កីឡាជាតិ
ជាតិ
ពហុកីឡដ្ឋានជាតិមរតកតេជោសាងសង់បាន៤០ភាគរយ ខណៈបច្ចុប្បន្នកំពុងដំឡើងកៅអី
× ទីលានបាល់ទាត់នៃពហុកីឡដ្ឋានជាតិមរតកតេជោ ស្ថាបនាបាន៤០ភាគរយហើយ ក្រោយចំណាយពេលសាងសង់ប្រមាណ១៦ខែកន្លងមកនេះ។ ទីលានបាល់ទាត់នេះ គ្រោងបញ្ចប់ការសាងសង់ជាស្ថាពរនៅចុងឆ្នាំ២០២០ ខណៈបច្ចុប្បន្នកំពុងដំឡើងកៅអី។ សម្រាប់លោក ថោង ខុន ពហុកីឡដ្ឋានជាតិមរតកតេជោនេះ មិនត្រឹមតែបង្ហាញពីទំនាក់ទំនងដ៏ល្អរវាងកម្ពុជា-ចិននោះទេ តែវាបានផ្តល់ការងារជាច្រើនដល់ប្រជាជនកម្ពុជា។
លោក ថោង ខុន រដ្ឋមន្ត្រីក្រសួងទេសចរណ៍បានបញ្ជាក់ថា ទីលានបាល់ទាត់លំដាប់អន្តរជាតិ ដែលជាសមិទ្ធផលដំណាក់កាលទី២នៃពហុកីឡដ្ឋានជាតិមរតកតេជោ គ្រោងបញ្ចប់ការសាងសង់ជាស្ថាពរនៅចុងឆ្នាំ២០២០ ក្រោយចំណាយពេល១៦ខែក្នុងការសាងសង់កន្លងមកនេះ។ រដ្ឋមន្ត្រីរួបនេះ បានវាយតម្លៃថា ទីលានស្ថាបនាបានប្រមាណ៤០ភាគរយហើយ ខណៈបច្ចុប្បន្នកន្លែងសម្រាប់ទស្សនិកជនអង្គុយទស្សនាសាងសង់ដល់ជាន់ទី៥ហើយ នៅឡើយតែដំឡើងបង្គំកៅអី និងធ្វើទីលានខាងក្នុងប៉ុណ្ណោះ។
ជាក់ស្តែងនៅព្រឹកថ្ងៃទី៩ ខែមករា ឆ្នាំ២០១៩ គណៈកម្មការសាងសង់ និងក្រុមវិស្វករចិនបានរៀបចំពិធីសម្ពោធដំឡើងបង្គំកៅអីអង្គុយក្នុងទីលាន។ ក្រុមវិស្វករចិនបាននិយាយថា បង្គំកៅអីទាំងអស់មានចំនួនជាង៧ពាន់ ហើយការដំឡើងបង្គំកៅអីនីមួយៗមានភាពលម្អៀងបូកឬដកពីរសង់ទីម៉ែត្រតែប៉ុណ្ណោះ។ បង្គំកៅអីនេះ មានសភាពរលោង រចនាឡើងជាមួយបច្ចេកវិទ្យាទំនើបចុងក្រោយរបស់ចិន និងមានបំពាក់ QR កូដ ដើម្បីត្រួតពិនិត្យពីគុណភាពទៀតផង។
លោក ថោង ខុន ថ្លែងក្នុងពិធីសម្ពោធដំឡើងបង្គំកៅអីក្នុងទីលានបាល់ទាត់នៃពហុកីឡដ្ឋានជាតិមរតកតេជោ កាលពីព្រឹកថ្ងៃទី៩ ខែមករា
លោក ថោង ខុន ដែលជាប្រធានគណៈកម្មាធិការជាតិអូឡាំពិកកម្ពុជាបានអះអាងថា ការសាង់សង់ទីលានបាល់ទាត់លំដាប់អន្តរជាតិនេះ គ្រោងចំណាយថវិកាប្រមាណ១៥៨លានដុល្លារ ដែលជាជំនួយឥតសំណងរបស់រដ្ឋាភិបាលចិន។ ទីលាននេះ អាចផ្ទុកអ្នកទស្សនាប្រមាណ៦ម៉ឺននាក់ និងអាចជម្លៀសអ្នកគាំទ្រត្រឹមតែ៧នាទីក្នុងករណីមានហេតុការណ៍មិនល្អកើតឡើង។ ទីលាននេះរចនាឡើងជារាងសំពៅ ដែលបញ្ជាក់ពីសន្តិភាព និងមិត្តភាពដ៏រឹងមាំនិងយូរអង្វែងរវាងកម្ពុជា-ចិន ទាំងផ្នែកនយោបាយ និងពាណិជ្ជកម្ម។
សម្រាប់លោក ថោង ខុន ពហុកីឡដ្ឋានជាតិមរតកតេជោមិនត្រឹមតែបង្ហាញពីមិត្តភាពដ៏ស្អិតរមួតរវាងប្រទេសទាំងពីរប៉ុណ្ណោះទេ តែវាបានផ្តល់ការងារ និងជួយបណ្តុះបណ្តាលជំនាញផ្នែកវិស្វកម្មដល់ប្រជាជនកម្ពុជាជាច្រើនផងដែរ។ ក្នុងចំណោមវិស្វករ និងកម្មការចំនួន៥៨០នាក់ ដែលកំពុងធ្វើការនៅទីនោះ មានកម្ពុជាចំនួន២៤២នាក់។ ត្រង់ចំណុចនេះរដ្ឋមន្ត្រីក្រសួងទេសចរណ៍ខាងលើបានថ្លែងអំណរគុណដល់ខាងវិស្វករចិន ដែលបានចែករំលែកបទពិសោធដល់ប្រជាជនកម្ពុជា។ ពហុកីឡដ្ឋានជាតិមរតកតេជោ សាងសង់ឡើង ដើម្បីត្រៀមធ្វើជាម្ចាស់ផ្ទះការប្រកួតកីឡាស៊ីហ្គេមលើកទី៣២នៅឆ្នាំ២០២៣៕
Tag:
បាល់ទាត់
ពហុកីឡដ្ឋានជាតិមរតកតេជោ
ថោង ខុន
© រក្សាសិទ្ធិដោយ thmeythmey.com