អន្តរជាតិ
ចិន ប្រកាសបោសសម្អាតអំពើពុករលួយក្នុងវិស័យពេទ្យ អប់រំ និងហិរញ្ញវត្ថុ
× គណៈកម្មការត្រួតពិនិត្យវិន័យនៃបក្សកុម្មុយនីស្តចិន បានដាក់ចេញផែនការថ្មីសម្រាប់ឆ្នាំ២០១៩ ក្នុងការលុបបំបាត់អំពើពុករលួយក្នុងវិស័យអប់រំ សុខាភិបាល និងហិរញ្ញវត្ថុជាដើម។ ការប្រយុទ្ធប្រឆាំងអំពើពុករលួយជាគោលនយោបាយស្នូលរបស់ប្រធានាធិបតីចិន ស៊ី ជិនភីង ដោយដាក់គោលដៅលើមន្ត្រីគ្រប់ជាន់ថ្នាក់រាប់ទាំងសមាជិកបក្សផង។ មិនត្រឹមក្នុងស្រុកឡើយ ចិនក៏នឹងប្រើសំណាញ់មេឃដើម្បីចាប់ជនល្មើសរត់ពួននៅបរទេសមកកាត់ទោសដែរ។
ការប្រយុទ្ធប្រឆាំងអំពើពុករលួយនៅចិនក្នុងឆ្នាំ២០១៩ នឹងកាន់តែពង្រឹងថែមទៀត ហើយពង្រីកទៅវិស័យផ្សេងៗដែលទាក់ទងផ្ទាល់ប្រយោជន៍ប្រជាជន។ អង្គភាពប្រឆាំងអំពើពុករលួយរបស់បក្សកុម្មុយនីស្តចិន ប្រកាសថា ចិននឹងបង្កើនការប្រឹងប្រែងរបស់ខ្លួនក្នុងការលុបបំបាត់ឲ្យអស់ក្នុងវិស័យសំខាន់ៗរបស់ប្រទេសដែលជាការបារម្ភរបស់ប្រជាជនតាំងពីអប់រំ សុខាភិបាល ការការពារបរិស្ថានរហូតដល់ហិរញ្ញុវត្ថុផង។
គណៈកម្មការជម្ឈិមត្រួតពិនិត្យវិន័យនៃគណបក្សកុម្មុយនីស្តចិន នៅថ្ងៃទី១៣ ខែមករា បញ្ជាក់ថា បេសកកម្មនៅឆ្នាំ២០១៩ នឹងផ្ដោតលើអំពើពុករលួយ និងបទឧក្រិដ្ឋក្នុងចំណោមមន្ត្រីរដ្ឋាភិបាលថ្នាក់ក្រោម។ ការស៊ីសំណូក ការរំលោភអំណាច ការធ្វេសប្រហែសក្នុងការងារ និងការអនុវត្តខុសច្បាប់ក្នុងវិស័យហិរញ្ញវត្ថុ ក៏ជាគោលដៅសំខាន់ដែរ។ នេះបើតាមការផ្សាយរបស់ទីភ្នាក់ងារព័ត៌មាន Reuters ។
ទន្ទឹមគ្នានឹងបោសសម្អាតអំពើពុករលួយដោយផ្ទាល់ ចិនក៏នឹងលុបំបាត់បញ្ហាការិយាធិបតេយ្យក្នុងរដ្ឋាភិបាល និងបន្សុទ្ធមន្ត្រីដែលប្រព្រឹត្តកំហុសក្នុងបំពេញភារកិច្ចផងដែរ។ មិនត្រឹមទប់ស្កាត់ការរីករាលដាលអំពើពុករលួយពីខាងក្នុងឡើយ បក្សកុម្មុយនីស្តចិនដែលមានលោក ស៊ី ជិនភីង ជាអគ្គលេខាធិការនោះ ក៏នឹងចាត់វិធានការទប់ស្កាត់អ្នករកស៊ីផ្ដល់សំណូកឲ្យមន្ត្រីជាន់ខ្ពស់ដើម្បីបម្រើផលប្រយោជន៍ពួកគេដែរ។
សូមបញ្ជាក់ថា កាលពីឆ្នាំ២០១៨ មន្ត្រីចំនួនជាង៦សែននាក់ ត្រូវបានដាក់ពិន័យតាមកម្រិតទោសរបស់ខ្លួនពាក់ព័ន្ធអំពើពុករលួយនេះ ក្នុងចំណោមនេះមានមន្ត្រីជាន់ទាប ឬ «មន្ត្រីរុយ»និង មន្ត្រីថ្នាក់ក្រសួង ថ្នាក់ ឬថ្នាក់ខ្ពស់ជាងនេះ ឬហៅថា «មន្ត្រីខ្លា» ផងដែរ។ នេះបើតាមទិន្នន័យផ្សាយរបស់កាសែតរដ្ឋ China Daily ។ ប៉ុន្តែយុទ្ធនាការប្រឆាំងអំពើពុករលួយដែលោក ស៊ី អះអាងថា បានទទួលជោគជ័យធំធេងនោះ ត្រូវមើលឃើញថា ជាផ្លូវកម្ចាត់អ្នកប្រឆាំងរូបលោកដែរ។
មកទល់ពេលនេះ លោក ចូវ យ៉ុងខាង អតីតសមាជិកគណៈកម្មាធិការអចិន្ត្រៃយ៍ការិយាល័យនយោបាយរបស់គណៈកម្មាធិការមជ្ឈិមបក្ស គឺជាមន្ត្រីមានតំណែងខ្ពស់ជាងគេដែលរងគ្រោះដោយសារយុទ្ធនាការលោក ស៊ី ។ ជាអតីតរដ្ឋមន្ត្រីសន្តិសុខសាធារណៈ និងជាមេប៉ូលិសជាតិផងនោះ លោក ចូវ កំពុងអនុវត្តទោសជាប់ពន្ធនាគារអស់មួយជីវិត។ មន្ត្រីសំខាន់ៗក្នុងក្រសួងនេះ និងមន្ត្រីខ្លះទៀតដែលជាប់ទាក់ទងលោក ចូវ ក៏ត្រូវកាត់ទោសធ្ងន់ៗដែរ៕
Tag:
ចិន
ស៊ី ជិនភីង
អំពើពុករលួយ
© រក្សាសិទ្ធិដោយ thmeythmey.com