កីឡាជាតិ
ជាតិ
ThmeyThmey និងក្រុមហ៊ុនលីប្រា សហការផ្សព្វផ្សាយ «គុនល្បុក្កតោ» ក្នុងដំណើរឆ្ពោះទៅស៊ីហ្គេម
× «ល្បុក្កតោឆ្ពោះទៅស៊ីហ្គេមឆ្នាំ២០២៣» ជាកម្មវិធីដែលកើតចេញពីកិច្ចសហការរវាងសារព័ត៌មាន ThmeyThmey ជាមួយក្រុមហ៊ុនសន្តិសុខលីប្រា និងសហព័ន្ធកីឡាគុនល្បុក្កតោកម្ពុជា ក្នុងគោលបំណងពង្រីងការផ្សព្វផ្សាយគុនល្បុក្កតោ មុនពេលដែលក្បាច់គុនចំណាស់របស់ខ្មែរមួយនេះ ត្រៀមខ្លួនចូលក្នុងបញ្ជីបេតិកភណ្ឌអរូបីនៃមនុស្សជាតិរបស់អង្កការយូណេស្កូនៅចុងឆ្នាំ២០១៩ និងការបង្ហាញវត្តមាននៅព្រឹត្តិការណ៍កីឡាស៊ីហ្គេមនៅពេលដែលកម្ពុជាធ្វើជាម្ចាស់លើកដំបូង។
លោក អ៊ួ តារា អគ្គលេខាធិការសហព័ន្ធកីឡាគុនល្បុក្កតោកម្ពុជាបានបញ្ជាក់ថា បេសកកម្ម «ល្បុក្កតោឆ្ពោះទៅស៊ីហ្គេម២០២៣» ត្រូវបានបង្កើតឡើង ដើម្បីជីកកកាយកីឡាគុនល្បុក្កតោ ដែលបានលាក់ខ្លួននៅតាមខេត្តមួយចំនួន ឲ្យមានសកម្មភាព និងលេចឡើងវិញ។ បេសកកម្មនេះ ក៏ដើម្បីបំផុសចលនា និងផ្សព្វផ្សាយពីគុនល្បុក្កតោឲ្យកាន់តែទូលំទូលាយ ដើម្បីទាក់ទាញយុវជនឲ្យចូលរួមលេងកីឡានេះកាន់តែច្រើន ដើម្បីជាថ្នាលសម្រាប់ត្រៀមធ្វើជាម្ចាស់ផ្ទះការប្រកួតកីឡាស៊ីហ្គេមឆ្នាំ២០២៣។
លោកបានបន្ថែមថា ក្នុងដំណើរចុះទៅកាន់ក្លិប-សមាគមនៅខេត្តមួយនេះដែរ បេសកកម្ម«ល្បុក្កតោឆ្ពោះទៅស៊ីហ្គេម២០២៣»នឹងទៅជួបសម្ភាសជាមួយព្រឹទ្ធាចារ្យ និងគ្រូគុនមួយចំនួនពាក់ព័ន្ធនឹងប្រវត្តិគុនល្បុក្កតោ។ ការសម្ភាសនេះ គឺដើម្បីចងក្រងជាឯកសារសម្រាប់ត្រៀមចាក់ផ្សាយអបអរក្នុងថ្ងៃប្រកាសលទ្ធផលនៃការចុះបញ្ជីគុនល្បុក្កតោជាសម្បត្តិបេតិកភណ្ឌអូរបីនៃមនុស្សជាតិរបស់អង្គការយូណេស្កូ ដែលគ្រោងធ្វើឡើងនៅចុងឆ្នាំ២០១៩ ខាងមុខនេះ។
បើតាមលោក អ៊ួ តារា បេសកកម្ម«ល្បុក្កតោឆ្ពោះទៅស៊ីហ្គេម២០២៣»ដំណាក់កាលទី១ នឹងចុះទៅកាន់ខេត្តចំនួន១២រួមមានតាកែវ កំពត កណ្តាល កំពង់ស្ពឺ សៀមរាប ពោធិ៍សាត់ បាត់ដំបង កំពង់ធំ កំពង់ចាម កំពង់ឆ្នាំង ស្វាយរៀង និងឧត្តរមានជ័យ។ ការចុះទៅកាន់ខេត្តទាំងនេះដែរ បេសកកម្មនេះ គ្រោងធ្វើជា៦ដំណាក់កាលដោយទី១ចុះទៅកាន់ខេត្តតាកែវ និងកំពត ទី២.កំពង់ឆ្នាំង ពោធិសាត់ បាត់ដំបង ទី៣.កំពង់ធំ សៀមរាប ឧត្តរមានជ័យ ទី៤.កំពង់ចាម ស្វាយរៀង ទី៥. កណ្តាល និងទី៦កំពង់ស្ពឺ។
គួរបញ្ជាក់ថា បេសកកម្ម«ល្បុក្កតោឆ្ពោះទៅស៊ីហ្គេម២០២៣»ទទួលបានការឧបត្ថម្ភថវិកាពីក្រុមហ៊ុនសន្តិសុខលីប្រា ដែលមានលោក ហេង ម៉េងហូ ជាអគ្គនាយក ហើយលោកក៏ជាអនុប្រធានសហព័ន្ធកីឡាគុនល្បុក្កតោកម្ពុជា ផងដែរ៕
Tag:
គុនល្បុក្កតោ
លីប្រា
អ៊ួ តារា
© រក្សាសិទ្ធិដោយ thmeythmey.com