អន្តរជាតិ
ប្រធានាធិបតីហ្វីលីពីន ហាមប៉ូលិសពិសាជាតិស្រវឹងនៅទីសាធារណៈ
× ក្រោយពីបានហាមឃាត់ប៉ូលិសមិនឲ្យចូលទៅក្នុងកាស៊ីណូរួច ឥឡូវនេះលោកប្រធានាធីបតីហ្វីលីពីន រ៉ូឌ្រីហ្គោ ឌូទើតេ ក៏បានចេញបម្រាមមិនអនុញ្ញាតឲ្យពួកគេ ពិសាជាតិស្រវឹងនៅកន្លែងសាធារណៈទៀតថែមទៀតផង។
សម្រាប់បទបញ្ជាថ្មីនេះ លោក រ៉ូឌ្រីហ្គោ ឌូទើតេ បានដាក់ចេញនៅថ្ងៃអង្គារ ទី០៨ ខែមករា នៅក្នុងជំនួបជាមួយមន្ត្រីប៉ូលីសថ្នាក់តំបន់ ក្នុងទីក្រុង Pasay ។ យោងតាមការចុះផ្សាយរបស់សារព័ត៌មាន Rappler លោកប្រធានាធិបតីរូបនេះបានបញ្ជាក់បែបនេះថា៖ «អ្នកឯងជាប៉ូលីស ខ្ញុំព្រមានអ្នកឯងឲ្យហើយ កុំផឹកជាតិស្រវឹងនៅទីសាធារណៈឲ្យសោះ។ ក្នុងទីក្រុង Davao ខ្ញុំបានហាមប្រាមវារួចហើយ ដូច្នេះពេលនេះ វានឹងត្រូវអនុវត្តសម្រាប់ប៉ូលិសគ្រប់រូប ទូទាំងប្រទេសហ្វីលីពីនតែម្តង»។
ទាក់ទិននឹងការហាមប្រាមនេះ លោក ឌុយទើតេ បានលើកឡើងថា ប៉ូលីសនឹងប្រើប្រាស់កាំភ្លើង បាញ់រះយ៉ាងអនាធិបតេយ្យ ក្រោយពីពួកគេបានផឹកជាតិស្រវឹងជ្រុលនៅខាងក្រៅនោះ។ ដោយរម្លឹកពីបទពិសោធរបស់លោកជាចៅហ្វាយក្រុង Davao លោកបាននិយាយទៀតថា មន្ត្រីយោធាហ្វីលីពីនក៏បានបង្កើតកំហុសដូចគ្នាអ៊ីចឹងដែរ។
គួររម្លឹកផងដែរថា កាលពីខែវិច្ឆិកា ឆ្នាំ២០១៨កន្លងទៅ លោក ឌូទើតេ បានចេញបញ្ជាដល់ប៉ូលីស កុំឲ្យចូលទៅក្នុងកាស៊ីណូ Okada Manila ដោយបានអះអាងថា មន្ត្រីប៉ូលីសបានជាប់ពាក់ព័ន្ធទៅនឹងអំពើចាប់ជំរិត ដែលកើតឡើងនៅក្នុងទីតាំងល្បែងស៊ីសង។ ក្រោយមក អគ្គស្នងការប៉ូលីសជាតិហ្វីលីពីន លោក Oscar Albayalde បានដាក់បញ្ជាថា ប៉ូលិសរូបណាដែលត្រូវបានគេប្រទះឃើញ ដើរចូលទៅក្នុងបរិវេណកាស៊ីណូនោះ នឹងត្រូវបណ្តេញចេញពីអង្គភាពតែម្តង៕
Tag:
ប្រធានាធិបតីហ្វីលីពីន
ជាតិស្រវឹង
© រក្សាសិទ្ធិដោយ thmeythmey.com