ច្បាប់ផ្តល់សិទ្ធិនយោបាយដល់ក្រុមប្រឆាំង ត្រូវបានព្រះមហាក្សត្រ ប្រកាសឲ្យប្រើហើយ

ជាតិ

នយោបាយជាតិ

ច្បាប់ផ្តល់សិទ្ធិនយោបាយដល់ក្រុមប្រឆាំង ត្រូវបានព្រះមហាក្សត្រ ប្រកាសឲ្យប្រើហើយ

08, Jan 2019 , 9:01 am

រូបភាព

ដោយ: ថ្មីៗ

ព្រះមហាក្សត្រ បានចេញព្រះរាជក្រមកាលពីថ្ងៃទី២ ខែមករា ឆ្នាំ២០១៩នេះ ដើម្បីប្រកាសឲ្យប្រើប្រាស់នូវមាត្រា៤៥ថ្មី (ស្ទួន១) ដែលក្លាយមកពីមាត្រា៤៥ថ្មី (ស្ទួន) នៃច្បាប់ស្តីពីគណបក្សនយោបាយ។

កាលពីនៅអនុវត្តមាត្រា៤៥ថ្មី (ស្ទួន) អ្នកនយោបាយណា ដែលជាប់បម្រាមរបស់តុលការកំពូល គឺត្រូវអស់សិទ្ធិរយៈពេល៥ឆ្នាំ ក្នុងការធ្វើនយោបាយ ហើយមិនអាចតវ៉ាបានឡើយ។ ប៉ុន្តែ មាត្រា៤៥ថ្មី (ស្ទួន១) បានកែប្រែត្រង់ចំណុច។

បើតាមមាត្រា៤៥ថ្មី (ស្ទួន១) អ្នកដែលជាប់បម្រាម អាចមានឱកាសបានទទួលសិទ្ធិនយោបាយវិញ មុនកាលកំណត់របស់តុលាការកំពូល។ មាត្រានេះ បានផ្តល់សិទ្ធិឲ្យនាយករដ្ឋមន្ត្រី ក្នុងការថ្វាយសំណើទៅព្រះមហាក្សត្រ ដើម្បីព្រះអង្គ ប្រទានសិទ្ធិនយោបាយដល់អ្នកជាប់បម្រាមទាំងនោះ។

នាយករដ្ឋមន្ត្រី បានលើកឡើងថា បើចង់បានសិទ្ធិចូលធ្វើនយោបាយវិញ អតីតអ្នកប្រឆាំង ត្រូវធ្វើសំណើជាលក្ខណៈបុគ្គល។

ចំណែក លោក សម រង្ស៊ី បានហាមអ្នកទាំងនោះ មិនឲ្យធ្វើសំណើ។ លោក ប្រាប់ថា ត្រូវរួមគ្នាទាមទារឲ្យដោះលែងលោក កឹម សុខា ជាមុនសិន ហើយចាំគិតគូរពីរឿងផ្សេងទៀត។

មកដល់ពេលនេះ ក្នុងចំណោមអតីតអ្នកប្រឆាំងជាង១០០នាក់ ដែលជាប់បម្រាម មានតែ២នាក់ប៉ុណ្ណោះ គឺលោក គង់ គាំ និង លោក គង់ បូរ៉ា ដែលប្រកាសថា នឹងធ្វើសំណើទៅរដ្ឋាភិបាល ដើម្បីសុំសិទ្ធិនយោបាយវិញ៕