អន្តរជាតិ
×![]()
ដោយ: តន ចាន់រិទ្ធារ៉ា
រដ្ឋមន្ត្រីការបរទេសរុស្ស៊ី Sergey Lavrov បានប្រាប់ឲ្យជប៉ុនឈប់យកអាមេរិកមកពាក់ព័ន្ធការចរចាស្វែងរកសន្តិភាពក្របខណ្ឌទ្វេភាគី។ លោក Lavrov លើកឡើងបែបនេះ ខណៈរុស្ស៊ី និងជប៉ុនកំពុងជជែកគ្នាបង្កើតសន្ធិសញ្ញាសន្តិភាពទ្វេភាគី ដែលមិនទាន់ត្រូវបានចុះហត្ថលេខាឡើយតាំងពីបញ្ចប់សង្គ្រាមលោកលើកទីពីរមកនោះ។ មិនមែនតែរឿងអូសអាមេរិកមកពាក់ព័ន្ធជម្លោះទឹកដីទេ សូម្បីតែប្រព័ន្ធមីស៊ីលអាមេរិកនៅជប៉ុន ក៏ត្រូវលោក Lavrov ព្រមានថា អាចធ្វើឲ្យការចរចារាំងស្ទះដែរ។
រុស្ស៊ី និងជប៉ុន កំពុងប្រឹងប្រែងចរចាដើម្បីសម្រេចឲ្យសន្ធិសញ្ញាសន្តិភាពមួយ។ រដ្ឋមន្ត្រីការបរទេសជប៉ុន Taro Kono បានទៅទស្សនកិច្ចនៅទីក្រុងមូស្គូដើម្បីជជែកជាមួយសមភាគីរុស្ស៊ី Sergey Lavrov ប៉ុន្តែការខ្វែងគំនិតនៅតែមានដដែល ពិសេសជំហរជប៉ុនក្នុងការទាមទារបណ្ដាកោះនៅភាគខាងជើងដែលកំពុងគ្រប់គ្រងដោយរុស្ស៊ី និងតួនាទីរបស់អាមេរិកផង។
ថ្មីៗនេះ ជប៉ុនបានប៉ុនប៉ងអូសអាមេរិកចូលក្នុងការចរចាជាមួយរុស្ស៊ី។ នៅដើមខែមករានេះ មន្ត្រីជំនិតនាយករដ្ឋមន្ត្រីជប៉ុនម្នាក់និយាយថា ក្រុងតូក្យូចង់ឲ្យអាមេរិកយល់ពីសារសំខាន់ក្នុងការបញ្ចប់ការចរចារវាងរុស្ស៊ី និងជប៉ុនដើម្បីឈានទៅបង្កើតសន្ធិសញ្ញាសន្តិភាព ហើយយកប្រើប្រាស់វាជាមធ្យោបាយដើម្បីទប់ទល់ចិន។ យ៉ាងណាមិញ លោក Lavrov ចាត់ទុកការព្យាយាមនេះជារឿងហួសហេតុ និងប្រាប់លោក Kono រួចហើយពីជំហររបស់រុស្ស៊ី។
ក្នុងសន្និសីទសារព័ត៌មានថ្ងៃទី១៤ ខែមករា ប្រមុខការទូតរុស្ស៊ីអះអាងថា ការប៉ុនប៉ងរបស់ជប៉ុន ធ្វើបង្កើតជាការខ្វែងគំនិតក្នុងពេលចរចា។ ខណៈការចរចាដើម្បីសម្រេចឲ្យបានសន្ធិសញ្ញាសន្តិភាពចាប់ផ្ដើមនៅមូស្គូ លោក Lavrov ក៏លើកឡើងពីប្រព័ន្ធមីស៊ីលអាមេរិកដែលបានគ្របដណ្ដប់ដល់ទឹកដីជប៉ុនផង។ លោកចាត់ទុកវាជាឧបសគ្គសម្រាប់ការចរចា ទោះជាអាមេរិកចង់បកស្រាយថា គោលដៅរបស់វាប្រឆាំងតែកូរ៉េខាងជើងមួយក្ដី។
មិនទាន់អស់ឡើយ ដើម្បីបញ្ចប់ការស្វែងរកសន្ធិសញ្ញាសន្តិភាពនោះ រុស្ស៊ីក៏បានដាក់លក្ខខណ្ឌឲ្យជប៉ុនទទួលស្គាល់ប្រជុំកោះគូរីលជាទឹកដីរុស្ស៊ីដែរ។ ជម្លោះដែនអធិបតេយ្យនេះហើយ ដែលទប់ស្កាត់ជប៉ុន និងរុស្ស៊ីចុះហត្ថលេខាលើកិច្ចព្រមព្រៀងសន្តិភាពក្នុងពេល៧០ឆ្នាំមកនេះ។ ត្រង់ចំណុចនេះ លោក Lavrov និយាយថា បើជប៉ុនមិនព្រមទេ ដំណើរការចរចាលើបញ្ហាផ្សេងទៀត ពិបាកនឹងទទួលបានលទ្ធផលណាស់។
ប្រជុំកោះគូរីល ជាទឹកដីដែលរុស្ស៊ីកាន់កាប់ផ្លូវការក្រោយបញ្ចប់សង្គ្រាមលោកលើកទីពីរមកម្ល៉េះ ដោយក្រុងមូស្គូអះអាងថា កម្មសិទ្ធិរបស់ខ្លួនលើដែនកោះនេះមានចែងក្នុងកិច្ចព្រមព្រៀងអន្តរជាតិផង។ ជប៉ុនហៅប្រជុំកោះនេះថា ទឹកដីខាងជើង ដែលមានចែងក្នុងរដ្ឋធម្មនុញ្ញ ហើយតែងប្រកាសកម្មសិទ្ធិលើកោះនេះដែរ។ ប៉ុន្តែលោក Lavrov បែរជាប្រាប់ឲ្យជប៉ុនផ្លាស់ប្ដូរចំណុចវិញ៕
Tag:
រុស្ស៊ី
ជប៉ុន
អាមេរិក
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
