អន្តរជាតិ
នយោបាយអន្តរជាតិ
បងធំអាស៊ាន ឥណ្ឌូណេស៊ីចូលកាន់តំណែងសមាជិកក្រុមប្រឹក្សាសន្តិសុខអង្គការសហប្រជាជាតិ
× ឥណ្ឌូណេស៊ី ជាបងធំអាស៊ាន និង ប្រទេសតំណាងតំបន់បួនផ្សេងទៀត បានចូលកាន់តំណែងជាសមាជិកមិនអចិន្ត្រៃយ៍របស់ក្រុមប្រឹក្សាសន្តិសុខអង្គការសហប្រជាជាតិជាផ្លូវការសប្តាហ៍មុន។ តាមរយៈតំណែងនេះ ឥណ្ឌូណេស៊ី មានសិទ្ធិ និងអំណាចក្នុងការសម្រេចការងារសន្តិសុខ និងសន្តិភាពរបស់ពិភពលោក។
គិតចាប់ពីថ្ងៃ១ មករា ឆ្នាំ២០១៩ ដល់ថ្ងៃ៣១ ធ្នូ ២០២០ ឥណ្ឌូណេស៊ី អាល្លឺម៉ង់ ប៊ែលហ្ស៊ិក អាហ្វ្រិកខាងត្បូង និងសាធារណរដ្ឋដូមីនិក ដែលជាតំណាងប្រទេសមកតំបន់ខុសៗគ្នា នឹងត្រូវចូលរួមក្នុងការងាររក្សាសន្តិភាព និងសន្តិសុខអន្តរជាតិ ក្នុងនាមជាសមាជិកមិនអចៃន្ត្រយ៍របស់ក្រុមប្រឹក្សាសន្តិសុខអង្គការសហប្រជាជាតិ ដែលជាស្ថាប័នដ៏មានឥទ្ធិពលបំផុតលើពិភពលោក។
តាមសេចក្តីថ្លែងការណ៍របស់តំណាងអចិន្ត្រៃយ៍របស់ឥណ្ឌូណេស៊ីប្រចាំអង្គការសហប្រជាជាតិ ការគាំទ្រដ៏មហិមា ដែលឥណ្ឌូណេស៊ី ទទួលបាន បង្ហាញឲ្យឃើញថា សហគមន៍អន្តរជាតិ មានទំនុកចិត្តការទូត និងជំហរ និងគោលនយោបាយបើកចំហរ និងសកម្មរបស់ឥណ្ឌូណេស៊ី ដែលបានកសាងកន្លងមកក្នុងការរក្សាសន្តិភាពពិភពលោក។
សូមជម្រាបថា មិនមែនគ្រប់រដ្ឋសមាជិករបស់អង្គការសហប្រជាជាតិ សុទ្ធតែមានឱកាសក្លាយជាសមាជិករបស់ក្រុមប្រឹក្សាសន្តិសុខអង្គការសហប្រជាជាតិនោះទេ ពោលគឺដើម្បីក្លាយជាសមាជិកអង្គភាពមួយនេះ តម្រូវឲ្យឆ្លងកាត់ការបោះឆ្នោតផ្តល់សេចក្តីទុកចិត្តពីសមាជិកទាំងអស់។ អាចនិយាយបានថា រដ្ឋដែលអាចមានឱកាសក្លាយជាសមាជិករបស់ក្រុមប្រឹក្សា ត្រូវមានសកម្មភាពសកម្មក្នុងកិច្ចការអន្តរជាតិ ពិសេសលើបញ្ហាសន្តិសុខ និងសន្តិភាព និងមានកេរ្តិ៍ឈ្មោះល្អក្នុងឆាកអន្តរជាតិផងដែរ។
ក្នុងចំណោមប្រទេសអាស៊ាន ឥណ្ឌូណេស៊ី គឺជាសមាជិកមួយ ដែលធ្លាប់កាន់តំណែងនេះ។ តាមរបាយការណ៍ ឥណ្ឌូណេស៊ី ធ្លាប់កាន់តំណែងនេះបីដងរួចមកហើយក្នុងឆ្នាំ ១៩៧៣-១៩៧៤, ១៩៩៥-១៩៩៦ និង ២០០៧-២០០៨។ រដ្ឋអាស៊ានផ្សេងទៀត ដែលធ្លាប់កាន់តំណែងនេះ រួមមាន ម៉ាឡេស៊ី
ហ្វីលីពីន សិង្ហបុរី ថៃ និង វៀតណាម ៕
© រក្សាសិទ្ធិដោយ thmeythmey.com