កីឡាជាតិ
ជាតិ
កីឡាករ ធឿន ធារ៉ា (ខៀវ)ប្រើជើងឆ្វេងទាត់កីឡាករថៃ
×![]()
អ្នកលេងគុនខ្មែរ ធឿន ធារ៉ា បានផ្តួលកីឡាករថៃ Seuafai Sor-Saksit ឲ្យសន្លប់ក្នុងទឹកទី១ នាការប្រកួត Max Muay Thai កាលពីយប់ថ្ងៃទី៦ មករា។ ជ័យជម្នះនេះ ជួយឲ្យរូបគេ ស្តារប្រជាប្រិយភាពឡើងវិញ ក្រោយបាត់មុខមួយរយៈពីសង្វៀន។
កីឡាករ ធឿន ធារ៉ា ដែលរបូតតំណែងពីការប្រកួតគូឯក ដោយសារការអាក់ខានឡើងសង្វៀន បានធ្វើឲ្យកក្រើកសង្វៀន Max Muay Thai តាមរយៈការផ្តួលកីឡាករថៃ Seuafai Sor-Saksit ឲ្យសន្លប់ក្នុងទឹកទី១ សម្រាប់ការត្រឡប់មកកាន់សង្វៀននេះសាជាថ្មី។ សម្រាប់ការផ្តួលកីឡាករថៃនេះដែរ អ្នកលេងគុនខ្មែរមកពីខេត្តព្រៃវែងរូបនេះ ប្រើពេលតែជាង២នាទីប៉ុណ្ណោះ។
នាការប្រកួតលើទឹកដីថៃ កាលពីយប់ថ្ងៃទី៦ ខែមករា ឆ្នាំ២០១៩ ធារ៉ា បានចូលវាយសន្ធប់ និងប្រើកែងឆ្វេងជាបន្តបន្ទាប់ចំនួន៥កែងមកលើផ្ទៃមុខកីឡាករថៃ ដើម្បីឲ្យអាជ្ញាកណ្តាលរាប់ម្តងនៅពាក់កណ្តាលទឹកទី១។ ក្រោយអាជ្ញាកណ្តាលអនុញ្ញាតឲ្យប្រកួតបន្ត ធឿន ធារ៉ា បានលោតប្រើជើងស្តាំធាក់ផ្ទៃមុខកីឡាករថៃ ធ្វើឲ្យអាជ្ញាកណ្តាលរាប់ម្តងទៀត និងបញ្ឈប់ក្នុងពេលនោះតែម្តង។
ធឿន ធារ៉ា(ខៀវ)
ជ័យជម្នះនេះ អាចជួយឲ្យប្រជាប្រិយភាពដែលធ្លាក់ចុះមួយរយៈរបស់កីឡាករ ធឿន ធារ៉ា មានភាពល្អប្រសើរឡើងវិញផងដែរ។ ធារ៉ា បានអាក់ខានឡើងសង្វៀន Max Muay Thai ប្រមាណជា៦ខែ បន្ទាប់ពីរូបគេប្រកួតចាញ់កីឡាករថៃ Kitti សិស្សប្អូនកីឡាករ សែនស្ថាន (Sen Satharn) កាលពីថ្ងៃទី៦ ខែឧសភា ឆ្នាំ២០១៨៕
Tag:
ប្រដាល់គុនខ្មែរ
ធឿន ធារ៉ា
© រក្សាសិទ្ធិដោយ thmeythmey.com
