ភ្នំពេញ៖ គណបក្សហ្វ៊ុនស៊ិនប៉ិច មិនទាន់ចរចាផ្លូវការពីគណបក្សខ្មែររួបរួមជាតិ បើសិនជាមានបំណងចង់រួមនយោបាយសាជាថ្មីពិតមែន។ ការលើកឡើងរបស់គណបក្សហ្វ៊ុនស៊ិនប៉ិចនេះ ធ្វើឡើងក្រោយពីលោក ញឹក ប៊ុនឆៃ ប្រកាសពីបំណងចង់បង្រួបបង្រួមអ្នករាជានិយមឡើងវិញ។
អ្នកនាំពាក្យគណបក្សហ្វ៊ុនស៊ិនប៉ិចលោក ណុប សុធារិទ្ធ ដែលបានដឹងពីដំណឺងនេះដែរនោះ បាននិយាយថា គណបក្សលោកមិនបដិសេធបំណងរបស់លោក ញឹក ប៊ុនឆៃ ដែលចង់រួបរួមអ្នកនយោបាយរាជានិយមវិញឡើយ។ ដ្បិតគណបក្សទាំងពីរធ្លាប់បែកគ្នាពីរលើកហើយក្តី ប៉ុន្តែគណបក្សហ្វ៊ុនស៊ិនប៉ិច ក៏ប្រកាសមិនប្រកាន់ទាស់នឹងរឿងអតីតកាលនេះដែរ។
ថ្លែងប្រាប់សារព័ត៌មានថ្មីៗ លោក ណុប សុធារិទ្ធ បាននិយាយដូច្នេះថា៖«មកដល់ពេលនេះ យើងមិនទាន់បានទទួលការស្នើសុំជាផ្លូវការពីគណបក្សខ្មែររួបរួមជាតិនៅឡើយទេ។ ប៉ុន្តែគណបក្សយើងក៏មិនជំទាស់បំណងគណបក្សដែលចង់រួបរួមជាគណបក្សយើងដែរ។ គណបក្សយើងបើកចំហរទទួលយកគ្រប់គណបក្សនយោបាយទាំងអស់ ដែលចង់រួមរស់ជាមួយយើង»។
កាលពីថ្ងៃទី៥ មករា លោក ញឹក ប៊ុនឆៃ ប្រធានគណបក្សខ្មែររួបរួមជាតិ បាននិយាយថា ផ្ទៃក្នុងគណបក្សទាំងពីរ ចង់ឲ្យមានការរួបរួមគ្នាណាស់ ហើយចំណុចមួយចំនួន ក៏មានការជជែកគ្នាខ្លះដែរ ប៉ុន្តែនៅជាប់គាំងត្រង់ សម្ដេចនរោត្តម រណឫទ្ធិ នៅប្រឈួនប៉ុណ្ណោះ។
ប្រធានគណបក្សខ្មែររួបរួមជាតិ បានថ្លែងនៅក្នុងពិធីជួបសំណេះសំណាលជាមួយសមាជិកក្រុមប្រឹក្សាឃុំ -សង្កាត់គណបក្ស យ៉ាងដូច្នេះថា៖«ការរួបរួមរវាងគណបក្សទាំងពីរ គឺចំនួនបីដងហើយ ប៉ុន្តែលើកនេះ រួបរួមទៀត គណបក្សខ្មែររួបរួមជាតិ ចង់បានណាស់ការរួបរួមសាមគ្គីគ្នា រវាងអ្នកដែលស្រលាញ់រាជានិយមដែលធ្លាប់នៅជាមួយគ្នា ជាពិសេសគណបក្សហ្វ៊ុនស៊ិនប៉ិច និងគណបក្សខ្មែររួបរួមជាតិ។ ហើយការរួបរួមគ្នានេះ គណបក្សខ្មែររួបរួមជាតិ ស្វាគមន៍ និងមិនជំទាស់ចំពោះគោលការណ៍រួបរួមនេះទេ»។
បើតាមលោក ញឹក ប៊ុនឆៃ ក្រៅពីអ្នកចង់ឲ្យមានការរួបរួមគ្នា ក៏អ្នកខ្លះទៀតមិនចង់ឲ្យមានការរួបរួមគ្នាដែរ។ ប៉ុន្តែបញ្ហានេះ គណបក្សលោកនឹងព្យាយាមសម្រួលសម្រួល ដោយលោក សង្ឃឹមថា ដំណើរការរួបរួមគ្នាឡើងវិញនេះ នឹងអាចលេចចេញជារូបរាង មុនការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ នាខែឧសភា ឆ្នាំ២០១៩ ខាងមុខនេះ។
ការរួបរួមគ្នាធ្វើទៅបានលុះត្រាតែមានការសម្រេចពីសម្ដេចក្រុមព្រះ។ សម្ដេចក្រុមព្រះកំពុងសម្រាកព្យាបាលព្រះកាយនៅក្រៅប្រទេសនៅឡើយ ប៉ុន្តែព្រះរាជសុខភាពព្រះអង្គ បានធូរស្បើយច្រើនហើយ។ ព្រះអង្គ នឹងយាងត្រឡប់មកកម្ពុជាវិញ នាពេលឆាប់ៗខាងមុខនេះ។ នេះបើតាមអ្នកនាំពាក្យគណបក្សហ្វ៊ុនស៊ិនប៉ិច លោក ណុប សុធារិទ្ធ។
គួរបញ្ជាក់ថា ប្រធានគណបក្សខ្មែររួបរួម លោក ញឹក ប៊ុនឆៃ ធ្លាប់បែកបាក់ជាមួយសម្ដេចក្រុមព្រះ ប្រធានគណបក្សហ្វ៊ុនស៊ិនប៉ិច កាលពីឆ្នាំ២០០៦ ដោយកាលណោះសម្ដេចនរោត្តម រណឫទ្ធិ បានចេញទៅបង្កើតគណបក្សរាជានិយមថ្មីមួយទៀត។ ប៉ុន្តែការបែកបាក់គ្នានេះ ក៏មានការបង្រួបបង្រួមគ្នាវិញនៅឆ្នាំ២០១៥ ដោយសម្ដេចក្រុមព្រះ យាងចូលដឹកនាំគណបក្សហ្វ៊ុនស៊ិនប៉ិចវិញ ។ ទំនាក់ទំនងរវាងលោក ញឹក ប៊ុនឆៃ និងសម្ដេចក្រុមព្រះ ក៏បានបង្កើតបែកបាក់ម្ដងទៀត នៅឆ្នាំ២០១៦ ដោយលោក ញឹក ប៊ុនឆៃ សម្រេចចាកចេញមកបង្កើតគណបក្សខ្មែររួបរួមជាតិ៕