កំពង់ចាម៖ ក្នុងវ័យ៨២ឆ្នាំ លោកយាយ មាស គឹមសេង បន្តលក់បន្លែតាមផ្លូវនៅមុខមន្ទីរទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ខេត្តកំពង់ចាម។ ដោយសារតែកូនៗមិនសូវធូរធា ហើយស្វាមីអាយុ៨៣ឆ្នាំ មើលមិនសូវច្បាស់ យាយសេង ប្រឹងប្រែងប្រកបរបរបន្តិចបន្តួចនេះ ដើម្បីចិញ្ចឹមក្រពះ និងសន្សំលុយធ្វើចេតិយសម្រាប់ខ្លួន និងស្វាមី ក្រោយពេលអស់អាយុសង្ខារ។
ម៉ោងជាង៤រសៀលទៅហើយ ស្ត្រីចំណាស់ ស្លៀកខោក្រណាត់ និងអាវក្រណាត់ដៃខ្លី ហើយមានស្បែកជ្រីវជ្រួញ កំពុងអង្គុយលើកន្ទេលមួយ ដែលមានបន្លែបន្តិចបន្តួច នៅខាងមុខមន្ទីរទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចខេត្តកំពង់ចាម ដែលមានដើមម៉ៃសាក់ធំៗប្របពីលើ ដោយផ្ដល់ជាម្លប់ល្មមសម្រាប់ការលក់ដូរ។
បន្លែជាច្រើនដែលស្ត្រីវ័យ៨២ឆ្នាំលក់នោះ រួមមាន ត្រួយល្ពៅ, ត្រកួន, ត្រួយអំពិល, ចេកទុំ, ស្ពៃ, ស្លឹកបាស, និងបន្លែធម្មជាតិជាច្រើនទៀត ដែលចងជាបាច់ៗហើយលក់ក្នុងតម្លៃ៥០០រៀលក្នុងមួយបាច់។ សម្រាប់ទីតាំងលក់បន្លែបន្តិចបន្តួចនេះ គឺស្ត្រីចំណាស់រូបនេះ បានបោសសម្អាត និងរៀបចំអនាម័យសណ្ដាប់ធ្នាប់ជាប្រចាំ ដើម្បីសុំការអនុគ្រោះពីអាជ្ញាធរ កុំឲ្យពួកគេដេញ។
ជួបជាមួយសារព័ត៌មាន ThmeyThmey25 លោកយាយសេង បាននិយាយថា គាត់ប្រមូលទិញបន្លែពីញាតិមិត្តជិតខាងនៅក្នុងភូមិ និងបេះផលដំណាំនៅជុំវិញផ្ទះ យកមកលក់ជារៀងរាល់ថ្ងៃ។ សម្រាប់របរលក់បន្លែបន្តិចបន្តួចនេះ គាត់អាចរកចំណូលបានចន្លោះពី ៣ម៉ឺនរៀលទៅ ៤ម៉ឺនរៀល ក្នុងមួយថ្ងៃ ដោយចាប់ផ្តើមលក់នៅទីនេះចាប់តាំងពីម៉ោង១១ព្រឹកដល់ម៉ោង៦ល្ងាច។ ប៉ុន្តែថ្ងៃខ្លះ ក៏លោកយាយ លក់មិនដាច់ដែរ។
លោកយាយដើរលក់បន្លែនៅតាមផ្លូវសាធារណៈ ឬនៅតាមសាកលវិទ្យាល័យដែលនៅតាមបណ្តោយផ្លូវជាតិលេខ៧ថ្មី ជួនកាលលោកយាយក៏បានដើរលក់នៅក្បែរធនាគារក្នុងក្រុងកំពង់ចាមនេះផងដែរ។ កាលដែលលោកយាយមកលក់បន្លែនៅក្បែនឹងសាលាខេត្តកំពង់ចាមនេះក៏ព្រោះតែនៅទីនេះមានដើមឈើធំៗជាម្លប់ដែលផ្តល់ភាពងាយស្រួលដល់ការលក់ដូររបស់លោកយាយចាប់តាំងពីពេលជិតថ្ងៃត្រង់រហូតដល់ពេលល្ងាច។
មែនទែនទៅ លោកយាយសេង បានលក់ដូរជាមួយម្ដាយតាំងពីអាយុ១៧ឆ្នាំមកម្ល៉េះ។ ក្រៅពីធ្វើស្រែចម្ការ របរលក់បន្លែនេះហើយ គឺជាផ្នែកមួយដែលជំរុញលទ្ធភាពឲ្យលោកយាយ អាចចិញ្ចឹមកូន៧នាក់ មុននឹងពួកគេរៀបការមានគ្រួសារផងដែរ។ និយាយបែបនេះ មិនមែនមានន័យថា កូនៗលោកយាយទាំង៧នាក់ មិនគិតគូពីឪពុកម្ដាយនោះទេ ពោលគឺពួកគេបានផ្តល់ថវិកាប្រមាណជាង១០ម៉ឺនរៀលក្នុងមួយខែ សម្រាប់ជីវភាពលោកយាយនិងស្វាមីផងដែរ។ ប៉ុន្តែដោយសារតែឃើញគ្រួសារកូនៗ ក៏ជួបការលំបាកដែរនោះ ទើបបានជាលោកយាយ សម្រេចចិត្តដើរលក់បន្លែបន្តិចបន្តួចនេះ ដើម្បីផ្គត់ផ្គង់ជីវិតចុងក្រោយ ដោយសារមិនចង់ដាក់បន្ទុកបន្ថែមលើកូន។
៥ខែមកហើយដែលដូនវ័យ៨២ឆ្នាំ បានប្រកបរបរលក់បន្លែនេះឡើងវិញ គាត់បានអះអាងថា អ្នកទិញបន្លែលោកយាយភាគច្រើនជាអ្នកដើរហាត់ប្រាណ និងអ្នកធ្វើដំណើរតាមយានយន្តឆ្លងកាត់ ហើយមានក្តីអាណិត ទើបពួកគេជួយទិញ។
សព្វថ្ងៃនេះលោកយាយរស់នៅជាមួយលោកតា ឯក អួន វ័យ៨៣ឆ្នាំត្រូវជាស្វាមីរបស់លោកយាយ ។ ដំបូងឡើយពួកគាត់ដើរលក់បន្លែជាមួយគ្នា តែជាអកុសលលោកតា អួន ស្រាប់តែមានបញ្ហាងងឹតភ្នែកបើកម៉ូតូលែងបាន ទើបលោកយាយមកលក់តែម្នាក់ឯងបែបនេះ។
«យាយមិនចង់ទៅសុំទានទេ។ យាយនឹងនៅតែប្រកបមុខរបរមួយនេះរហូតដល់ថ្ងៃដែលយាយដើរលែងរួច។ យាយចង់សន្សំប្រាក់សម្រាប់ធ្វើចេតិយសម្រាប់ខ្លួនឯង និងតា [ស្វាមី] ក្រោយពេលលាចាកលោក»។ លោកយាយ សេង បានរៀបរាប់យ៉ាងដូច្នេះ៕