ជាតិ
សង្គមជាតិ
ភូមិចំនួន៤ នៅស្រុកមណ្ឌលសីមា បានរងការប៉ះពាល់ដោយសាររលកសមុទ្របោកបក់
× ភូមិចំនួន ៤ ដែលស្ថិតនៅតាមបណ្ដោយឆ្នេរបាក់ខ្លង ស្រុកមណ្ឌលសីមា ខេត្តកោះកុងបានរងការប៉ះពាល់ ដោយសាររលកធំៗបានបោកបក់មកលើ ដែលធ្វើឲ្យច្រាំងទប់ទឹកក៏ត្រូវទឹកវាយបំបាក់ផងដែរ ទើបជាហេតុធ្វើឱ្យទឹកហូរដល់ដល់ផ្លូវកំពុងតែធ្វើចរាចរណ៍។ បញ្ហានេះអាជ្ញាធរកំពុងធ្វើអន្តាគមន៍ និងបញ្ចៀសការកកស្ទះនៅតាមផ្លូវ ដែលរងការប៉ះពាល់។ នេះបើតាមការឱ្យដឹងពីលោក ហាក់ ឡេង អភិបាលស្រុកមណ្ឌលសីមា។
ថ្លែងប្រាប់សារព័ត៌មានថ្មីៗតាមទូរសព្ទនាព្រឹកនេះ លោក ហាក់ ឡេង បាននិយាយថា នៅពេលនេះរូបលោក និងអាជ្ញាធរនៅក្នុងមណ្ឌលសីមា កំពុងតែសម្រួលចរាចរណ៍ និងផ្អាករថតយន្តធុនធំឆ្លងកាត់សិន ពីព្រោះទឹកបានហូរដល់ផ្លូវ ដែលអាចធ្វើឱ្យខូចខាតផ្លូវបាន។ ប៉ុន្តែរថយន្តតូចៗអាចធ្វើដំណើរបានជាធម្មតា។
អភិបាលស្រុកមណ្ឌលសីមា បានបន្ថែមថា អាជីវករដែលលក់ដូរនៅតាមបណ្តោយឆ្នេរ ត្រូវបានជម្លៀសទៅទីទួលបណ្ដោះអាសន្ន ហើយយ៉ាងយូ២-៣ថ្ងៃ នឹងអាចបើកអាជីវកម្មដូចសភាពដើមវិញ។ «សម្រាប់បញ្ហានេះដែរមិនខុសគ្នាឡើយកាលពីឆ្នាំមុនៗ ក៏ធ្លាប់កើតមានបែបនេះដែរ»។ នេះការបញ្ជាក់ លោក ហាក់ ឡេង ដែលបានបន្ថែមថា ទឹកសមុទ្រថ្ងៃនេះអាចស្រកចុះ ហើយស្អែកនឹងមិនហក់ឡើងទៀតទេ។ ប៉ុន្តែបើទឹកនៅតែបន្តឡើងទៀត អាជ្ញាធរនៅតែបន្តធ្វើកិច្ចនេះទៀតរហូតដូចសភាពដើមវិញ។
លោក ហាក់ ឡេង បានសង្គត់ធ្ងន់ថា ការកើតឡើងរលកធំៗនេះបណ្ដាលមកពីចំហាយខ្យល់ពីប្រទេសជិតខាង(ថៃ) បានមកដល់កម្ពុជា ហើយការប៉ះពាល់នេះនៅតាមបណ្តាយឆ្នេរបាក់ខ្លងប្រមាណ ៥រយម៉ែត្រ។ ចំពោះសំរាមតូច-ធំ ឫដើមឈើដែលបានបាក់ហូរនៅលើឆ្នេរនោះ អាជ្ញាធរបានសម្អាត និងយកចេញអស់ហើយ។
យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម នៅថ្ងៃទី២មករា កម្ពុជាមានអាកាសធាតុត្រជាក់ ដោយសារជ្រលងសម្ពាធខ្ពស់ បានចាប់ផ្តើមចុះខ្សោយ និងនៅក្នុងសមុទ្រចិនខាងត្បូង មានកើតនូវព្យុះឈ្មោះប៉ាប៊ុក(PABUK) ប្រចាំឆ្នាំ២០១៩។ ព្យុះនេះ នឹងវិវត្តន៍ខ្លួនទៅជាព្យុះទីហ្វុង (TY PABUK) រួចបន្តដំណើរទៅភាគខាងត្បូងនៃប្រទេសថៃ។
ជាមួយគ្នានេះ ក្រសួងបានសូមឲ្យប្រជានេសាទ អ្នកធ្វើដំណើរតាមសមុទ្រ ជា ពិសេសកងទ័ពដែលឈរជើងនៅតាមបណ្តាកោះនានា សូមបង្កើនភាពប្រុងប្រយ័ត្នចំពោះបាតុភូតព្យុះនេះ ដែលអាចបង្កអាចមានភ្លៀងលាយឡំជាមួយខ្យល់បក់បោកខ្លាំង និងរលកសមុទ្រខ្ពស់ៗ ចាប់ពីថ្ងៃទី៣-៤ មករា ឆ្នាំ២០១៩៕
© រក្សាសិទ្ធិដោយ thmeythmey.com