អន្តរជាតិ
នយោបាយអន្តរជាតិ
លោក ស៊ី ជិនភីង ប្រាប់កងទ័ពចិនឲ្យត្រៀមខ្លួនប្រយុទ្ធក្នុងសមរភូមិគ្រប់ពេល
× ប្រធានាធិបតីចិន ស៊ី ជិនភីង បានបញ្ជាឲ្យកងទ័ពរំដោះប្រជាជនចិន ប្រឹងប្រែងពង្រឹងសមត្ថភាពដើម្បីប្រយុទ្ធ និងត្រូវប្រាកដថា ពួកគេត្រៀមខ្លួនរួចហើយដើម្បីចូលក្នុងសមរភូមិ។ បញ្ជានេះដាក់ចេញក្នុងកិច្ចប្រជុំជាមួយមន្ត្រីយោធាជាន់ខ្ពស់នៅថ្ងៃទី៤ ខែមករា។ បើតាមលោក ស៊ី ស្ថានការណ៍ពិភពលោកមិនទៀងទាត់ តម្រូវឲ្យយោធាចិនត្រូវបង្កើនកម្រិតគុណភាពរបស់ខ្លួន និងត្រូវប្រែប្រួលទៅតាមការវិវត្តជាក់ស្ដែងរបស់ប្រទេសជាតិផង។
ក្នុងកិច្ចប្រជុំគណៈកម្មការយោធាមជ្ឈិម លោក ស៊ី ជិនភីង ដែលជាប្រធានគណៈកម្មការនេះ បានប្រាប់មន្ត្រីយោធាកំពូលៗថា ពិភពលោកស្ថិតក្នុងដំណាក់កាលដែលប្រែប្រួលឆាប់រហ័ស ហើយចិនវិញក៏ស្ថិតក្នុងដំណាក់កាលសំខាន់នៃការអភិវឌ្ឍខ្លួនដែរ។ លោក ស៊ី ក៏ព្រមានពីការប្រថុយប្រថាន និងបញ្ហាប្រឈមុខដែលទាំងអាចប៉ាន់ស្មានបាន និងទាំងមិនអាចស្មានបាន ដែលកើនឡើងគួរឲ្យកត់សម្គាល់ផងដែរ។ នេះបើតាមការផ្សាយរបស់ទីភ្នាក់ងារព័ត៌មានរដ្ឋ Xinhua ។
ក្នុងន័យនេះ លោក ស៊ី ដែលជាប្រធានាធិបតីចិនដែរនោះ បានណែនាំឲ្យកងទ័ពចិនមានយុទ្ធសាស្ត្រថ្មីៗស្របតាមយុគសម័យថ្មី និងត្រូវស្វែងយល់ឲ្យបានច្បាស់ពីសន្តិសុខជាតិ ក៏ដូចជានិន្នាការនៃការអភិវឌ្ឍផងដែរ។ លើសពីនោះទៅទៀត យោធាចិន ក៏ត្រូវប្រឹងប្រែងឲ្យបានខ្លាំងក្លាក្នុងការត្រៀមខ្លួនប្រយុទ្ធ សំដៅសម្រេចឲ្យការងារដែលដាក់ដោយបក្ស និងប្រជាជន។
អគ្គមេបញ្ជាការកងទ័ពរំដោះប្រជាជនចិនរូបនេះ ក៏សង្កត់ធ្ងន់ពីសមត្ថភាពក្នុងការឆ្លើយតបឲ្យបានលឿន និងមានប្រសិទ្ធភាពទៅនឹងស្ថានភាពបន្ទាន់ ពង្រឹងសមត្ថភាពបញ្ជាប្រតិបត្តការយោធារួម បង្កើនឥទ្ធិពលយោធាសម័យថ្មី ក៏ដូចជាធ្វើលំហាត់យោធាក្រោមក្របខណ្ឌធ្វើសង្គ្រាមដែរ។ សម្រេចឲ្យបានគោលដៅនេះ លោក ស៊ី បង្គាប់ឲ្យបក្ស និងរដ្ឋាភិបាលទាំងថ្នាក់ជាតិ និងថ្នាក់ក្រោមជាតិ ត្រូវចូលរួមគាំទ្រយោធា និងការអភិវឌ្ឍវិស័យការពារជាតិ។
អ្វីគួរឲ្យកត់សម្គាល់នោះ លោក ស៊ី អគ្គលេខាធិការគណៈកម្មាធិការក៏បានចុះហត្ថលេខាលើបទបញ្ជាមួយ ដែលបង្កើតការហ្វឹកហាត់ជាប្រចាំក្នុងជួរកងទ័ព។ តាមបទបញ្ជានេះ កងទ័ពរំដោះប្រជាជនចិនត្រូវបង្កើតសមត្ថភាពប្រយុទ្ធ ហើយអង្គភាពទ័ពទាំងអស់ត្រូវមានវគ្គបណ្ដុះបណ្ដាលឲ្យទៀងទាត់ដើម្បីវាស់ស្ទង់សមត្ថភាពកងទ័ព។
«សមយុទ្ធយោធា ត្រូវធ្វើឡើងដោយផ្អែកលើសេណារីយោពិត និងលើស្ថានភាពស្មុគស្មាញ ព្រមទាំងមានការពង្រាយអាវុធគ្រប់ប្រភេទមកពីអង្គភាពផ្សេងៗ។» នេះជាការណែនាំក្នុងលិខិតដែលជាបញ្ជាទីមួយរបស់គណៈកម្មការយោធាមជ្ឈិមសម្រាប់ឆ្នាំ២០១៩ ៕
© រក្សាសិទ្ធិដោយ thmeythmey.com