ជាតិ
សង្គមជាតិ
មហាផ្ទៃ បង្កើតក្រុមការងារ ដើម្បីសិក្សាពីការបើកច្រកទ្វារព្រំដែន លោក សុខ ផល រដ្ឋលេខាធិការក្រសួងមហាផ្ទៃ ទទួលបន្ទុកជាប្រធានក្រុមការងារដើម្បីសិក្សា និងពិភាក្សាជំរុញកិច្ចដំណើរការបើកច្រកទ្វារព្រំដែន
× សម្តេចឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានចេញសេចក្តីសម្រេចមួយ នៅថ្ងៃទី ៨ ខែ មករា ឆ្នាំ២០១៩ ស្តីពី ការបង្កើតក្រុមការងារ ដើម្បីសិក្សា និងពិភាក្សាជំរុញកិច្ចដំណើរការបើកច្រកទ្វារព្រំដែន រវាងរដ្ឋាភិបាលកម្ពុជា និងបណ្តាប្រទេសជាប់ព្រំដែន។
រដ្ឋលេខាធិការក្រសួងមហាផ្ទៃ លោក សុខ ផល ទទួលបន្ទុកជាប្រធាន និងលោក ឡាំ ជា ជាអនុប្រធាន។ សមាជិកនៃក្រុមការងារនេះ មានលោកអនុរដ្ឋលេខាធិការ ប៉ូលី ដា លោក ប្រាក់ សំអឿន អគ្គនាយករដ្ឋបាល លោក គៀត ច័ន្ទថារិទ្ធ អគ្គនាយកអន្តោប្រវេសន៍ លោក ហ៊ូ សាគុណ អគ្គស្នងការរងនគរបាលជាតិ លោក សួស ប្រាថ្នា អគ្គនាយករងទទួលបន្ទុកជាប្រធាននាយកដ្ឋានកិច្ចការរដ្ឋបាលរាជធានី ខណ្ឌ និងស្រុក លោក ពុធ សុផាត អគ្គលេខាធិការរងនៃក្រសួងមហាផ្ទៃ និង លោក ទ្រី សុខហេង ប្រធានក្រុមប្រឹក្សានីតិកម្ម។ ចំណែកអភិបាលខេត្ត ដែលនៅជាប់ព្រំដែន ក៏ត្រូវរាប់បញ្ចូលជាសមាជិកនៃក្រុមការងារនេះផងដែរ។
យោងតាមសេចក្តីសម្រេច ក្រុមការងារនេះ ទទួលខុសត្រូវ និងអនុវត្តលើការស្រាវជ្រាវលិខិតបទដ្ឋានគតិយុត្ត និងឯកសារពាក់ព័ន្ធ ស្តីពីការសម្រេចបើកច្រកទ្វារព្រំដែន ដែលបានព្រមព្រៀងរវាងរដ្ឋាភិបាលកម្ពុជា និងបណ្តាប្រទេសជាប់ព្រំដែន និងការងារផ្សេងៗទៀតដែលទាក់ទងនឹងការបើកច្រកទ្វារព្រំដែន៕
© រក្សាសិទ្ធិដោយ thmeythmey.com