ជាតិ
ពីនេះ ពីនោះ
ត្រីប៉ាសេអ៊ី ជាត្រីទន្លេមេគង្គដែលមានរសជាតិឆ្ងាញ់ និងតម្លៃខ្ពស់ ត្រីប៉ាសេអ៊ី។ រូបភាព៖ ឈុត ឈាណា / អច្ឆរិយភាពនៃទន្លេមេគង្គ
× គម្រោងអច្ឆរិយភាពនៃទន្លេមេគង្គ (Wonders of the Mekong) សូមណែនាំត្រីមានស្រកាមួយប្រភេទ ដែលរស់នៅក្នុងទឹកសាប ដែលមានរស់នៅដោយកន្លែងក្នុងអាងទន្លេមេគង្គ ក្នុងប្រទេសកម្ពុជា ឡាវ វៀតណាម និងថៃ។ ត្រីប៉ាសេអ៊ីពេញវ័យ រស់នៅផ្នែកខាងលើនៃអាងទន្លេមេគង្គ ខណៈត្រីប៉ាសេអ៊ី មិនទាន់ពេញវ័យ ធ្វើចរាចរចុះក្រោមអាងទន្លេ។ បន្ទាប់មក ពួកវាធ្វើចរាចរឡើងចុះតាមទន្លេមេ ក្នុងចំនួនដ៏ច្រើន។
ត្រីប៉ាសេអ៊ី មានឈ្មោះវិទ្យាសាស្ត្រ (Mekongina erythrospila) រស់នៅតាមតំបន់មានទឹកហូរលឿន និងមានថ្ម។ វាស៊ីស្លែ រុក្ខជាតិទឹក និងផ្លង់តុងជាអាហារ។ នៅក្នុងប្រទេសកម្ពុជា ត្រីប៉ាសេអ៊ី មានរស់នៅក្នុងខេត្តក្រចេះ ស្ទឹងត្រែង និងរតនគិរី ដែលមានទន្លេ (ស៣) ឆ្លងកាត់ គឺទន្លេសេសាន ទន្លេសេកុង និងទន្លេស្រែពក។ ចាប់ពីខែ វិច្ឆិកា ដល់ កុម្ភៈ ត្រីប្រភេទនេះ ធ្វើចរាចរផ្លាស់ទីចេញពីតំបន់កាំពី នៃស្រុកសំបូរ ក្នុងខេត្តក្រចេះ ឆ្ពោះទៅព្រំដែនឡាវ និងធ្វើចរាចរចុះមកវិញ នៅខែឧសភា ដល់កក្កដា។
ត្រីប៉ាសេអ៊ី ត្រូវបានគេកត់ត្រាចូលក្នុងបញ្ជីក្រហម IUCN Red List (Near Threatened) ក្នុងឆ្នាំ ២០១១ ជាប្រភេទត្រីកំពុងខិតជិតជាប្រភេទត្រីរងគ្រោះ។ បញ្ហាប្រឈមចំពោះ ត្រីប៉ាសេអ៊ី មានដូចជា ការប្រែប្រួលអាកាសធាតុ ការនេសាទហួសកម្រិត ការប្រើប្រាស់ឧបករណ៍ខុសច្បាប់ដោយប្រើចរន្តអគ្គិសនីឆក់ ដែលគេនិយមហៅថា ឆក់ក្តៅ ឆក់ត្រជាក់ ដែលជាឧបករណ៍នេសាទដ៏គ្រោះថ្នាក់បំផុតសម្រាប់មច្ឆជាតិ និងការសាងសង់ទំនប់វារិអគ្គីសនី សុទ្ធតែជាបញ្ហាប្រឈមដល់កំណើតពួកវា។ ទៅថ្ងៃអនាគត ប្រភេទត្រីចំនួននៅក្នុងប្រទេសកម្ពុជា អាចនឹងឈានទៅផុតពូជ បើពុំមានការចូលរួមពីមជ្ឈដ្ឋានទូទៅ ដើម្បីថែរក្សាការពារធនធានមច្ឆជាតិស្រុកយើងទាំងអស់គ្នាទេនោះ។
© រក្សាសិទ្ធិដោយ thmeythmey.com