អត្តពលិកជាតិនិងអន្តរជាតិជាង១ពាន់នាក់ចូលរួមរត់កម្សាន្ត និងថ្មើរជើងប្រវត្តិសាស្ត្រនៅអន្លង់វែង

កីឡាជាតិ

ជាតិ

អត្តពលិកជាតិនិងអន្តរជាតិជាង១ពាន់នាក់ចូលរួមរត់កម្សាន្ត និងថ្មើរជើងប្រវត្តិសាស្ត្រនៅអន្លង់វែង

05, Jan 2019 , 9:42 am

រូបភាព

ដោយ: ថ្មីៗ

ឧត្តរមានជ័យ៖ អត្តពលិកជាតិនិងអន្តរជាតិជាង១ពាន់នាក់ចូលរួមរត់កម្សាន្តនិងថ្មើរជើងប្រវត្តិសាស្ត្រនៅតំបន់តស៊ូចុងក្រោយនៃរបបរបបខ្មែរក្រហមនៅអន្លង់វែងខេត្តឧត្តរមានជ័យ។ ក្រៅពីទាក់ទាញភ្ញៀវទេសចរឲ្យមកទស្សនាតំបន់ទេសចរណ៍ក្នុងខេត្តឧត្តរមានជ័យ ព្រឹត្តិការណ៍នេះ រៀបចំឡើងដើម្បីអបអរខួបលើកទី៤០នៃជ័យជម្នះ៧មករា និងខួប២០ឆ្នាំនៃការបញ្ចប់សង្គ្រាមស៊ីវិលនៅកម្ពុជា។

រមណីយដ្ឋានទេសចរណ៍ប្រវត្តិសាស្ត្រផ្ទះតាម៉ុក បានក្លាយជាទីតាំងចាប់ផ្តើមនៃព្រឹត្តិការណ៍រត់កម្សាន្ត និងថ្មើរប្រវត្តិសាស្ត្រឆ្ពោះទៅកាន់តំបន់ប្រវត្តិសាស្ត្រចុងក្រោយនៃរបបខ្មែរក្រហម។ សម្រាប់ព្រឹត្តិការណ៍រត់កម្សាន្ត៣គីឡូម៉ែត្រនៅព្រឹកថ្ងៃទី៥ ខែមករានេះ មានអត្តពលិកជាតិនិងអន្តរជាតិជាង១ពាន់នាក់ចូលរួម ដែលអត្តពលិកភាគច្រើនជាសិស្សានុសិស្ស និងប្រជាពលរដ្ឋរស់នៅក្នុងស្រុកអន្លង់វែងខេត្តឧត្តរមានជ័យ។ ចំណែកអត្តពលិកបរទេសភាគច្រើនមកពីប្រទេសថៃ។

អគ្គលេខាធិការនៃគណៈកម្មាធិការជាតិអូឡាំពិកកម្ពុជាលោក វ៉ាត់ ចំរើន បានបញ្ជាក់ថា ព្រឹត្តិការណ៍នេះរៀបចំឡើងដើម្បីអបអរខួបលើកទី៤០នៃជ័យជម្នះ៧មករា និងខួប២០ឆ្នាំនៃការបញ្ចប់សង្គ្រាមស៊ីវិលនៅកម្ពុជា ក្រោយរបបខ្មែរក្រហមឆ្នាំ១៩៩៨។ មួយវិញទៀត គឺដើម្បីទាក់ភ្ញៀវទេសចរជាតិនិងអន្តរជាតិឲ្យមកទស្សនាតំបន់ទេសចរណ៍ប្រវត្តិសាស្ត្រក្នុងខេត្តឧត្តរមានជ័យ ក៏ដូចជាអប់រំ និងបញ្ជ្រាបការយល់ដឹងពីអនុស្សាវរីយ៍ជូរចត់នៃរបបខ្មែរក្រហមដល់ភ្ញៀវទេសចរជាតិនិងអន្តរជាតិ។

សម្រាប់លោក វ៉ាត់ ចំរើន នេះជាឱកាសសម្រាប់ភ្ញៀវទេសចរក្នុងការសិក្សាឲ្យបានស៊ីជម្រៅពីការបញ្ចប់សង្គ្រាមស៊ីវិលនៃរបបចុងក្រោយរបស់ខ្មែរក្រហម។ «យើងសហការជាមួយមជ្ឈមណ្ឌលឯកសារកម្ពុជា ដែលស្រាវជ្រាវពីប្រវត្តិរបបខ្មែរក្រហម គាត់នឹងនៅចាំទីនោះ ហើយគាត់នឹងផ្សព្វផ្សាយ អប់រំដល់ភ្ញៀវទេសចរជាតិនិងអន្តរជាតិ ជាមួយមន្ទីរទេសចរណ៍ខេត្តឧត្តរមានជ័យ ដែលកាន់កាប់នៅទីនោះ។ យើងនឹងប្រាប់ពីការបញ្ចប់សង្គ្រាមចុងក្រោយរបស់ខ្មែរក្រហម ការបែកបាក់ និងបញ្ចប់អង្គការចាត់តាំងរបស់ខ្មែរក្រហម និងមូលហេតុនៃបញ្ហាជាដើម»។ នេះជាការលើកឡើងរបស់លោក វ៉ាត់ ចំរើន។

បន្ទាប់ពីការរត់កម្សាន្ត៣គីឡូម៉ែត្រ គឺការដើរថ្មើរជើងចម្ងាយ៥គីឡូម៉ែត្រនៅលើជួរភ្នំដងរ៉ែកឆ្ពោះទៅកាន់តំបន់ប្រវត្តិសាស្ត្រចុងក្រោយនៃរបបខ្មែរក្រហម។ នៅទីនោះដែរ ក៏មានការសម្តែងសិល្បៈពាក់ព័ន្ធនឹងរបបខ្មែរក្រហមផងដែរ។ ការថ្មើរជើងនេះ ចេញដំណើរពីច្រកអន្តរជាតិជាំទៅកាន់ប៉ូយតាម៉ុក និងបញ្ចប់នៅមជ្ឈមណ្ឌលប្រវិត្តសាស្ត្រកម្ពុជា។

ព្រឹត្តិការណ៍រត់កម្សាន្ត និងថ្មើរជើងប្រវត្តិសាស្ត្រនេះរៀបចំដោយក្រសួងទេសចរណ៍ សហការជាមួយគណៈកម្មាធិការជាតិអូឡាំពិកកម្ពុជានិងរដ្ឋបាលខេត្តឧត្តរមានជ័យ៕