ប្រធានធនាគារពិភពលោក លោក ជីម យ៉ុងគីម (Jim Yong Kim) ដែលខ្វែងគំនិតជាមួយគោលនយោបាយស្តីពីបម្រែបម្រួលអាកាសធាតុរបស់រដ្ឋបាលលោកត្រាំ បានប្រកាសនៅថ្ងៃចន្ទទី៧ មករាថា នឹងចុះចេញពីតំណែងនាដើមខែកុម្ភៈ។ អ្វីដែលគួរឲ្យភ្ញាក់ផ្អើលនោះ ការសម្រេចចិត្តនេះគឺធ្វើឡើង មុនពេលបញ្ចប់អាណត្តិលើកទីពីររបស់លោក ដែលនៅសល់ជាង៣ឆ្នាំទៀតឯណោះ ពោលគឺនៅឆ្នាំ២០២២។
លោក ជីម យ៉ុងគីម ត្រូវបានតែងតាំងជាលើកដំបូងដោយរដ្ឋបាលលោក បារ៉ាក់ អូប៉ាម៉ា ក្នុងឆ្នាំ២០១២ តាមការស្នើសុំរបស់អតីតរដ្ឋមន្ត្រីការបរទេសអាមេរិក លោកស្រី Hillary Clinton។ ក្រោយមក លោកគីម ត្រូវបានតែងតាំងជាថ្មីដោយលោក អូបាម៉ា ក្នុងឆ្នាំ២០១៦ ដើម្បីកាន់តំណែងក្នុងអាណត្តិទីពីរ ដែលមានសុពលភាពដល់ឆ្នាំ២០២២។
យោងតាមសេចក្តីថ្លែងការណ៍របស់ធនាគារពិភពលោក លោក ជីម វ័យ ៥៩ឆ្នាំ បានបញ្ជាក់ថា នេះពិតជាកិត្តិយសដ៏ធំធេងបំផុតសម្រាប់លោក ដែលបានកាន់តំណែងជាប្រធានស្ថាប័នដ៏សំខាន់មួយ។ ពោរពេញទៅដោយអារម្មណ៍យ៉ាងមុតមាំ លោកបានប្តេជ្ញាបំពេញបេសកម្ម ក្នុងគោលដៅដើម្បីបញ្ចប់ភាពក្រីក្រក្នុងមួយជីវិតរបស់លោក។
ក្រោយចាកចេញពីតំណែងនេះ លោក គីម នឹងចូលរួមជាមួយក្រុមហ៊ុនមួយ ដែលផ្តោតសំខាន់លើការជំរុញការវិនិយោគហេដ្ឋារចនាសម្ព័ន្ធនៅក្នុងបណ្តាប្រទេសកំពុងអភិវឌ្ឍ។ នេះបើតាមការបញ្ជាក់របស់ធនាគារពិភពលោក ដោយពុំបានផ្តល់នូវព័ត៌មានលម្អិតលើតួនាទីនេះឡើយ។ លោកស្រី Kristalina Georgieva ដែលបានក្លាយជានាយកប្រតិបត្តិធនាគារពិភពលោក ២០១៧ នឹងចូលកាន់តំណែងជាប្រធានស្តីទីនៃធនាគារពិភពលោក។
យោងតាមសេចក្តីថ្លែងការណ៍ដដែល ធនាគារពិភពលោក បានបញ្ជាក់ថា ខ្លួននឹងចាប់ផ្តើមដំណើរការនៃការតាំងតែងប្រធានថ្មីក្នុងពេលឆាប់ៗខាងមុខនេះ។ មែនទែនទៅ ការបោះឆ្នោតជ្រើសរើសប្រធានធនាគារពិភពលោក ត្រូវធ្វើឡើងនៅក្នុងដំណើរការជាផ្លូវការមួយ ដែលបណ្តារដ្ឋសមាជិកមានចំណែកបោះឆ្នោតខុសៗគ្នា។ ប៉ុន្តែសហរដ្ឋអាមេរិក ដែលមានចំណែកបោះឆ្នោតធំជាងគេ ប្រមាណ១៦ភាគរយនៃសំឡេងឆ្នោតសរុប មានឥទ្ធិពលខ្លាំងទៅលើការសម្រេចចិត្តនេះ។ ជាប្រពៃណី តំណែងនេះ ត្រូវជ្រើសរើសដោយអាមេរិក និងភាគច្រើនជាជនជាតិអាមេរិក។
