បឹងកេត៖ វឌ្ឍនាកាផ្ទេរទៅក្លិប PKNS FC ដែលដឹកនាំដោយអតីតគ្រូជម្រើសជាតិម៉ាឡេស៊ី

កីឡាជាតិ

ជាតិ

បឹងកេត៖ វឌ្ឍនាកាផ្ទេរទៅក្លិប PKNS FC ដែលដឹកនាំដោយអតីតគ្រូជម្រើសជាតិម៉ាឡេស៊ី

15, Jan 2019 , 1:11 pm

រូបភាព

K. Rajagopal គ្រូបង្វឹកក្លិប PKNS និងចាន់ វឌ្ឍនាកា។ រូបថត៖ ហ្វេសប៊ុក PKNS និង Chan Vathanaka

ដោយ:

ក្លិបបាល់ទាត់បឹងកេតបានអះអាងថា កីឡាករ ចាន់ វឌ្ឍនាកា ត្រូវបានផ្ទេរទៅលេងឲ្យក្លិបក្របខណ្ឌលីគកំពូលម៉ាឡេស៊ី PKNS FC សម្រាប់រដូវកាលឆ្នាំ២០១៩-២០២០។ នេះជាការប្រកបអាជីពលើទឹកដីម៉ាឡេស៊ីលើកទី២សម្រាប់ វឌ្ឍនាកា បន្ទាប់ពីរូបគេលេងឲ្យក្លិប Pahang FA កាលពីរដូវកាលមុន។

កីឡាករ ចាន់ វឌ្ឍនាកា នឹងត្រូវជាមួយមិត្តរួមជាតិ ធារី ចន្ថាប៊ីន ក្នុងពានរង្វាន់ក្របខណ្ឌលីកកំពូលម៉ាឡេស៊ី បន្ទាប់ពីរូបគេត្រូវបានផ្ទេរពីបឹងកេតទៅលេងឲ្យក្លិប PKNS FC សម្រាប់រដូវកាលឆ្នាំ២០១៩។ វឌ្ឍនាកា ជាកីឡាករកម្ពុជាទី២ ដែលបានចុះកិច្ចសន្យាលេងក្លិបលីកកំពូលម៉ាឡេស៊ី បន្ទាប់ពីកីឡាករ ធារី ចន្ថាប៊ីន ចុះកិច្ចសន្យារយៈពេល១ឆ្នាំលេងឲ្យក្លិប Terangganu។

នេះជាការចាកចេញទៅប្រកបអាជីពលើកទី២លើទឹកដីម៉ាឡេស៊ីសម្រាប់កីឡាករ ចាន់ វឌ្ឍនាកា ខណៈកាលពរដូវកាលមុនរូបគេបានចុះកិច្ចសន្យារយៈពេល១ឆ្នាំលេងឲ្យក្លិប Pahang FA។ ប៉ុន្តែត្រូវបានចែកផ្លូវគ្នាវិញ ក្រោយរួមរស់បានពាក់កណ្តាលរដូវ កាល ក្រោមហេតុផលធ្វើមិនបានដូចនូវអ្វីដែលក្លិបរំពឹងទុក។

បើគិតទាំងលើកនេះ កីឡាករ ចាន់ វឌ្ឍនាកា ចេញទៅប្រកបអាជីពនៅក្រៅប្រទេសជាលើកទី៣ ខណៈលើកទី១លេងឲ្យក្លិបក្របខណ្ឌលីគទី៣របស់ជប៉ុន Fujieda MYFC តែរូបគេមិនបានបង្ហាញខ្លួនក្នុងការប្រកួតផ្លូវការជាមួយក្លិបនេះឡើយ។ ចំណែកលើកទី២និងលើកទី៣នៅលីគកំពូលម៉ាឡេស៊ីជាមួយ Pahang FA និង PKNS FC។

ទោះបីមានការអះអាងពាក់ព័ន្ធការផ្ទេរកីឡាករ ចាន់ វឌ្ឍនាកា ពីក្លិបបឹងកេតក៏ដោយ ប៉ុន្តែពុំទាន់ឃើញក្លិប PKNS FC បង្ហាញខ្លួនកីឡាកររូបនេះជាផ្លូវការនៅឡើយទេ។

PKNS FC ជាក្លិបចំណាស់មួយរបស់ម៉ាឡេស៊ី ដែលប្រើប្រាស់កីឡដ្ឋាន Shah Alam Stadium។ ក្លិបនេះធ្លាប់បានតំណែងជើងឯក Liga Premier Malaysia នៅឆ្នាំ២០១១ និងឈ្នះជើងឯក Malaysia FAM League ចំនួន៣លើក។

បច្ចុប្បន្ន ក្លិបស្ថិតក្រោមការដឹកនាំបង្វឹករបស់លោក K. Rajagopal អតីតគ្រូបង្វឹកជម្រើសជាតិម៉ាឡេស៊ី ដែលបានជួយឲ្យម៉ាឡេស៊ី ឈ្នះមេដាយមាសស៊ីហ្គេមឆ្នាំ២០០៩ និងពាន AFF Suzuki Cup ឆ្នាំ២០១០៕