សមាជិកបក្សប្រជាធិបតេយ្យចាប់ផ្តើមចូលកាន់កាប់អាសនៈភាគច្រើនក្នុងសភាតំណាងរាស្ត្រ (House of Representatives) ជាផ្លូវការនៅថ្ងៃព្រហស្បតិ៍ ដោយមានលោកស្រី ណាន់ស៊ី ផេឡូស៊ី (Nancy Peloci) ជាប្រធានផង។ ស្បថចូលកាន់តំណែងភ្លាម សមាជិកបក្សប្រជាធិបតេយ្យក៏ប្រើអំណាចបោះឆ្នោតអនុម័តច្បាប់បញ្ចប់ការ«បិទរដ្ឋាភិបាលសហព័ន្ធ»ដែលអូសបន្លាយអស់ជាង ១០ថ្ងៃព្រោះការខ្វែងគំនិតគ្នារឿងលុយសង់ជញ្ជាំងព្រំដែនដែរ។ ប៉ុន្តែ ភាគរយច្រើនដែលច្បាប់ត្រូវអនុម័តនេះនឹងត្រូវបញ្ជូនត្រឡប់មកវិញដោយសារព្រឹទ្ធសភាដឹកនាំដោយបក្សសាធារណរដ្ឋ និងសេតវិមានបដិសេធ ព្រោះមិនទទួលបានលុយសង់ជញ្ជាំង។ ការប្រទាញប្រទង់គ្នារវាងស្ថាប័ននីតិប្រតិបត្តិ និងស្ថាប័ននីតិបញ្ញត្តិនឹងកាន់តែកើនឡើងខ្លាំងចាប់ពីពេលនេះ។
សករាជនយោបាយថ្មីចាប់ផ្តើមនៅសភាតំណាងរាស្ត្រអាមេរិក ដោយការត្រឡប់មកកាន់កាប់អាសនៈភាគច្រើនរហូតដល់ ២៣៥ របស់ក្រុមតំណាងរាស្ត្របក្សប្រធិបតេយ្យ បន្ទាប់ពីឈ្នះឆ្នោតពាក់កណ្តាលអាណត្តិកាលពីខែវិច្ឆិកា។ លោកស្រី ណាន់ស៊ី ផេឡូស៊ី ដែលជាមេដឹកនាំបក្សប្រជាធិបតេយ្យ និងជាតំណាងរាស្ត្រប្រចាំរដ្ឋកាលីហ្វរនីញ៉ានោះ ក៏ទទួលបានសេចក្តីទុកចិត្តក្រោមសំឡេងគាំទ្រ ២២០ ពីសមាជិកសភាសរុប ៤៣៥រូប ឲ្យធ្វើជាប្រធានសភា (House Speaker) សម្រាប់នីតិកាលទី ១១៦ ពីឆ្នាំ ២០១៩-២០២១ ដែរ។
មុនមានការបោះឆ្នោតផ្តល់សេចក្តីទុកចិត្ត ក្នុងបក្សប្រជាធិបតេយ្យក៏មានចលនាប្រឆាំងនឹងបេក្ខភាព លោកស្រី ផេឡូស៊ី ដែរ ហើយពួកគេចង់ឲ្យមានការផ្លាស់ប្តូរក្បាលម៉ាស៊ីនដឹកនាំបក្សប្រជាធិបតេយ្យដែរ។ ប៉ុន្តែចុងក្រោយ លោកស្រី ផេឡូស៊ី នៅតែទទួលបានការគាំទ្រលើសលុប និងកាន់តំណែង ប្រធានសភាតំណាងរាស្ត្រដែលមានអំណាចបំផុតលេខរៀងទីបីក្នុងបរិបទនយោបាយអាមេរិកចាប់ពីពេលនេះ។
ក្នុងថ្ងៃកាន់តំណែងទីមួយសមាជិកបក្សប្រជាធិបតេយ្យដែលក្តោបក្តាប់អាសនៈសភាភាគច្រើននោះបានប្រញាប់ជំរុញការអនុម័តច្បាប់ធានាឲ្យមានការបើករដ្ឋាភិបាលសហព័ន្ធឡើងវិញដែរ ជាពិសេសដើម្បីឲ្យបុគ្គលិកបម្រើការងារជាង ៨០ម៉ឺននាក់ដែលរងផលប៉ះពាល់ពីការបិទរដ្ឋាភិបាលនោះបានប្រាក់បៀវត្សរ៍ឡើងវិញដែរ។ ចំណែកប្រធានរដ្ឋសភាថ្មី លោកស្រី ផេឡូស៊ី បានថ្លែងប្រាប់ទៅកាន់បណ្តាសមាជិកសភាបក្សសាធារណរដ្ឋ និងសេតវិមានជាពិសេសលោក ត្រាំ តាមរយៈអ្នកសារព័ត៌មានដែរឲ្យបើករដ្ឋាភិបាលឡើងវិញ ហើយត្រឡប់មកចូលតុសន្ទនាគ្នាឡើងវិញតាមបែបមនុស្សធំចាស់ចិត្តចាស់គំនិតលើការរក្សាសន្តិសុខព្រំដែន។
ក្រៅពីនេះ លោកស្រី ផេឡូស៊ី ក៏បានផ្ញើលិខិតមួយច្បាប់ទៅប្រធានាធិបតី ដូណាល់ ត្រាំ អញ្ជើញលោកឲ្យមកថ្លែងសន្ទរកថាទៅកាន់ប្រជាជាតិ (State of Union) ជាលើកទីពីរឲ្យបានមុនការបើកអង្គប្រជុំសភារួមនៅថ្ងៃ ២៩ ខែមករាផង។
ពីថ្ងៃនេះទល់ការបោះឆ្នោតប្រធានាធិបតីឆ្នាំ ២០២០ គេនឹងឃើញការប្រទាញប្រទង់គ្នាកាន់តែច្រើនរវាងស្ថាប័ននីតិបញ្ញតិ្ត ជាមួយនិងប្រធានាធិបតីដែលដឹកនាំអង្គនីតិប្រតិបត្តិ ហើយរឿងចម្រូងចម្រាសផ្សេងទៀតដូចជាការចាប់ផ្តើមនីតិវិធីដកតំណែងប្រធានាធិបតីក៏អាចនឹងកើតឡើងនៅសភាតំណាងដូចគ្នា។
-បក្សប្រជាធិបតេយ្យអនុម័តច្បាប់បើករដ្ឋាភិបាលសហព័ន្ធឡើងវិញ តែទំនងត្រូវបញ្ជូនត្រឡប់មកវិញ
ដូចបានបញ្ជាក់ខាងដើម អំណាចនីតិបញ្ញត្តិដែលបក្សប្រជាធិបតេយ្យមានគឺ ត្រូវប្រើប្រាស់ដំបូងបំផុតដើម្បីអនុម័តវិធានការពីរផ្សេងគ្នាដែលធានាការបើកឡើងវិញនូវរដ្ឋាភិបាលសហព័ន្ធដែលត្រូវបានបិទដោយផ្នែកតាំងពីចុងខែធ្នូមកនោះ។ រឿងចម្រូងចម្រាសជុំវិញលុយសង់ជញ្ជាំងដែលជាដើមហេតុនៃការបិទរដ្ឋាភិបាលនោះត្រូវដាក់ឲ្យនៅដាច់ដោយឡែកដើម្បីជជែកគ្នាពេលក្រោយ។
វិធានការទីមួយ បើតាមការចុះផ្សាយរបស់ទីភ្នាក់ងារព័ត៌មាន AFP គឺ កំណត់ថវិកាចំនួនប្រាំមួយផ្សេងគ្នាដែលផ្គត់ផ្គង់ហិរញ្ញវត្ថុប្រចាំឆ្នាំសារពើពន្ធឆ្នាំ ២០១៩ ដល់បណ្តាទីភ្នាក់ងាររដ្ឋាភិបាលជាច្រើនរួមមានរតនាគារ, ក្រសួងការបរទេស និងក្រសួងយុត្តិធម៌ជាដើម។
សូមទាញការចាប់អារម្មណ៍បន្តិចថា ការបិទរដ្ឋាភិបាលដោយផ្នែក (២៥ភាគរយ) ដោយសារលោក ត្រាំ ទារលុយសង់ជញ្ជាំងក្នុងទំហំជាងប្រាំពាន់លានដុល្លារ ទាំងដែលលោកធ្លាប់អួតថា លុយសង់ជញ្ជាំងគឺទារពីម៉ិកស៊ិក។ ការបិទរដ្ឋាភិបាលនេះប៉ះពាល់ដល់ក្រសួងចំនួនប្រាំបួនក្នុងចំណោមក្រសួងទាំងអស់ ១៥ ហើយទីភ្នាក់ងារសំខាន់ៗចំនួនច្រើនជាងដប់ដែលត្រូវផ្អាកដំណើរការ។ បុគ្គលិកបម្រើការងារទាំងអស់ប្រហែល ប្រាំបីសែននាក់នឹងមិនទទួលបានប្រាក់កម្រៃ ក្នុងនោះមាន ៤២ ម៉ឺននាក់ត្រូវបន្តធ្វើការងារដោយគ្មានប្រាក់កម្រៃ ខណៈ៣៨ ម៉ឺននាក់ផ្សេងទៀតត្រូវផ្អាកការងារតែម្តង។
