អារ៉ាប៊ីសាអូឌីតគ្រោងបង្កើតរោងចក្រចម្រាញ់ប្រេង តម្លៃ១០ពាន់លានដុល្លារនៅប៉ាគីស្ថាន

អន្តរជាតិ

អារ៉ាប៊ីសាអូឌីតគ្រោងបង្កើតរោងចក្រចម្រាញ់ប្រេង តម្លៃ១០ពាន់លានដុល្លារនៅប៉ាគីស្ថាន

13, Jan 2019 , 5:29 pm

រូបភាព

ដោយ:

អារ៉ាប៊ីសាអូឌីត គ្រោងបង្កើតរោងចក្រចម្រាញ់ប្រេង តម្លៃ១០ពាន់លានដុល្លារ នៅកំពង់ផែទឹកជ្រៅGwadar របស់ប៉ាគីស្ថាន ដែលកំពុងត្រូវបានអភិវឌ្ឍដោយជំនួយពីចិន។ នេះបើតាមការបញ្ជាក់របស់រដ្ឋមន្ត្រីក្រសួងថាមពលអារ៉ាប៊ូសាអូឌីត លោក Khalid al-Falih នៅថ្ងៃទី១២ ខែមករា។

ថ្លែងទៅកាន់ក្រុមអ្នកសារព័ត៌មាននៅឯកំពង់ផែ Indian Ocean នៅថ្ងៃទី១២ ខែមករា លោករដ្ឋមន្ត្រី khalid al-falih បានគូសបញ្ជាក់ថា ៖«អារ៉ាប៊ីសាអូឌីចង់ធ្វើឲ្យការអភិវឌ្ឍសេដ្ឋកិច្ចរបស់ប៉ាគីស្ថានមានស្ថិរភាព ដោយការបង្កើតរោងចក្រចម្រាញ់ប្រេង និងភាពជាដៃគូជាមួយប៉ាគីស្ថាននៅក្នុងគម្រោងច្រករបៀងសេដ្ឋកិច្ចប៉ាគីស្ថាន-ចិន»។

យោងតាមការចុះផ្សាយរបស់ទីភ្នាក់ងារព័ត៌មាន Reuters ព្រះអង្គម្ចាស់ Mohammad bin Salman ឬស្គាល់ថា MBS នឹងធ្វើទស្សនកិច្ចទៅកាន់ប៉ាគីស្ថាននាខែក្រោយ ដើម្បីចុះហត្ថលេខាលើកិច្ចព្រមព្រៀងនេះ។ នេះបើតាមការបញ្ជាក់របស់លោក Khalid ដោយបានបន្ថែមទៀតថា អារ៉ាប៊ីសាអូឌីតក៏នឹងវិនិយោគលើវិស័យសំខាន់ៗផ្សេងទៀតផងដែរ។

មុននឹងមានវត្តមានរបស់អារ៉ាប៊ីសាអូឌីត ក្រុងប៉េកាំងបានសន្យារផ្តល់ប្រាក់ប្រមាណ ៦០ពាន់លានដុល្លារ ជាផ្នែកមួយនៃគម្រោងច្រករបៀងសេដ្ឋកិច្ចប៉ាគីស្ថាន-ចិន (CPEC) ដែលរួមបញ្ចូលដូចជា ការសាងសង់ ស្ថានីយថាមពល, ផ្លូវល្បឿនលឿន, ផ្លវូដែក និងកំពង់ផែយុទ្ធសាស្ត្រ។ គម្រោងនេះគឺមានគោលដៅដើម្បី ប្រែក្លាយប៉ាគីស្ថានទៅជា ផ្លូវគោកដ៏សំខាន់មួយ ដែលភ្ជាប់ពីភាគខាងលិចប្រទេសចិន ទៅកាន់ពិភពលោក។

យោងតាមការចុះផ្សាយរបស់សារព័ត៌មានដដែលនេះ រដ្ឋមន្ត្រីប្រេងឥន្ធនៈប៉ាគីស្ថាន លោក Ghulam Sarwar Khan បានគូសបញ្ជាក់ថា ជាមួយការបង្កើតរោងចក្រចម្រាញ់ប្រេងនៅកំពង់ផែ Gwadar អារ៉ាប៊ីសាអូឌីតនឹងក្លាយដៃគូដ៏សំខាន់មួយនៅក្នុងគម្រោង CPEC។

គួរបញ្ជាក់ថា ចាប់តាំងពីរដ្ឋាភិបាលថ្មីរបស់លោកនាយករដ្ឋមន្ត្រី Imran Khan ចូលកាន់តំណែងកាលពីខែសីហាកន្លងទៅ ប៉ាគីស្ថានបានទទួលបានជំនួយផ្នែកសេដ្ឋកិច្ចជាច្រើន ពីអារ៉ាប៊ីសាអូឌីត, អេមីរ៉ាត អារ៉ាប់រួម និងចិន៕