អន្តរជាតិ
ថៃបង្កើតភ្លៀងសិប្បនិម្មិតនៅបាងកក ដើម្បីដោះស្រាយខ្យល់កខ្វក់ រូបភាព The Nation
× អាជ្ញាធរថៃ នឹងបង្កើតភ្លៀងសិប្បនិម្មិតនៅរាជធានីបាងកកនៅថ្ងៃទី១៥ ខែមករា ដើម្បីដោះស្រាយបញ្ហាភាពអាប់អួរនៃបរិយាកាសដែលកាន់តែកាន់ធ្ងន់ធ្ងររហូតនាយករដ្ឋមន្ត្រី ប្រាយុទ្ធ ចន្ទអូចា ណែនាំឲ្យប្រជាជនកុំចេញពីផ្ទះ។ អាជ្ញាធរនឹងបញ្ជូនយន្តហោះទៅបាចសារធាតុគីមីលើផ្ទៃអាកាសខាងលើទីក្រុងបាងកក ដើម្បីបង្កើតភ្លៀងសិប្បនិម្មិតឡើង ប៉ុន្តែមានភ្លៀងឬអត់ ត្រូវអាស្រ័យលើកត្តាផ្សេងទៀត។
គុណភាពខ្យល់នៅទីក្រុងបាងកក កំពុងតែស្ថិតក្នុងស្ថានភាពធ្ងន់ធ្ងរខ្លាំងនៅថ្ងៃទី១៤ ដល់ថ្ងៃទី១៥ ខែមករា។ អាជ្ញាធរក្រុងបាងកក គ្រោងនឹងបង្កើតភ្លៀងសិប្បនិម្មិតដើម្បីកាត់បន្ថយបញ្ហាដែលបានគំរាមកំហែងសុខភាពប្រជាជនក្នុងទីក្រុងដ៏កកកុញមួយនេះ។ តាមផែនការ អាជ្ញាធរនឹងប្រើបច្ចេកទេសកែប្រែធាតុអាកាសតាមរយៈការបាចម្សៅគីមីពីយន្តហោះទៅក្នុងខ្យល់ ដើម្បីជំរុញកំណកពពក ដែលបន្ទាប់មកបង្កើតជាភ្លៀង។
យ៉ាងណាមិញ លោក Pralong Dumrongthai ប្រធាននាយកដ្ឋានត្រួតពិនិត្យជាតិពុលនិយាយថា ការបង្កើតភ្លៀងសិប្បនិម្មិតនឹងកើតឡើងនៅថ្ងៃទី១៥ ខែមករា។ ប៉ុន្តែភ្លៀងធ្លាក់ឬអត់ គឺពឹងផ្អែកលើកម្រិតសំណើម និងទិសដៅខ្យល់។ នេះបើតាមការផ្សាយរបស់កាសែត The Nation ។
ខណៈគុណភាពខ្យល់នៅថៃកាន់តែអាក្រក់នោះ ក្រុមអ្នកការពារបរិស្ថាន Greenpeace និយាយថា ក្រុងបាងកកស្ថិតក្នុងចំណាត់ទី១០នៃទីក្រុងមានខ្យល់បំពុលជាងគេ ប្រហាក់ប្រហែលនឹងទីក្រុងខ្លះរបស់ចិនដែរ។ មូលហេតុនាំឲ្យគុណភាពខ្យល់ធ្លាក់ចុះខ្លាំងបែបនេះ គឺផ្សែងចេញពីយានយន្តក្នុងទីក្រុង ការដុតដីកសិដ្ឋានក្បែរៗទីក្រុង និងផ្សែងចេញពីរោងចក្រផងដែរ។
ជាការដោះស្រាយបញ្ហានេះ អាជ្ញាធរក្រុងបាងកកបានចាត់វិធានការរយៈពេលខ្លីមួយចំនួនដូចជា ការសម្អាតផ្លូវ ការដាក់បម្រាមដុតភ្លើងក្រៅផ្ទះ ការទប់ស្កាត់ការបញ្ចេញផ្សែងពុលពីការដ្ឋាននានា និងការដោះស្រាយការកកស្ទះចរាចរណ៍ឲ្យបានលឿនទៀតផង។ អាជ្ញាធរក៏ប្រាប់ឲ្យប្រជាជនចៀសវាងប្រើប្រាស់យានយន្តផ្ទាល់ខ្លួន បើយានយន្តនោះបញ្ចេញផ្សែងខ្មៅ។
ករណីកខ្វក់ខ្យល់នេះ ធ្វើឲ្យប្រជាជនថៃមិនពេញចិត្តយ៉ាងខ្លាំង និងបានបញ្ចេញការមិនសប្បាយចិត្តរបស់ខ្លួនតាមរយៈពេលបណ្ដាញសង្គម និងទូរទស្សន៍។ ពិធីករទូរទស្សន៍ខ្លះក៏ណែនាំអ្នកមើលរបស់ខ្លួនពីប្រភេទម៉ាស់សម្រាប់ពាក់ការពារខ្លួន។ នៅថ្ងៃទី១៥ ខែមករា សន្ទស្សន៍គុណភាពខ្យល់ក្នុងទីក្រុងបាងកក (AQI) មាន១៥៦ ដែលជាកម្រិតមិនល្អសម្រាប់សុខភាពឡើយ៕
© រក្សាសិទ្ធិដោយ thmeythmey.com