អន្តរជាតិ
នយោបាយអន្តរជាតិ
លោក លី សៀនឡុង៖ ដើម្បីឲ្យប្រទេសជាតិជោគជ័យ ចំណេះដឹងតែមួយមុខគឺមិនគ្រប់គ្រាន់ទេ
× នាយករដ្ឋមន្ត្រីសិង្ហបុរី លី សៀនឡុង នៅថ្ងៃទី៥ មករា បាននិយាយថា សិស្សដែលកំពុងសិក្សានៅក្នុងសាលារៀននៅសិង្ហបុរី កំពុងត្រូវបានបណ្តុះបណ្តាលមិនត្រឹមតែចំណេះដឹង និងជំនាញដើម្បីអាចចិញ្ចឹមជីវិតខ្លួនឯងប៉ុណ្ណោះទេ។ ប៉ុន្តែពួកគេក៏ត្រូវបានសាលាជួយបង្ហាត់បង្រៀន ដើម្បីអភិវឌ្ឍបុគ្គលិកលក្ខណៈ និងគុណតម្លៃថែមទៀតផង។
លោកនាយករដ្ឋមន្ត្រី លី សៀនឡុង បានបញ្ជាក់ថា ដើម្បីឲ្យសិង្ហបុរីទទួលបានជោគជ័យបាននោះ មានត្រឹមតែចំណេះដឹងជ្រៅជ្រះ និងឧស្សាព្យាយាម នៅមិនទាន់គ្រប់គ្រាន់ទេ តែប្រជាជនសិង្ហបុរីទាំងអស់ក៏ត្រូវមានគុណតម្លៃដ៏មានសារសំខាន់ផងដែរ។ នេះជាលើកឡើងរបស់លោក លី សៀនឡុង នៅក្នុងកម្មវិធីប្រគល់រង្វាន់សិស្សពូកែនៅសាលាបឋមសិក្សាមួយឈ្មោះថា Townsville។ នេះបើតាមសារព័ត៌មាន Straits Times ។
បន្ថែមពីនេះ លោក លី សៀនឡុង បានបញ្ជាក់ទៀតថា សិស្សគ្រប់រូបត្រូវឈ្វេងយល់ពីពិភពលោកខាងក្រៅ និងស្គាល់ពីតម្លៃនៃសមាគមន៍ និងអត្តសញ្ញាណនៃប្រជាជាតិខ្លួន។ ហើយពួកគេក៏ត្រូវតែមានភាពភាពក្លៀវក្លា និងការតាំងចិត្តយ៉ាងមុតមាំផងដែរ ដើម្បីជម្នះភាពលំបាក, ការពារខ្លួនឯង និងជោគជ័យទៅមុខ។ ម្យ៉ាងវិញទៀត ក្នុងនាមជាសិស្ស ពួកគេត្រូវក្តោបយកឱកាសសិក្សាឲ្យបានច្រើនបំផុតទាំងចំណេះដឹង និងគុណតម្លៃ ពីគ្រូបង្រៀននិងមិត្តភក្តិរបស់ពួកគេ។
យោងតាមសារព័ត៌មានដដែលនេះ លោក លី សៀនឡុង ក៏លើកឡើងពីកំណែទម្រង់ប្រព័ន្ធអប់រំរបស់សិង្ហបុរីកាលពីថ្មីៗនេះ ដែលនឹងជួយឲ្យការសិក្សារៀនសូត្រ មានប្រសិទ្ធិភាពកាន់តែខ្លាំងថែមទៀត។ ទន្ទឹមនឹងគ្នានេះដែរ លោកក៏បានលើកទឹកចិត្តឲ្យឪពុកម្តាយរបស់សិស្ស ឈ្វេងយល់ពីអ្វីដែលរដ្ឋាភិបាលកំពុងព្យាយាមសម្រេច និងចូលរួមជួយគាំទ្រគោលដៅរបស់ក្រសួងផងដែរ។
គួរបញ្ជាក់ផងដែរ កំណែទម្រង់ប្រព័ន្ធអប់រំរបស់សិង្ហបុរីកាលពីថ្មីៗនេះគឺរួមមានដូចជា កាត់បន្ថយការដាក់បន្ទុកធ្ងន់ធ្ងរពេកលើលទ្ធផលសិក្សារបស់សិស្ស, កាត់បន្ថយពេលវេលាលើកម្មវិធីសិក្សា ដោយឲ្យសិស្សផ្តោតលើការសិក្សាបែបស៊ីជម្រៅ ព្រមទាំងជួយសិស្សឲ្យយល់ដឹងពីភាពទាក់ទងគ្នា រវាងមាតិកានៅក្នុងសៀវភៅ និងពិភពលោកខាងក្រៅថែមទៀតផង៕
Tag:
លីសៀនឡុង
សិង្ហបុរី
© រក្សាសិទ្ធិដោយ thmeythmey.com