងគោរពទទួលស្គាល់ខ្ញុំ»។ នេះជាការរៀបរាប់របស់កីឡាការិនី នៅ ស្រីពៅ
ស្រីពៅ ជំរុញទឹកចិត្តស្ត្រីខ្មែរត្រូវហ៊ានប្រើប្រាស់សមត្ថភាព និងធ្វើអ្វីដែលខ្លួនចង់ធ្វើ។ នាងបន្ថែមថា៖«ជោគជ័យដល់កម្រិតនេះ សម្រាប់ខ្ញុំមិនទាន់គ្រប់គ្រាន់ទេ។ ខ្ញុំចង់បង្ហាញពិភពលោកថា ស្រីខ្មែរក៏ខ្លាំងដូចគេដែរ ហើយខ្ញុំចង់ប្រាប់ស្រីៗទាំងអស់គ្នាថា កុំខ្លាច កុំខ្មាសអៀន បើចង់ហាត់ប្រដាល់ ឬធ្វើអ្វីក៏ដោយ។ មនុស្សស្រីក៏ធ្វើបានដូចគ្នា»។
កីឡាការិនីប្រដាល់សកលជម្រើសជាតិរូបនេះ បានចូលប្រឡូក និងហ្វឹកហាត់កីឡាប្រដាល់តាំងពីអាយុ១៦ឆ្នាំ។ តាមពិតអាជីពប្រដាល់មិនមែនជាក្តីស្រមៃរបស់ ស្រីពៅ កាលពីនៅក្មេងនោះទេ។ ប៉ុន្តែតាមរយៈវិស័យកីឡាប្រដាល់នេះជួយឲ្យ នាង មានឈ្មោះល្បីល្បាញទាំងនៅលើឆាកជាតិ និងអន្តរជាតិ។ លើសពីនេះ ជួយឲ្យជីវភាពគ្រួសាររបស់នាងមានភាពប្រសើរឡើងទៀតផង។
ស្រីពៅ បានរំលឹកថា៖«បងប្រុសខ្ញុំ នៅ ស៊ីថា គាត់ជាអ្នកប្រដាល់ដែរ កាលនោះគាត់ឡើងប្រដាល់ ហើយវាយចាញ់គេ។ ខ្ញុំឃើញអីចឹងខ្ញុំខឹងណាស់ ហើយខ្ញុំប្រាប់ខ្លួនឯងថា ចាំមើលណា៎ ខ្ញុំទៅហាត់ដែរ ហើយខ្ញុំប្រកួតមិនឲ្យចាញ់គេទេ»៕