​សម្តេចនាយក​រដ្ឋមន្ត្រី ហ៊ុន សែន ស្នើ​ឲ្យ​ពលរដ្ឋ​កម្ពុជា​ចូលរួម​បោះឆ្នោត​ជូន​វីរ​កីឡាការិនី កែ ឡេង សម្រាប់​ពានរង្វាន់​អត្ត​ព​លិ​ក​ឆ្នើម​ពិភពលោក​។ បច្ចុប្បន្ន​វីរ​កីឡាការិនី​រូបនេះ កំពុង​ស្ថិតនៅ​លេខ​រៀង​ទី​១២ ក្នុងចំណោម​បេក្ខភាព​ទាំង​២៥​រូប​/​ក្រុម ដែល​ចូលរួម​ប្រកួតប្រជែង​។ សម្រាប់​ការបោះឆ្នោត​ដំណាក់កាល​ទី​១ បិទ​ត្រឹម​ថ្ងៃទី​១៦ ខែមករា ឆ្នាំ​២០១៩​។​

 

«​ឥឡូវ​ខ្ញុំ​សូម​អំពាវនាវ​ជួយ​បោះឆ្នោត​ឲ្យ​កីឡាការិនី កែ ឡេង ដើម្បី​ក្លាយទៅជា​កីឡាការិនី​ឆ្នើម​លំដាប់​ពិភពលោក​។ ព្រោះ​គេ​រើស​ប៉ុន្មាន​ប្រទេស​ទៅ​ប្រកួត តាមរយៈ​ការបោះឆ្នោត​អន​ឡាញ​(Online)»​។ នេះ​ជា​សារ​អំពាវនាវ​របស់​សម្តេច​នាយករដ្ឋមន្ត្រី ហ៊ុន សែន នៅក្នុង​ពិធីបើកការដ្ឋាន​សាងសង់​ផ្លូវ​ក្រវាត់ក្រុង​ទី​៣ នៅ​ខេត្តកណ្តាល កាលពី​ព្រឹក​ថ្ងៃទី​១៤ ខែមករា ឆ្នាំ​២០១៩​។​

 

 

 

​កីឡាការិនី កែ ឡេង ជា​កីឡាការិនី​កម្ពុជា​តែ​ម្នាក់​គត់ ដែល​ត្រូវបាន​សមាគម​កីឡា​អន្តរជាតិ International World Games Association ជ្រើសរើស​ឲ្យ​ចូលរួម​ប្រកួត​ដណ្តើមពាន​រង្វាន់​អត្ត​ព​លិ​ក​ឆ្នើម​ពិភពលោក THE WORLD GAMES ATHLETE OF THE YEAR 2018​។ ព្រឹត្តិការណ៍​នេះ​មាន​អត្ត​ព​លិ​ក​ចូលរួម​ចំនួន​២៥​រូប​/​ក្រុម ខណៈ​បច្ចុប្បន្ន​វិ​រ​កីឡាការិនី​កម្ពុជា​ស្ថិតនៅ​លេខ​រៀង​ទី​១២ ដោយ​ទទួលបាន​អ្នកគាំទ្រ​ជាង​៣​ពាន់​នាក់​។​

 

​អ្នកគាំទ្រ​អាច​បោះឆ្នោត​នូវ​រៀងរាល់​២៤​ម៉ោង​ម្តង​។ បេក្ខជន​តែ​១០​ប៉ុណ្ណោះ ដែល​ត្រូវ​បន្តទៅ​វគ្គ​បន្ទាប់​សម្រាប់​ពានរង្វាន់ ដោយ​ការបោះឆ្នោត​ដំបូង​នឹង​បញ្ចប់​ត្រឹម​ថ្ងៃទី​១៦ ខែមករា នា​វេលា​ម៉ោង​៣​ទៀបភ្លឺ [​គិត​ម៉ោង​នៅ​កម្ពុជា​] ខណៈ​ការបោះឆ្នោត​សម្រាប់​ជ័យលាភី​ចុងក្រោយ​ត្រូវ​បន្ត​រហូតដល់​ថ្ងៃទី​១ ខែកុម្ភៈ វេលា​ម៉ោង​២​យប់ [​ម៉ោង​នៅ​កម្ពុជា​]​។​

