អ្នកណាៗក៏ត្រូវការសម្រាកលំហែកាយពីការងារ ឬរបររកស៊ីប្រចាំថ្ងៃ តួយ៉ាងដូចជាកីឡាករជើងចាស់របស់ ONE Championship ចាន់ រតនាដែរ។ ប៉ុន្តែខ្លាចាស់របស់កម្ពុជារូបនេះឆ្លៀតពេលលំហែកាយរយៈពេលខ្លីប៉ុណ្នោះ រូចបន្តការហ្វឹកហាត់បន្ថែមដោយសង្ឃឹមថានឹងបានទៅបង្វាញមុខនៅសង្វៀន ONE Championship នាទីក្រុងតូក្យូ ប្រទេសជប៉ុនសម្រាប់ឆ្នាំ២០១៩នេះ។
កាលពីខែធ្នូ ឆ្នាំ២០១៨ កន្លងទៅ ចាន់ រតនា បានបង្ហាញខ្លួនម្តងទៀតនៅលើសង្វៀនក្បាច់គុនធំជាងគេក្នុងព្រឹត្តិការណ៍ ONE: DESTINY OF CHAMPIONS បន្ទាប់ពីបាត់មុខប្រហែលជាងមួយឆ្នាំកន្លះមក។
ក្នុងការបង្ហាញខ្លួននៅសង្វៀនដ៏ធំនាទីក្រុងកូឡាឡាំពួ ប្រទេសម៉ាឡេស៊ី ជាមួយចក្ខុទស្សនិកជនដ៏ច្រើន ចាន់ រតនា កីឡាករទម្ងន់ ៦១គីឡូក្រាមបានសាងប្រវត្តិសាស្ត្រដោយយកបានជ័យជម្នះដ៏មិនគួរឲ្យជឿលើកខ្លាចាស់មិនធ្លាប់ចាញ់របស់ឥណ្ឌូណេស៊ី Abro Fernandes។
គូប្រយុទ្ធទម្ងន់ ៦១គីឡូក្រាមនេះ សម្តែងស្នៀតគុនដែលពួកគេបានត្រៀមបំបាក់គ្នារៀងៗខ្លួន។
រតនា ពន្យល់ថា៖ «ខ្ញុំដឹងគេល្អ គេវាយ៧ដងអត់ដែលចាញ់ ហើយគេជាម្ចាស់ខ្សែក្រវាត់ប្រចាំទូរស្សន៍នៅប្រទេសគាត់ឥណ្ឌូណេស៊ីទៀត។ ប៉ុន្តែយ៉ាងណា ខ្ញុំអត់បារម្ភអីទេ!។ ខ្ញុំបារម្ភតែមួយទេគឺកម្លាំងរបស់គេ និងទម្ងន់ដៃទម្ងន់ជើង។ តែបន្ទាប់ពីតេសទឹកទី១ ខ្ញុំដឹងពីកម្លាំងរបស់គេ ដល់អ៊ីចឹងខ្ញុំអត់មានអីបារម្ភ ខ្ញុំសប្បាយចិត្តនឹងការប្រកួត!»។
មួយគូនេះ ប្រកួតគ្នាឡើយជិតអស់ខ្យល់រាងខ្លួន បើមើលទៅយ៉ាងយូរទឹកទី២ គឺដឹងចាញ់ឈ្នះទៅហើយ។
ក្នុងទឹកនោះឃើញថា រតនា ព្យាយាមដោះខ្លួនពីការចាប់កៀបក្លេររបស់ Fernandes ជាច្រើនដង បន្ទាប់មក រតនា ប្រើប្រាស់ក្បាច់ដាល់ចំៗ រហូតរកបានឱកាសពេល Fernandes អស់ខ្យល់ខ្លាំង ក៏បង្ហើយដោយប្រើជង្គង់មុតស្រួចរបស់ខ្លួន។ ពេលនោះរតនាបន្តសម្រុកចូលបន្ថែមកណ្តាប់ដៃធ្ងន់ៗទៀត រហូតអាជ្ញាកណ្តាលសម្រេចបញ្ឈប់ការប្រកួតតែម្តង។
ជ័យជម្នះរបស់ម្ចាស់ក្លិប «សិល្បៈ» នាព្រឹត្តិការណ៍ក្រុងកូឡាឡាំពួនោះបានធ្វើឲ្យមានក្តីរំភើបភ្ញាក់ផ្អើលយ៉ាងសម្បើម ជាមួយកីឡាការិនីថ្មីមួយរូបទៀតគឺ ឯម សុវណ្ណារី ដែលនាងក៏បានផ្តួលគូប្រកួតយ៉ាងប៉ិនប្រសព្វផងដែរ។
ថ្វីបើនោះជារាត្រីដ៏អស្ចារ្យសម្រាប់អ្នកប្រដាល់គុនខ្មែរមែន ប៉ុន្តែគាត់បានសម្លឹងមើលពីអ្វីដែលត្រូវបន្តទៀតរួចហើយ។
រតនា ប្រាប់ថា៖ «ខ្ញុំសប្បាយចិត្តដែរ ប៉ុន្តែខ្ញុំធ្លាប់មានអារម្មណ៍ហ្នឹងច្រើនដងហើយ។ ខ្ញុំដឹងថាហ្នឹងគ្រាន់តែជាដំណើរការមួយ ព្រោះនៅមានដំណើរជាច្រើនទៀតដើម្បីឈានដល់គោលដៅខ្ញុំ»។
«ខ្ញុំដឹងថាហ្នឹងជាជោគជ័យធំមួយ តែខ្ញុំគិតថានៅមានឆ្ងាយទៀត!»
