នាជំនួបឆ្នាំទី៣ជាមួយអ្នកសារព័ត៌មានកាលពីល្ងាចថ្ងៃទី១១ខែមករាកន្លងទៅ សម្តេចនាយករដ្ឋមន្ត្រី ហ៊ុនសែន បានលើកទឹកចិត្តដល់អ្នកសារព័ត៌មានចូលរួមផ្តល់គំនិត និងតាមដានការអនុវត្តគោលនយោបាយរបស់រដ្ឋាភិបាល ជាពិសេសនៅកម្រិតស្ថាប័ន និងបុគ្គល។
«[…] ចង់ឲ្យសារព័ត៌មានរិះគន់ស្ថាបនា ទាំងកម្រិតគោលនយោបាយ ពិសេសការអនុវត្តរបស់ស្ថាប័ន និងរបស់បុគ្គល។ យើងត្រូវបើកឱកាសឲ្យអ្នកសារព័ត៌មានចូលរួមចំណែកដល់ផ្នែកគោលនយោបាយ ហើយតាមដានការអនុវត្តគោលនយោបាយនោះ។ ចំណុចនេះអាចចូលរួមដល់ការកែលម្អ ស្ថានភាពទាំងឡាយ ដែលជាតម្រូវការរបស់ប្រជាជន»។ នេះជាប្រសាសន៍ និងជាបំណងមួយរបស់ប្រមុខរដ្ឋាភិបាលកម្ពុជា សម្តេច ហ៊ុន សែន ដែលត្រូវបានបង្ហាញទៅកាន់អ្នកសារព័ត៌មាន នៅក្នុងជំនួបកាលពីសប្តាហ៍មុន។
សម្តេចនាយករដ្ឋមន្ត្រីបានថ្លែងយ៉ាងនេះទៅកាន់អ្នកកាសែតជាច្រើនពាន់នាក់ តែប៉ុន្មានថ្ងៃមុនដល់ខួបឆ្នាំទី៣៤នៃការគ្រប់គ្រងអំណាចជានាយករដ្ឋមន្ត្រីរបស់កម្ពុជា។ សម្តេចនាយករដ្ឋមន្ត្រី និងជាប្រធានគណបក្សកាន់អំណាចផងបានបញ្ជាក់បន្ថែមយ៉ាងដូច្នេះ៖«មិនមែនគោលនយោបាយណា ដាក់ទៅសុទ្ធតែត្រូវនោះទេ។ អ្នកសារព័ត៌មានមានភារកិច្ចជួយ តាំងពីភាពសមរម្យ និងមិនសមរម្យនៃការអនុវត្តនោះ»។
យល់ពីការពិចារណារបស់ប្រមុខរដ្ឋាភិបាល លោក ផៃ ស៊ីផាន ដែលជាអ្នកនាំពាក្យរបស់រដ្ឋាភិបាលបានពន្យល់បន្ថែមអំពីការយល់ឃើញរបស់សម្តេចនាយករដ្ឋមន្ត្រីដែលថា គ្មានការអភិវឌ្ឍណាមួយដែលធ្វើឡើងដោយគ្មានសារព័ត៌មាននោះឡើយ។ សម្រាប់មន្ត្រីជាន់ខ្ពស់ដដែល ការចែករំលែករបស់អ្នកកាសែតទៅក្នុងគោលនយោបាយ និងការតាមដានការអនុវត្តគោលនយោបាយនោះ វានឹងបានជាប្រយោជន៍ច្រើនដល់រដ្ឋាភិបាល និងប្រជាពលរដ្ឋ។ អ្នកនាំពាក្យរដ្ឋាភិបាល លោក ផៃ ស៊ីផាន បានពន្យល់យ៉ាងដូច្នេះថា៖«សារព័ត៌មានដែលគ្រាន់តែបង្កើតឡើងដើម្បីតែប្រឆាំងរដ្ឋាភិបាល ពុំមានប្រយោជន៍អ្វីទេ»។
