កីឡាជាតិ
ជាតិ
វិសាខាប៉ះអតីតក្រុមរបស់ វឌ្ឍនាកា Pahang FA នាជំនួបមិត្តភាពថ្ងៃនេះ
× ក្រុមកីឡាបាល់ទាត់វិសាខា ត្រូវប្រជែងជាមួយអតីតក្រុមរបស់កីឡាករ ចាន់ វឌ្ឍនាកា Pahang FA នាជំនួបមិត្តភាពអន្តរជាតិ នៅម៉ោង៥រសៀលថ្ងៃទី៨ ខែមករា ឆ្នាំ២០១៩ នៅទីលាន Buriram Training Centre ក្នុងខេត្តបូរីរ៉ាមប្រទេសថៃ។ នេះជាការប្រកួតបើកឆាកសម្រាប់វិសាខា ដើម្បីត្រៀមមុនបើករដូវកាលថ្មីនៃពានរង្វាន់ក្របខណ្ឌមិត្តហ្វូនខេមបូឌានលីគ។
ដើម្បីត្រៀមប្រជែងដណ្តើតជើងឯកពានរង្វាន់សម្តេច ហ៊ុន សែន និងក្របខណ្ឌមិត្តហ្វូនខេមបូឌានលីគរដូវកាលឆ្នាំ២០១៩ ក្រុមវិសាខាបានចេញទៅបោះជំរំហ្វឹកហាត់នៅប្រទេសថៃ ដែលធ្វើចន្លោះពីថ្ងៃទី៧-១៨ ខែមករា ឆ្នាំ២០១៩។ ក្នុងអំឡុងពេលបោះជំរំហ្វឹកហាត់នេះដែរ វិសាខា គ្រោងប្រកួតមិត្តភាពជាបន្តបន្ទាប់ជាមួយក្រុមមានមូលដ្ឋានក្នុងប្រទេសថៃ និងមកពីលីគផ្សេងៗ។
ជាក់ស្តែងនៅម៉ោង៥រសៀលថ្ងៃទី៨ ខែមករា ឆ្នាំ២០១៩ ក្រុមលេខ៣នៃពានរង្វាន់ក្របខណ្ឌលីគកំពូលមួយនេះ ត្រូវប៉ះជាមួយក្រុម Pahang FA ដែលជាអតីតក្រុមរបស់កីឡាករ ចាន់ វឌ្ឍនាកា នៃក្របខណ្ឌលីគកំពូលម៉ាឡេស៊ី នាជំនួបមិត្តភាពអន្តរជាតិនៅទីលាន Buriram Training Centre ក្នុងខេត្តបូរីរ៉ាមប្រទេសថៃ។
ក្រៅពីវិសាខា ក្រុមភ្នំពេញក្រោន និងណាហ្គាវើល ក៏កំពុងបោះជំរំហ្វឹកហាត់ពង្រឹងសមត្ថភាពនៅប្រទេសថៃ ដើម្បីត្រៀមប្រជែងក្នុងពានរង្វាន់ផ្សេងៗទៀតផងដែរ។ ក្នុងនោះណាហ្គាវើល ត្រៀមប្រជែងពានរង្វាន់ AFC Cup នៅខែកុម្ភៈ ដោយក្រុមនេះស្ថិតនៅក្នុងពូល F ជាមួយក្រុមមកពីវៀតណាម សិង្ហបុរី និងមីយ៉ាន់ម៉ា។ ចំណែកភ្នំពេញក្រោនប្រជែងក្នុងពានរង្វាន់មុនបើករដូវកាល Leo Pre-Season Cup 2019។
Tag:
បាល់ទាត់
វិសាខា
Pahang FA
© រក្សាសិទ្ធិដោយ thmeythmey.com