អន្តរជាតិ
នយោបាយអន្តរជាតិ
សេអ៊ូល និងតូក្យូ បន្តផ្លែផ្កាដាក់គ្នាក្រោយមានការប្រឈមមុខគ្នារវាងនាវាចម្បាំង និងយន្តហោះល្បាត
×![]()
រដ្ឋាភិបាលក្រុងសេអ៊ូល និងរដ្ឋាភិបាលក្រុងតូក្យូ នៅមិនទាន់មានដំណោះស្រាយរួមជុំវិញឧប្បទ្ទវហេតុនៃការប្រឈមមុខគ្នារវាងនាវាចម្បាំងកូរ៉េខាងត្បូង និងយន្តហោះល្បាតរបស់ជប៉ុន ដែលបានកើតឡើងតាំងពីចុងឆ្នាំ២០១៨មកម្ល៉េះនៅឡើយនោះទេ។ ភាគីទាំងពីរ បន្តរក្សាជំហរមិនប្រែប្រួលក្នុងការការពារភាពត្រឹមត្រូវរបស់ខ្លួនក្នុងតំបន់ប្រឈមមុខគ្នា។
ក្រសួងការពារជាតិកូរ៉េខាងត្បូងនៅថ្ងៃ៤ មករា បានចេញផ្សាយឃ្លីបវីដេអូខ្លីមួយពាក់ព័ន្ធនឹងសកម្មភាពរបស់ខ្លួនក្នុងថ្ងៃមានឧប្បទ្ទហេតុនៃការប្រឈមុខគ្នារវាងកងទ័ពទាំងពីរ នៅថ្ងៃ២០ ធ្នូ ដោយថែមបានទាមទារឲ្យជប៉ុនបញ្ឈប់បំភាន់ការពិត និងសុំការអភ័យទោសពីកូរ៉េខាងត្បូងវិញ។ នេះបើយោងតាមការចុះផ្សាយរបស់ភ្នាក់ងារព័ត៌មាន Yonhap។
តាមការអះអាងរបស់អ្នកនាំពាក្យក្រសួងការពារជាតិកូរ៉េខាងត្បូង លោកស្រី Choi Hyun-soo ឃ្លីបវេឌីដេអូនេះ មានគោលដៅផ្តល់ពីអង្គហេតុពិតនៃហេតុការណ៍ ពោលគីបញ្ជាក់បង្ហាញថានាវាចម្បាំងទម្ងន់ ៣,២០០ តោន ប្រភេទ Gwanggaeto របស់កូរ៉េខាងត្បូង ពិតជាមិនបានបាញ់ភ្លើងរ៉ាដាគំរាមទៅកាន់យន្តហោះល្បាតរបស់ជប៉ុននោះទេ។ ហើយបេសកកម្មរបស់នាវាចម្បាំងកូរ៉េខាងត្បូង គឺជាបេសកកម្មមនុស្សធម៌ប៉ុណ្ណោះ។
លោកស្រីអ្នកនាំពាក្យ បន្ថែមថា ការចេញផ្សាយរបស់រដ្ឋាភិបាលកូរ៉េខាងត្បូង ក៏ដើម្បីជាការបកស្រាយទៅនឹងឃ្លីបវីដេអូរបស់ជប៉ុន ដែលបានចេញផ្សាយមួយសប្តាហ៍មុនដោយបានចោទប្រកាន់កូរ៉េខាងត្បូង ថា បានគំរាមកំហែងដល់កងទ័ពខ្លួន និងធ្វើឲ្យបណ្តាញសង្គមជាសកលរិះគន់កូរ៉េខាងត្បូងយ៉ាងខ្លាំង ក្រោយបានឃើញឃ្លីបវីដេអូរបស់ជប៉ុន។
ដើម្បីផ្សព្វផ្សាយ និងបកស្រាយពីការពិតនៃហេតុការនៃឧប្បទ្ទវហេតុនេះ កូរ៉េខាងត្បូង មានបំណងផលិតវីដេអូរបស់ខ្លួនដដែលនោះជាប្រាំមួយភាសាបន្ថែមទៀតលើវីដេអូដែលទើបតែចេញផ្សាយជាភាសាកូរ៉េ និងអង់គ្លេសហើយនោះ។ វីដេអូ ដែលកូរ៉េខាងត្បូង ត្រៀមផលិតនោះរួមមានជាភាសាជប៉ុន ចិន បារាំង អេស្ប៉ាញ រុស្ស៊ី និងអារ៉ាប់។
តាមភ្នាក់ងារព័ត៌មាន Yonhap នេះ គឺជារឿងចម្រូងចម្រាស់ដ៏ធ្ងន់ធ្ងរមួយហើយ ដែលរដ្ឋាភិបាលជប៉ុន និងរដ្ឋាភិបាលកូរ៉េខាងត្បូង មិនធ្លាប់កើតមាន។ កន្លងមក រដ្ឋាភិបាលទាំងពីរ ជាទម្លាប់មិនត្រូវរូវគ្នាតែលើរឿងប្រវត្តិសាស្ត្រ ដែលកើតឡើងក្នុងអំឡុងពេលសង្គ្រាមលោកប៉ុណ្ណោះ៕
Tag:
ជប៉ុន
កូរ៉េខាងត្បូង
© រក្សាសិទ្ធិដោយ thmeythmey.com
