អន្តរជាតិ
ឥណ្ឌូណេស៊ី៖ ភ្ញៀវគ្មានអី្វហូបសោះក្នុងមង្គលការមួយព្រោះអ្នករៀបចំសេវាកម្មរត់គេចខ្លួន
រូបតំណាង
×![]()
ដោយ: ធីតា
ពិធីអាពាហ៍ពិពាហ៍មួយនៅក្រុង Palembang នៃខេត្តស៊ូម៉ាត្រាខាងត្បូង ក្នុងប្រទេសឥណ្ឌូណេស៊ី ទទួលបាននូវមេរៀនដ៏សែនខកចិត្តបំផុត។ យោងតាមការផ្សាយរបស់សារព័ត៌មាន Coconuts Jakarta ក្រុមហ៊ុនដែលទទូលបន្ទុករៀបចំពិធីអាពាហ៍ពិពាហ៍ទាំងមូល បានស៊ីដាច់លុយ ដែលធ្វើឲ្យភ្ញៀវចូលរួមប្រមាណ១០០០នាក់ គ្មានម្ហូបអាហារបរិភោគ។
ម្ចាស់ក្រុមហ៊ុនទទួលសេវាកម្មរៀបចំអាពាហ៍ពិពាហ៍មួយនៅឥណ្ឌូណេស៊ី បានគេចពីទំនួលខុសត្រូវខ្លួន ជាមួយលុយដ៏ច្រើនរបស់ក្រុមគ្រួសារកូនកម្លោះ-កូនក្រមុំ។ តាមការចរចា ក្រុមហ៊ុនរ៉ាប់រងទាំងអស់ក្នុងកម្មវិធី ដែលក្នុងនោះមានដូចជា ម្ហូបអាហារ ការថតរូប ការជួលសម្លៀកបំពាក់ និងសេវកម្មផ្សេងៗ។
ម្ចាស់ក្រុមហ៊ុនដែលមានឈ្មោះកាត់ថា RIY បានទៅផ្ទះរៀបអាពាហ៍ពិពាហ៍នៅម៉ោង៩ព្រឹក បន្ទាប់មក ស្ត្រីនោះបានសុំសាម៉ីដើមការ ដើម្បីចេញទៅយកសម្លៀកបំពាក់។ សមាជិកគ្រួសារម្នាក់ បានរៀបរាប់ប្រាប់សារព័ត៌មាន Kompas ថា ដោយមិនឃើញអ្នករៀបចំនោះត្រឡប់មកវិញ កូនកម្លោះ-កូនក្រមុំ បានទាក់ទងសួរ ព្រោះបារម្ភខ្លាំងបំផុត គឺម្ហូបអាហារសម្រាប់ភ្ញៀវ។
«ពេលទូរសព្ទសួរ អ្នករៀបចំរូបនោះ បានអះអាងថា ក្រុមការងារខ្លួនបានចំអិន ដាំស្លរម្ហូបអាហាររួចរាល់ហើយ ហើយខ្លួនកំពុងធ្វើដំណើរទៅកន្លែងរៀបពិធី។ ប៉ុន្តែក្រោយមក គេទាក់ទងទៅលែងបានទៅវិញ»។ នេះជាការរៀបរាប់របស់សមាជិកក្រុមគ្រួសារសាម៉ីដើមការម្នាក់។
កូនក្រមុំ បានអះអាងថា ខ្លួនជួលសេវាកម្មរបស់ RIY តាមរយៈការណែនាំពីមិត្តភក្តិម្នាក់។ ពេលនោះ RIY បានអះអាងថា ខ្លួនអាចរ៉ាប់រងបានគ្រប់សេវាកម្មទាំងអស់ ដែលធ្វើឲ្យកូនកម្លោះ កូនក្រុមុំ ធូរចិត្ត និងជឿជាក់ ជាពិសេសនោះ អ្នករៀបចំរូបនេះ ថា ខ្លួនក៏រស់នៅ Palembang ផងដែរ។
ដោយមិនបានបញ្ជាក់ពីចំនួន សាម៉ីដើមការបានលើកឡើងថា ខ្លួនបានបង់លុយមួយភាគធំទៅឲ្យ RIY ហើយបង់ឲ្យគ្រប់ ក្រោយពិធីចប់។ ជិតផ្តើមកម្មវិធីទៅហើយ គេមិនឃើញអាហារមុខសោះ ហើយភ្ញៀវខ្លះដែលចូលទៅមុន បានត្អូញត្អែរថាពួកគេហេវខ្លាំង។
ដោយសារបាត់ទំនាក់ទំនងឈឹង ក្រុមគ្រួសារកូនកម្លោះ-ក្រមុំ ដាច់ចិត្តសាកសួរហាងដែលនៅក្បែរនោះ ដើម្បីកុម្ម៉ង់ម្ហូបអាហារ ប៉ុន្តែគ្មានភោជនីយដ្ឋានណាអាចឆ្លើយតបបានឡើយ ចំពោះការរៀបចំម្ហូបអាហារសម្រាប់ភ្ញៀវ១០០០នាក់ទាំងតក់ក្រហល់។
Coconuts Jakarta មិនបានបញ្ជាក់ថា កម្មវិធីនឹងទៅជាយ៉ាងណានោះឡើយ ប៉ុន្តែក្រុមគ្រួសារម្ចាស់កម្មវិធី បានដាក់ពាក្យបណ្តឹងទៅប៉ូលិសមូលដ្ឋានឲ្យស្វែងរក RIY រួចរាល់ហើយ។ នេះជាករណីលើកដំបូងដែលអ្នករៀបការរងនូវការខកចិត្តនៅចំថ្ងៃរៀបពិធី ប៉ុន្តែការចាញ់បោកអ្នករៀបចំសេវាកម្មមិនមែនជារឿងថ្មីនោះឡើយនៅឥណ្ឌូណេស៊ី។ កាលពីឆ្នាំ២០១៨ គូស្រករ៥៨គូបានចាញ់បោកអ្នករៀបចំកម្មវិធី (Wedding Organizer) ក្លែងក្លាយ ដោយលង់ខ្លួនបង់លុយឲ្យជនទាំងនោះមុន៕
Tag:
ឥណ្ឌូណេស៊ី
អាពាហ៍ពិពាហ៍
© រក្សាសិទ្ធិដោយ thmeythmey.com