អ្វីដែលសំខាន់ ទើបតែតស៊ូជាមួយ Fernandes បាន២២ថ្ងៃសោះ គាត់ឡើងសង្វៀនម្តងទៀត តែលើកក្រោយនេះគឺប្រកួតគុនខ្មែរ នៅចំពោះមុខជនរួមជាតិនៅឯរាជធានីភ្នំពេញ។
«បកមកវាយគុនខ្មែរវាងាយស្រួល ព្រោះអីបានហាត់ត្រៀមវាយនៅ ONE អស់ពីរខែហើយ។ បន្ទាប់មក ខ្ញុំសម្រាកពីរបីថ្ងៃ ហើយហ្វឹកហាត់ថែមទៀត»។
ចាន់ រតនា បានឈ្នះការប្រកួតម្តងទៀត នៅរសៀលថ្ងៃសៅរ៍ ទី២៩ ខែធ្នូនោះផងដែរ។ ប្រកួតរួចរតនាក៏សម្រេចចិត្តយកពេលសម្រាកលំហែកាយម្តង។
គាត់បាននាំប្រពន្ធកូនទាំងពីរ ទៅលេងកោះរុង ប៉ុន្តែសម្រាប់គាត់នៅតែមិនភ្លេចពីការហ្វឹកហាត់ឡើយ។
«ខ្ញុំយកពេល៤ថ្ងៃនៅកោះរុង ប៉ុណ្នឹងគ្រប់គ្រាន់សម្រាប់ខ្ញុំហើយ!»
«កត្តាមួយទៀតខ្ញុំរំលឹកខ្លួនឯងរហូតថា ខ្ញុំកាន់តែចាស់ហើយ ខ្ញុំមិនដឹងថាអាចបន្តវាយបាន ៣ឬ៤ឆ្នាំទៀតឬអត់ទេ។ អ៊ីចឹងខ្ញុំត្រូវតែក្តោបឱកាសនេះឲ្យបាន មិនត្រូវទំលាក់ខ្លួនបណ្តោយឲ្យពេលវេលាដើរចោលនោះទេ»។
សព្វថ្ងៃ ចាន់ រតនា បន្តហ្វឹកហាត់យ៉ាងខ្លាំងមិនបណ្តោយឲ្យឡើងគីឡូបន្តិចឡើយ។ រូបគេចង់បង្ហាញអ្នកគាំទ្រ និងស្ថាប័ន ONE Championship ឲ្យដឹងថា គាត់ត្រៀមខ្លួនសម្រាប់ការប្រកួតខាងមុខរួចជាស្រេច។
«ការដែលខ្ញុំអាចប្រកួតតំណាងកម្ពុជា ខ្ញុំមានអារម្មណ៍សប្បាយចិត្ត! ខ្ញុំគិតចង់វាយនៅតូក្យូ និងម៉ានីល ព្រោះខ្ញុំមិនដែលទៅជប៉ុន ខ្ញុំរីករាយនឹងប្រកួត។ ប៉ុន្តែសម្រាប់ខ្ញុំឲ្យតែគេចាប់គូឲ្យវាយនរណាក៏ខ្ញុំវាយដែរ។
«ដោយសារខ្ញុំប្រកួតតំណាងឲ្យកម្ពុជា ដូច្នេះខ្ញុំធ្វើយ៉ាងណាយកជ័យជម្នះមកឲ្យប្រទេសឲ្យបាន!»៕
អត្ថបទ៖ Matias Andres