 

​កីឡាការិនី កែ ឡេង​ជា​ម្ចាស់​មេដាយមាស​ប៉េតង់​ពិភពលោក​បី​ជំនាន់ (​ឆ្នាំ​២០១៣ ឆ្នាំ​២០១៥ និង​ឆ្នាំ​២០១៧) ហើយ​ឆ្នាំ​២០១៨​កន្លងមក គាត់​បានឈ្នះ​ពាន TROPHÉE L’ÉQUIPE នៅ​បារាំង លើ​វិញ្ញាសា​វាយ​គូ​នារី និង​បី​ទល់​បី​។​

 

https://www.theworldgames.org/awards/Athlete-of-the-Year-2018-58 និង​ស្វែងរក​ឈ្មោះ KE LENG រួច​ចុច​ពាក្យ Vote និង​បំពេញ​តាម​នីតិវិធី​ជា​បន្តបន្ទាប់​។​

 

​បេក្ខភាព​ផ្សេងទៀត​រួម កីឡាករ​អៃ​គី​ដូ​ស្វី​ស Renato Filippin, កីឡាករ Air Sports អូស្ត្រាលី Rudi Browning, កីឡាការិនី​បាញ់​ធ្នូ​កូ​ឡុំ​ប៊ី Sara Lopez, ក្រុមកីឡា​ការិនី Handball ក្រិ​ក​, ក្រុម​កីឡាករ​ទូក​កា​នូ​អាល្លឺម៉ង់​, កីឡាករ Dmitry Zharkov និង​កីឡាការិនី Kulikova នៃ​ក្រុមកីឡា​រាំ​រុស្ស៊ី កីឡាករ Fistball អាល្លឺម៉ង់ Patrick Thomas, ក្រុមកីឡា​ការិនី Floorball បួ​គី​ណា​ហ្វា​សូ​។​

 

​កីឡាការិនី Flying Disc អាមេរិក Dominique Fontenette, កីឡាករ​-​ការិនី​កាយសម្ព័ន្ធ​រុស្ស៊ី Marina Chernova និង Georgil Pataraia, កីឡាករ​ជឺ​ជិត​ស៊ូ​អាមេរិក Mazimiliano Ulloa, កីឡាការិនី​កា​រ៉ា​តេ​អេ​ស្ប៉ា​ញ Sandra Sanchez, កីឡាករ​ប្រដាល់​អ៊ុយ​ក្រែ​ន Orfan Sananzade, កីឡាការិនី Korfball ហូ​ឡង់ Suzanne Struik, ក្រុម​កីឡាករ Lacrosse អាមេរិក​។​

 

​កីឡាការិនី​មួយ​ថៃ​រុស្ស៊ី Svetlana Vininkova, កីឡាការិនី Orienteering ស៊ុយអែត Tove Alexandersson, កីឡាការិនី Powerlifting អាមេរិក Jennifer Thompson, កីឡាករ Roller Sports អ៊ីតាលី Luca Lucaroni, កីឡាការិនី Sport Climbing ស្លូ​វេ​នី Janja Garnbret, កីឡាករ​-​ការិនី​អេ​ហ្ស៊ី​ប Nour El Tayeb និង Ali Farag នៃ​កីឡា Squash, កីឡាការិនី​ស៊ូ​ម៉ូ​រុស្ស៊ី Anna Poliakova, ក្រុម​កីឡាករ​ទាញព្រ័ត្រ​អាយុ​ក្រោម​២៣​ឆ្នាំ​ស្វី​ស និង​កីឡាការិនី Underwater Sports ហុង​គ្រី Petra Senanszky៕

​