ទាក់ទិននឹងការសម្រចចិត្តលាលែងពីតំណែងនេះ គេសង្ស័យថា ក៏ព្រោះតែគោលជំហររបស់លោកគីម ពាក់ព័ន្ធនឹងបញ្ហាបម្រែបម្រួលអាកាសធាតុ។ បើទោះបីលោក ជីម បានពុំមានការប៉ះទង្គិចជាសាធារណៈណាមួយជាមួយលោកប្រធានាធិបតី ដូណាល់ ត្រាំ ក៏ដោយក្តី ប៉ុន្តែគោលនយោបាយរបស់លោកហាក់បីមានភាពចម្រូសចម្រាស ជាមួយនឹងគោលនយោបាយទប់ទល់ទៅនឹងបម្រែបម្រួលអាកាសធាតុរបស់លោក ត្រាំ ។
តួយ៉ាង ក្រោមការដឹកនាំរបស់លោកគីម ធនាគារពិភពលោក បានជំរុញការផ្តល់ហិរញ្ញវត្ថុលើគម្រោងថាមពលបៃតង និងបានបញ្ចប់ការគាំទ្ររបស់ខ្លួនលើគម្រោងថាមពលធ្យូងថ្មនានា ដែលផ្ទុយទៅនឹងការសន្យារបស់លោកត្រាំ ក្នុងការសង្គ្រោះឧស្សាហកម្មធ្យូងថ្មអាមេរិកឡើងវិញនោះ។ កាលពីខែមុន ធនាគារពិភពលោក ក៏បានប្រកាសថា ខ្លួននឹងវិនិយោគប្រាក់ប្រមាណ២០០ពាន់លានដុល្លារ ក្នុងគោលដៅប្រយុទ្ធប្រឆាំងទៅនឹងបម្រែបម្រួលអាកាសធាតុ ដែលមានរយៈពេល៥ឆ្នាំថែមទៀតផង។
មួយវិញទៀត ក្នុងខែមេសា ឆ្នាំ២០១៨ លោក ជីម បានរងសម្ពាធយ៉ាងខ្លាំងពីរដ្ឋបាលលោក ត្រាំ ជុំវិញការផ្តល់កម្ចីទៅកាន់ប្រទេសចិន។ ក្រោយមក ធនាគារពិភពលោកបានយល់ព្រមផ្លាស់ប្តូររចនាសម្ព័ន្ធផ្តល់កម្ចីរបស់ខ្លួន ក្នុងគោលបំណងទទួលមូលធនបន្ថែមពីសហរដ្ឋអាមេរិក ក្នុងទំហំទឹកប្រាក់ប្រមាណ១៣ពាន់លានដុល្លារ។ ក្រោមលក្ខណៈថ្មីដែលធនាគារពិភពលោកបានកំណត់នោះ គេយល់ឃើញថា ចិននឹងមិនអាចទទួលបានប្រាក់កម្ចីទៀតឡើយពីធនាគារពិភពលោក។
កើតនៅរដ្ឋធានីសេអ៊ូល កូរ៉េខាងត្បូង ក្នុងឆ្នាំ១៩៥៩ លោក ជីម យ៉ូងគីម បានធ្វើអន្តោប្រវេសន៍ជាមួយគ្រួសារលោកទៅកាន់សហរដ្ឋអាមេរិក នៅអាយុ៥ឆ្នាំ។ លោក គីម បានបញ្ចប់ការសិក្សាថ្នាក់អនុបណ្ឌិតនៅសាលាវិជ្ជសាស្ត្រ Harvard ក្នុងឆ្នាំ១៩៩១ និងថ្នាក់បណ្ឌិតផ្នែកនរវិទ្យានៅសកលវិទ្យាល័យ Harvard ក្នុងឆ្នាំ១៩៩៣។
ក្រោយមកលោកគីមបានចំណាយពេលជាច្រើន ធ្វើជាសាស្ត្រាចារ្យនៅសាលាវិជ្ជសាស្ត្រ Harvard និងបានកាន់តំណែងជានាយកសកលវិទ្យាល័យ Dartmouth ពីឆ្នាំ២០០៩ ដល់ឆ្នាំ២០១២ មុននឹងក្លាយប្រធានធនាគារពិភពលោក។ លោក គីម បានជាប់ចំណាត់ថ្នាក់ទី៤១ នៅក្នុងបញ្ជីមនុស្សមានឥទ្ធិពលរបស់ទស្សនាវដ្តី Forbes ក្នុងឆ្នាំ២០១៨ថែមទៀតផង៕