អន្តរជាតិ
កំណត់ត្រាថ្មី! រូបពងមាន់មួយ មានការចុច Like ជាង៣៧លានលើ Instagram
× រូបថតស៊ុតមាន់មួយ ដែលបង្ហោះដោយគណនី Instagram ឈ្មោះ «world_record_egg» កាលពីថ្ងៃទី៤ ខែមករា ទទួលបានការចុច Like រហូតទៅជាង៣៧លានដង ក្នុងរយៈពេលសប្តាហ៍ប៉ុណ្ណោះ។ សម្រាប់ Guinness World Records នេះជាកំណត់ត្រាថ្មីនៅលើពិភពលោក ដោយបំបែកកំណត់ត្រារបស់តារាល្បីល្បាញអាមេរិក Kylie Jenner។
កាលពីថ្ងៃទី៧ ខែកុម្ភៈ ឆ្នាំ២០១៨ Kylie Jenner បានបង្ហោះរូបទាក់ទងនឹងការប្រសូតកូនស្រីឈ្មោះ Stormi ។ រូបនេះទទួលបានការចុច Like ជាង១៨លានពីអ្នកប្រើប្រាស់ Instagram។ ដោយឃើញតួលេខអ្នក Like រក្សាក្នុងរង្វង់១៨លាន ម្ចាស់គណនី «world_record_egg» បានប្រកាសបំបែកកំណត់ត្រា។
គណនីដែលបង្ហោះដោយជនមិនស្គាល់ឈ្មោះ និងមានរូបថតស៊ុតតែមួយសន្លឹកនេះ ក៏ទទួលបាន Followers ជាង៥លាននាក់ផងដែរ។ ក្រៅពីការចុច Like ជាង៣៧លាន ក៏មានការបញ្ចេញយោបល់ទៅវិញទៅមកជិត២លានដងផងដែរ។ នេះបើគិតត្រឹមតួលេខនៅព្រឹកថ្ងៃទី១៥ ខែមករា។
ក្រោយការបំបែកកំណត់ត្រារបស់ខ្លួន នាងបានបង្ហោះឡើងវិញវីដេអូមួយរបស់ខ្លួន ដែលសរសេរចំណងជើងថា «Take that little egg»។ វីដេអូនេះ ទទួលបានការចុច Like ជាង៣លានដងផងដែរ។
កាលពីឆ្នាំ២០១៤ ម្ចាស់កំណត់ត្រាដែលទទួលបានការចុច Like ជាងគេនៅ Instagram គឺឃ្លីបរបស់តារាចម្រៀង Justin Bieber និង Will Smith ដែលទទួលបានជាង១,៥លាន Likes។ បន្ទាប់មក រូបថតអាពាហ៍ពិពាហ៍របស់ Kim Kardashian និង Kanye West ទទួលបាន ២,៤លាន Likes រីឯរូបថតពរពោះរបស់ Beyonce មានការចុច Like ជាង៣,៥លានផងដែរ៕
© រក្សាសិទ្ធិដោយ thmeythmey.com