ចំណែកច្បាប់ទីពីរ គឺផ្តល់ហិរញ្ញវត្ថុបណ្តោះអាសន្នសម្រាប់សម្រាប់ក្រសួងសន្តិសុខមាតុភូមិ (Homeland Security) ដល់ត្រឹមថ្ងៃ ៨ ខែកុម្ភៈប៉ុណ្ណោះ ដោយសារក្រសួងនេះទទួលបន្ទុកការពារសន្តិសុខព្រំដែន។ វិធានការស្នើឡើងដោយបក្សប្រជាធិបតេយ្យនេះផ្តល់ថវិកាត្រឹម ១,៣ពានលានដុល្លារប៉ុណ្ណោះសម្រាប់រក្សាសន្តិសុខព្រំដែន ហើយមិនមែនជាលុយសង់ជញ្ជាំងប្រវែងជិត ២០០គីឡូម៉ែត្រតាមព្រំដែនម៉ិកស៊ិកទេ។ ផ្ទុយទៅវិញ វាត្រូវប្រើប្រាស់សម្រាប់ពង្រឹងការសង់របង និងការយាមកាមឬល្បាតតាមព្រំដែនប៉ុណ្ណោះ។
យ៉ាងណាក៏ដោយចុះ គេអាចដឹងជាមុនបាន ថា វិធានការដែលត្រូវបានអនុម័តដោយសភាតំណាងនឹងមិនអាចឆ្លងព្រឹទ្ធសភារួចឡើយ ហើយច្បាប់នេះនឹងត្រូវរុញត្រឡប់មកសភាតំណាងវិញដែរ។ បច្ចុប្បន្ន អាសនៈព្រឹទ្ធសភាភាគច្រើននៅតែស្ថិតក្រោមការគ្រប់គ្រងរបស់បក្សសាធារណរដ្ឋដដែលក្រោយការបោះឆ្នោតពាក់កណ្តាលអណត្តិ។ ដើម្បីឆ្លងផុតព្រឹទ្ធសភា ច្បាប់ទាំងនោះត្រូវការសំឡេងគាំទ្រភាគច្រើន ៦០ លើ ១០០សំឡេង។ ប្រាកដណាស់ថា វាគ្មានហេតុផលដែលច្បាប់រុញពីសភាតំណាងរាស្ត្រត្រូវព្រឹទ្ធសភាអនុម័តឡើយ បើសិនជាពួកគេមិនពេញចិត្តនោះ។ មេដឹកនាំបក្សសាធារណរដ្ឋដែលមានសំឡេងភាគច្រើននៅព្រឹទ្ធសភាលោក Mitch McConnell បានប្រកាសរួចហើយថា ព្រឹទ្ធសភានឹងមិនពិចារណាច្បាប់ដែលតំណាងរាស្ត្របក្សប្រជាធិបតេយ្យអនុម័តនេះឡើយ ដរាបណាគ្មានចំណាត់ការណាមួយដែលឆ្លើយតបនឹងការទាមទាររបស់ប្រធានាធិបតី។
មួយទៀត ទោះជាព្រឹទ្ធសភាព្រមទទួលយកក្តី ច្បាប់ទាំងនោះនឹងត្រូវបញ្ជូនទៅការិយាល័យប្រធានាធិបតីដើម្បីចុះហត្ថលេខាប្រកាសឲ្យប្រើប្រាស់ទៀត។ លោក ត្រាំ គំរាមហើយថា កុំសង្ឃឹមថា លោកនឹងព្រមទទួលយកវិធានការរបស់បក្សប្រជាធិបតេយ្យឲ្យសោះ បើមិនផ្តល់លុយជាង ប្រាំពាន់លានដុល្លារសម្រាប់សង់ជញ្ជាំងព្រំដែនទេនោះ។
