អន្តរជាតិ
ក្រុមសិទ្ធិមនុស្សចង់ EU ពន្យារការផ្តល់សច្ចាប័នលើកិច្ចព្រមព្រៀងពាណិជ្ជកម្មជាមួយវៀតណាម
×![]()
ក្រុមប្រឹក្សា និងសភាអឺរ៉ុប គួរតែពន្យារពេលការផ្តល់សច្ចាប័នលើកិច្ចព្រមព្រៀងពាណិជ្ជកម្មសេរី រវាងសហភាពអឺរ៉ុប និងវៀតណាម រហូតដល់រដ្ឋាភិបាលវៀតណាមចាត់វិធានការច្បាស់លាស់ណាមួយ ក្នុងគោលដៅដើម្បីដោះស្រាយបញ្ហារំលោភសិទ្ធិមនុស្សរបស់ខ្លួន។ នេះបើតាមសេចក្តីថ្លែងការណ៍របស់អង្គការឃ្លាំមើលសិទ្ធិមនុស្ស Human Right Watch នៅថ្ងៃទី០៩ ខែមករា ឆ្នាំ២០១៩ ។ 
គណៈកម្មការអឺរ៉ុប ដែលទើបបញ្ចប់ការចចារលើកិច្ចព្រមព្រៀងពាណិជ្ជកម្មសេរីជាមួយវៀតណាម បានដាក់ចេញកិច្ចព្រមព្រៀងសម្រេច កាលពីខែតុលា ឆ្នាំ២០១៨។ កិច្ចព្រៀមព្រៀងនេះនឹងត្រូវតម្រូវឲ្យមានអនុម័តចុងក្រោយពីក្រុមប្រឹក្សាអឺរ៉ុប និងសភាអឺរ៉ុប ដែលចាំបាច់សម្រាប់ឲ្យកិច្ចព្រមព្រៀងនេះ អាចចូលជាធរមានបាន មុននឹងការបោះឆ្នោតរបស់សភាអឺរ៉ុប នៅខែឧសភាខាងមុខ។
យ៉ាងណាមិញ ដោយសារតែរងសម្ពាធយ៉ាងខ្លាំងពីសមាគមជំនួញរបស់អឺរ៉ុប សមាជិកខ្លះនៅក្នុងសភាអឺរ៉ុប ខណៈនេះកំពុងព្យាយាមធ្វើការឆ្ពោះទៅរក ការបញ្ចប់កិច្ចព្រមព្រៀងពាណិជ្ជកម្មនេះ ទោះបីជាភាគីវៀតណាមបានព្រងើយកន្តើយ ទៅនឹងការស្នើសុំឲ្យរបស់សហភាពអឺរ៉ុប ពាក់ព័ន្ធនឹងបញ្ហារំលោភសិទ្ធិមនុស្សក្នុងប្រទេសខ្លួនក៏ដោយក្តី។
យោងតាមសេចក្តីថ្លែងការណ៍របស់អង្គការសិទ្ធិមនុស្ស Human Right Watch ដដែលនេះ លោក John Sifton ប្រធានការពារសិទ្ធិមនុស្សប្រចាំតំបន់អាស៊ី បានគូសបញ្ជាក់ថា៖ «ការអនុម័តលើកិច្ចព្រមព្រៀងពាណិជ្ជកម្មទាំងតក់ក្រហល់ នឹងក្លាយជាកំហុសដ៏ធំមួយ»។
ត្រង់ចំណុចនេះ លោក John Sifton បានបន្ថែមទៀតថា វាដូចជាការផ្តល់អំណោយដល់វៀតណាមដោយពុំទទួលអ្វីសោះមកវិញ។ ការណ៍នេះ ក៏ផ្ញើសារដ៏អាក្រក់មួយទៅដល់សហភាពអឺរ៉ុប ដែលពេលកន្លងមក មានបំណងប្រើប្រាស់ការធ្វើពាណិជ្ជកម្មជាឧបករណ៍ដើម្បីលើកកម្ពស់សិទ្ធិមនុស្សនៅជុំវិញពិភពលោក ថា «គ្មានភាពប្រាកដប្រជាអ្វីឡើយ»។
គួរបញ្ជាក់ថា ការទាមទាររបស់ក្រុមសិទ្ធិមនុស្សនេះ គឺធ្វើឡើងក្រោយ រដ្ឋាភិបាលវៀតណាម បង្កើនការរឹតត្បិតសិទ្ធិសេរីភាព ជាមួយច្បាប់សន្តិសុខបច្ចេកវិទ្យាថ្មី ដែលបានចូលជាធរមាន កាលពីដើមឆ្នាំ២០១៩នេះ។
ក្រោមច្បាប់ថ្មីនេះ ក្រុមហ៊ុនបច្ចេកវិទ្យាធំៗនៅវៀតណាម នឹងត្រូវតម្រូវឲ្យលុបចោលមាតិកា ដែលរដ្ឋាភិបាលចាត់ទុកថា ប្រឆាំងទៅនឹងគោលនយោបាយរបស់ខ្លួន។ ម្យ៉ាងវិញទៀត ក្រុមហ៊ុនបច្ចេកវិទ្យាយក្ស ដូចជា Facebook និង Google ក៏នឹងត្រូវផ្តល់ទិន្នន័យអ្នកប្រើប្រាស់ ប្រសិនបើក្រុមហ៊ុនទាំងនោះត្រូវបានស្នើសុំដោយរដ្ឋាភិបាល។ ជាមួយគ្នានេះ ក្រុមហ៊ុនទាំងនោះ នឹងតម្រូវឲ្យបើកការិយាល័យតំណាងក្នុងប្រទេសវៀតណាមថែមទៀតផង។
ទាក់ទិននឹងច្បាប់រឹតត្បឹតសេរីភាពរបស់វៀតណាមនេះ លោក John Sifton បានបញ្ជាក់ថា ក្រុមប្រឹក្សាអឺរ៉ុប និងសភាអឺរ៉ុប ត្រូវតែផ្ញើសារឲ្យបានច្បាស់លាស់មួយថា កិច្ចព្រមព្រៀងពាណិជ្ជកម្មនេះ ពុំអាចត្រូវបានអនុវត្តនោះទេ រហូតដល់រដ្ឋាភិបាលវៀតណាមបង្ហាញឆន្ទៈថា ខ្លួនពិតជាមានបំណងដោះស្រាយ បញ្ហារំលោភសិទ្ធិមនុស្សមែននោះ។ ប្រសិនបើអឺរ៉ុបសម្រេចពន្យារកិច្ចព្រមព្រៀងមែននោះ វាគឺជាកំហុសរបស់ក្រុងហាណូយតែម្តង៕
Tag:
វៀតណាម
EU
ក្រុមសិទ្ធិមនុស្ស
© រក្សាសិទ្ធិដោយ thmeythmey.com