អធិប្បាយតបទៅនឹងប្រសាសន៍របស់ប្រមុខរដ្ឋាភិបាល លោក កៃ គឹមសុង ដែលជានាយកប្រតិបត្តិការនៃសារព័ត៌មានខ្មែរថាមស៍ (Khmer Times) បានបញ្ជាក់ថា ការចូលរួមរបស់អ្នកសារព័ត៌មានទៅគ្រប់ទីកន្លែង វាគឺជាតួនាទីរបស់អ្នកសារព័ត៌មានរួចទៅហើយ។ ប៉ុន្តែលោក គឹមសុង បញ្ជាក់បន្ថែមថា ការលើកឡើងរបស់សម្តេច ហ៊ុន សែន នៅក្នុងជំនួបជាមួយអ្នកសារព័ត៌មាននោះ ដែលលោកយល់ស្របដែលនោះ គឺជាការដាស់តឿន និងជាការក្រើនរំឭករបស់ប្រមុខរដ្ឋាភិបាលដល់អ្នកសារព័ត៌មានទៅវិញទេ។
លោក កៃ គឹមសុង មានប្រសាសន៍ថា៖«វាគឺជាការងាររបស់អ្នកកាសែតដែលត្រូវសង្កេត ធ្វើការងារពី A ដល់ Z។ វាជាកាតព្វកិច្ចរបស់អ្នកកាសែតដែលត្រូវតាមដានទាំងបញ្ហាជាតិ និងបញ្ហាអន្តរជាតិ។ ប៉ុន្តែខ្ញុំយល់ថា ការលើកឡើងរបស់ប្រមុខរដ្ឋាភិបាលនោះ គឺការលើកទឹកចិត្តបន្ថែមដែលប្រាប់អ្នកកាសែតយើង កុំឲ្យភ្លេចរឿងធំៗ និងមើលបញ្ហាឲ្យជ្រៅ រួមទាំងអាចចេះវិភាគផង»។
សម្តេច ហ៊ុន សែន បានមានប្រសាសន៍ថា លោកចង់ឃើញអ្នកកាសែតចូលរួមចំណែកដល់គម្រិតគោលនយោបាយ។ ចំពោះអ្នកកាសែតដ៏មានពិសោធន៍លោក កៃ គឹមសុង ឃ្លាមួយនេះរបស់ប្រមុខរដ្ឋាភិបាល មិនបានបាញ់ឆ្ពោះតែទៅសហគមន៍អ្នកសារព័ត៌មាននោះឡើយ។ លោក គឹមសុង បន្ថែមយ៉ាងដូច្នេះ៖«នេះក៏ជាសារមួយពីប្រមុខរដ្ឋាភិបាលដែលសំដៅដាស់តឿនមន្ត្រីរដ្ឋាភិបាលផងដែរថា ពួកគេត្រូវឆ្លើយតបទៅអ្នកកាសែត និងមិនត្រូវលាក់ព័ត៌មានឡើយ។ ទាំងមន្ត្រី ទាំងអ្នកកាសែត យើងបំពេញការងារដើម្បីប្រយោជន៍ពលរដ្ឋ»។
បើនិយាយទម្លាក់ការទទួលខុសត្រូវតែទៅលើមន្ត្រី ដែលថាពួកគេលាក់ព័ត៌មាន លោក ផៃ ស៊ីផាន ដែលជាអ្នកនាំពាក្យរដ្ឋាភិបាលបានឆ្លើយតបថា អ្នកសារព័ត៌មានក៏ត្រូវមានសមត្ថភាពបំពេញកាតព្វកិច្ចរបស់ពួកគេផងដែរ។ មន្ត្រីជាន់ខ្ពស់របស់រដ្ឋាភិបាលបានបញ្ជាក់បន្ថែមផងដែរថា រដ្ឋាភិបាលរបស់លោកបានខិតខំបង្កើតអ្នកនាំពាក្យនៅគ្រប់ស្ថាប័នរបស់រដ្ឋ ហើយបានលើកទឹកចិត្តឲ្យអ្នកនាំពាក្យធ្វើការជាមួយសារព័ត៌មានឲ្យមានប្រសិទ្ធភាពផងដែរ៕