នាយករដ្ឋមន្ត្រីវៀតណាម បេ្តជ្ញាប្រែក្លាយវៀតណាមជាប្រទេសអភិវឌ្ឍកសិកម្មល្អបំផុតលើលោកត្រឹម ១០ឆ្នាំ

អន្តរជាតិ

នយោបាយអន្តរជាតិ

នាយករដ្ឋមន្ត្រីវៀតណាម បេ្តជ្ញាប្រែក្លាយវៀតណាមជាប្រទេសអភិវឌ្ឍកសិកម្មល្អបំផុតលើលោកត្រឹម ១០ឆ្នាំ

06, Jan 2019 , 5:30 pm

រូបភាព

ដោយ:

រដ្ឋាភិបាលក្រុងហាណូយ បានប្តេជ្ញាចិត្តក្នុងការប្រែក្លាយប្រទេសរបស់ខ្លួនឲ្យទៅជាប្រទេសមានការអភិវឌ្ឍវិស័យកសិកម្មល្អបំផុតក្នុងចំណោមប្រទេសទាំង១៥លើពិភពលោកក្នុងរយៈពេល១ទសវត្សរ៍ទៅមុខ។ ក្រុងហាណូយ ហ៊ានអះអាងបែបនេះ ដោយមើលឃើញពីសមិទ្ធផលមួយឆ្នាំកន្លងមក និងសក្តានុពលកសិកម្មរបស់វៀតណាមដែរ។

នាឱកាសនៃការបូកសរុបលទ្ធផលការងារឆ្នាំ២០១៨ និងប្រកាសដាក់ការងារអាទិភាពឆ្នាំ២០១៩នៃក្រសួងកសិកម្ម និងអភិវឌ្ឍជនបទវៀតណាមនៅថ្ងៃ០៣ មករាកន្លងទៅ លោកនាយករដ្ឋមន្ត្រី Nguyễn Xuân Phúc បានមានការរំពឹងខ្ពស់លើការអភិវឌ្ឍវិស័យកសិកម្ម និងសុវត្ថិភាពចំណីវៀតណាម ដែលអាចធ្វើឲ្យរដ្ឋអាស៊ីអាគ្នេយ៍មួយក្លាយជាប្រទេសឈានមុខគេខាងវិស័យកសិកម្មលើពិភពលោក។

តាមការចុះផ្សាយរបស់សារព័ត៌មានវៀតណាម Vietnam News នាយករដ្ឋមន្ត្រីខាងលើ បានលើកឡើងពីសមិទ្ធផលគួរកត់សម្គាល់ក្នុងរយៈពេល១២ខែ ក្នុងឆ្នាំ២០១៨ ដែលរួមមានទាំងការទទួលបានចំណាត់ថ្នាក់ទីពីរ ក្នុងនាមជាប្រទេសនាំចេញផលិតផលកសិកម្មននៅអាស៊ីអាគ្នេយ៍, ការកសាងសង្វាក់ផលិតកម្ម និងសុវត្ថិភាពអាហារលើមុខទំនិញរាប់ពាន់មុខ និងបានរៀបចំវេទិកាសម្រាប់លើកកម្ពស់វិស័យកសិកម្មជូនដល់កសិករជាដើម។

បន្ថែមពីការលើកឡើងពីសមិទ្ធផលរបស់ប្រទេស លោកនាយករដ្ឋមន្ត្រី ក៏បានលើកយកបញ្ហាដែលត្រូវដោះស្រាយនៅក្នុងជំហានបន្ទាប់ដើម្បីធ្វើឲ្យវិស័យកសិកម្មវៀតណាមកាន់តែល្អប្រសើរ និងលេចធ្លោក្នុងឆាកអន្តរជាតិ។ បញ្ហាក្នុងវិស័យកសិកម្មដែលលោកបានគូសបញ្ជាក់រួមមានទាំងកម្លាំងពលកម្ម, ភាពមិនទាន់គ្រប់ជ្រុងជ្រោយនៃការអនុវត្តគោលនយោបាយកសិកម្មនៅតាមតំបន់ និងការបំពុលបរិស្ថានជាដើម។

លោកនាយករដ្ឋមន្ត្រី ថែមទាំងដាក់គោលដៅសម្រាប់ពេល ដប់ឆ្នាំទៅមុខ ដោយនឹងធ្វើឲ្យវិស័យកសិកម្មវៀតណាមស្ថិតនៅក្នុងចំណោមប្រទេស១៥ ដែលមានការអភិវឌ្ឍវិស័យកសិកម្មបំផុតរបស់ពិភពលោក។ ហើយដើម្បីធ្វើឲ្យចក្ខុវិស័យនេះ ក្លាយជាការពិតបាន លោកនាយករដ្ឋមន្ត្រី បានប្តេជា្ញធានាពីភាពល្អប្រសើរនៃប្រព័ន្ធច្បាប់ និងលុបបំបាត់បទបញ្ញតិ្តក្នុងវិស័យកសិកម្ម ដែលមានចរិកលក្ខណៈដើរថយក្រោយ និងថែមទាំងយកចិត្តទុកដាក់លើបច្ចេកវិទ្យាវិទ្យាសាស្ត្រផង។

ទាក់ទងនឹងច្បាប់និងបទបញ្ញត្តិ នាយករដ្ឋមន្ត្រីរូបនេះពន្យល់ថា វាជារឿងចាំបាច់ដែលវៀតណាមត្រូវ លើកស្ទួយការកែទម្រង់គម្រូអភិវឌ្ឍវិស័យកសិកម្មឡើងវិញ កំណត់ប្រភេទផលិតផលកសិកម្មចម្បងៗនៅថ្នាក់ជាតិ ខេត្ត និងថ្នាក់មូលដ្ឋាន។

ចំណុចបន្ទាប់ រដ្ឋាភិបាលត្រូវធានាឲ្យបាននូវប្រសិទ្ធភាពព្យាករណ៍ទីផ្សារកសិកម្ម ធានាតុល្យភាពនៃការផ្គត់ផ្គង់និងតម្រូវការ អភិវឌ្ឍទីផ្សារថ្មីសម្រាប់កសិកម្ម និងបន្តកសាងម៉ាកឬពាណិជ្ជនាមសម្រាប់ផលិតផលកសិកម្មវៀតណាមដូចជាអង្ករ, ត្រី, សាច់, បន្លែ និងផលិតផ្សេងទៀតដែរ។

ចុងក្រោយ គឺការបញ្ជៀប និងជំរុញការប្រើប្រាស់បច្ចេកវិទ្យាទំនើបទាំងជីវសាស្ត្រ និងវិទ្យាសាស្ត្រច្នៃប្រឌិតជាដើម ក្នុងបរិបទនៃសម័យបដិវត្តន៍ឧស្សាហកម្មជំនាន់ទីបួន (Industrial Revolution 4.0)។ បន្ថែមពីនោះ ការស្រាវជ្រាវ និងប្រើប្រាស់ប្រភេទទិន្នន័យ និងបញ្ញាសិប្បនិម្មិត (AI) ជារឿងអាទិភាពសម្រាប់ការអភិវឌ្ឍកសិកម្មវៀតណាមដូចគ្នា៕