តាមស្ថានភាពជាក់ស្តែង ការបិទរដ្ឋាភិបាលនឹងត្រូវអូសបន្លាយទៅមុខទៀត រហូតដល់មានការចរចា និងឯកភាពគ្នាលើចំណុចរួមណាមួយនៅពេលខាងមុខ។ បក្សប្រជាធិបតេយ្យដឹងថា ច្បាប់ដែលខ្លួនអនុម័តមិនងាយនឹងឆ្លងផុតព្រឹទ្ធសភានិងត្រូវចុះហត្ថលេខាដោយប្រធានាធិបតីស្រួលៗឡើយ ប៉ុន្តែយ៉ាងហោចណាស់ វាក្លាយជាសម្ពាធថ្មីសម្រាប់បក្សសាធារណរដ្ឋ និងប្រធានាធិបតីដើម្បីឈានទៅដល់ការធ្វើសម្បទានថ្មីណាមួយ។ ក្នុងកាលៈទេសៈដែល លោក ត្រាំ និងបក្សសាធារណរដ្ឋបន្តយករដ្ឋាភិបាលសហព័ន្ធជាចំណាប់ខ្មាំងដើម្បីធ្វើបង្ខំឲ្យតំណាងរាស្ត្រទាំងអស់ផ្តល់លុយសង់ជញ្ជាំងតាមសំណើរខ្លួន បក្សសាធារណរដ្ឋនឹងប្រឈមបញ្ហាកាន់តែច្រើនជាពិសេសអាចបាត់បង់សំឡេងឆ្នោតក្នុងការបោះឆ្នោតសភា និងប្រធានាធិបតីឆ្នាំ ២០២០ថែមទៀត។
សម្រាប់លោក ត្រាំ ឯណោះវិញ បញ្ហាគឺការសង់ជញ្ជាំងតាមការសន្យាក្នុងពេលឃោសនា។ បើសិនជាលោកព្រមថយមួយជំហាន ដោយយកសំណុំរឿងសង់លុយជញ្ជាំងព្រំដែនទៅជជែកដាច់ដោយឡែក ពីច្បាប់កញ្ចប់ថវិកាចាយវាយប្រចាំឆ្នាំទ្រទ្រង់ដំណើរការទីភ្នាក់ងារដ្ឋាភិបាលសហព័ន្ធ វាច្បាស់ណាស់ថា គ្មានថ្ងៃឡើយដែលលោកអាចបានលុយសង់ជញ្ជាំងព្រំដែននោះ។
ក្នុងសារ Twitter របស់ខ្លួនដែលបង្ហោះនៅថ្ងៃព្រហស្បតិ៍ លោក ត្រាំ បានបន្ទោសបក្សប្រជាធិបតេយ្យនិថចោទប្រកាន់ថា បក្សនេះកំពុងព្យាយាមបំបាក់ប្រជាប្រិយភាព និងទប់ស្កាត់ការសម្រេចឲ្យបាននូវសមិទ្ធផលដែលលោកបានសន្យាមុនការបោះឆ្នោតមកដល់ឆ្នាំ ២០២០។
លោក ត្រាំ ប្រកាសបែបនេះ៖ «ការបិទរដ្ឋាភិបាលគឺព្រោះតែរឿងបោះឆ្នោតប្រធានាធិបតី ឆ្នាំ ២០២០។ បក្សប្រជាធិបតេយ្យដឹងថា ពួកគេមិនអាចឈ្នះដោយផ្អែកលើសមិទ្ធផលរបស់ ត្រាំ ឡើយ។ ដូច្នេះហើយគេនាំគ្នាបដិសេធជញ្ជាំង និងសន្តិសុខព្រំដែនដេលយើងត្រូវការបំផុត។ វាជារឿងអាម៉ាស់របស់ប្រធានាធិបតី។ សម្រាប់ពួកគេ ភ្ជាប់រឿងជញ្ជាំងទៅនយោបាយឲ្យខាងតែបាន»។
យ៉ាងណាមិញថ្ងៃសុក្រទី ៤ ខែមករា មេដឹកនាំបក្សប្រធានាធិបតេយ្យ បក្សសាធារណរដ្ឋ រួមជាមួយមន្ត្រីសេតវិមាននឹងជជែកគ្នាជាថ្មីទៀតដើម្បីដោះស្រាយសមរម្យសម្រាប់បញ្ហាចម្រូងចម្រាសនេះ។ គេមិនដឹងច្បាស់ឡើយថា មេដឹកនាំទាំងនេះនឹងអាចឈានដល់ឯកភាពគ្នាលើកិច្ចព្រមព្រៀងណាមួយបើករដ្ឋាភិបាលឡើងវិញឬក៏យ៉ាងណាឡើយ៕