អន្តរជាតិ
នយោបាយអន្តរជាតិ
ថៃ ពិចារណាប្រើប្រាស់ជីវឥន្ធនៈនិងបិទសាលារៀន ដើម្បីទប់ទល់នឹងបញ្ហាខ្យល់កខ្វក់
×![]()
ការប្រើប្រាស់ឥន្ធនៈជីវៈ B20 ដែលពុំសូវប៉ះពាល់ដល់បរិស្ថាន និងការបិទសាលារៀនជាបណ្តោះអាសន្ននៅតំបន់រងឥទ្ធិពលខ្លាំងពីខ្យល់កខ្វក់ គឺស្ថិតនៅក្នុងចំណោមការលើកឡើងសំខាន់ៗ របស់លោលនាយករដ្ឋមន្ត្រីថៃ ប្រាយុទ្ធ ចាន់អូចា ។ ការលើកឡើងរបស់មេដឹកនាំរូបនេះ ធ្វើឡើងស្របពេលដែលរដ្ឋាភិបាលថៃកំពុងដុតដៃដុតជើង ដោះស្រាយវិបត្តិខ្យល់កខ្វក់ដែលកំពុងគ្របដណ្តប់លើទីក្រុងបាងកកជាច្រើនថ្ងៃមកហើយ។
ជាមួយការអំពាវនាវកុំឲ្យប្រជាពលរដ្ឋស្លន់ស្លោ ឧត្តមសេនីយ៍ ប្រាយុទ្ធ នៅថ្ងៃអង្គារ ទី១៥ មករា បានប្រកាសពីគម្រោងជួបបណ្តាភ្នាក់ងារពាក់ព័ន្ធ នៅថ្ងៃពុធនេះ។ ជំនួបនេះគឺធ្វើឡើងក្នុងគោលដៅពិភាក្សាពីការប្រមូលផ្តុំកម្លាំងគ្នា និងដាក់ចេញដំណោះស្រាយទប់ទល់នឹងបញ្ហាខ្យល់កខ្វក់។ នេះបើតាមការចុះផ្សាយរបស់កាសែត Bangkok Post ។
លោក ប្រាយុទ្ធ បាននិយាយថា មូលហេតុចម្បងនៃការបំពុលខ្យល់គឺបណ្តាលមកពី ផ្សែងពុលដែលចេញពីយានយន្ត។ ត្រង់ចំណុចនេះ លោកនាយករដ្ឋមន្ត្រីរូបនេះបានបញ្ជាក់ថា លោកបានចេញបញ្ជាទៅកាន់សាលាក្រុង និងក្រសួងដឹកជញ្ជូនថៃ ស្វះស្វែងរកវិធីសាស្ត្រដើម្បីឲ្យម្ចាស់យានយន្តផ្លាស់ប្តូរមកប្រើប្រាស់ឥន្ធនៈជីវៈ B20 ដែលល្អសម្រាប់បរិស្ថានវិញ។
បន្ថែមពីលើនេះ នាយករដ្ឋមន្ត្រីថៃ ក៏បានបញ្ជាឲ្យក្រសួងថាមពលថៃ ពន្លឿនផលិតកម្មប្រេងឥន្ធនៈប្រភេទនេះផងដែរ។ ទន្ទឹមនឹងគ្នានេះ លោក ប្រាយុទ្ធ ក៏បានណែនាំឲ្យភ្នាក់ងារពាក់ព័ន្ធដោះស្រាយបញ្ហាផង់ធូលី ដែលចេញពីទីតាំងការដ្ឋានសំណង់ និងការដុតដំណាំ។
ដោយសំដៅលើគម្រោងបិទសាលារៀនជាបណ្តោះអាសន្ន ប្រមុខរបបសឹកថៃ លោក ប្រាយុទ្ធ បាននិយាយថា ស្ថានការណ៍បច្ចុប្បន្នពុំទាន់តម្រូវឲ្យធ្វើបែបនេះនៅឡើយទេ។ ទោះបីជាយ៉ាងនេះក្តី នៅក្នុងតំបន់ដែលរងផលប៉ះពាល់ខ្លាំងដោយសារខ្យល់កខ្វក់នេះ ការសម្រេចចិត្តនឹងត្រូវក្លាយជាកាតព្វកិច្ចរបស់ក្រសួងអប់រំ។
បន្ថែមពីការណែនាំរបស់លោកប្រាយុទ្ធ ប៉ូលិសថៃ ក៏បានបង្កើតច្រកត្រួតពិនិត្យដើម្បីពិនិត្យរថយន្តធុនធំ និងយានយន្តប្រើប្រាស់ម៉ាស៊ូតផ្សេងទៀត មុននឹងអនុញ្ញាតឲ្យពួកគេបើកបរចូលទៅក្នុងក្រុងបាងកង ចន្លោះពីម៉ោង១០ព្រឹក ដល់ ម៉ោង៣រសៀល។
ក្រោយពីមានភ្លៀងមួយមេកាលពីព្រឹកថ្ងៃទី១៥ កម្រិតខ្យល់កខ្វក់ក្នុងទីក្រុងបានធ្លាក់ចុះ។ យោងតាមការឲ្យដឹងរបស់នាយកដ្ឋានឧតុនិយមថៃ ការធ្លាក់ភ្លៀងនេះបានកើតឡើងដោយសារឥទ្ធិពលខ្យល់ពីភាគខាងអាគ្នេយ៍ ដែលនាំយកទឹកភ្លៀងពីឈូងសមុទ្រថៃទៅកាន់ក្រុងបាងកក។ នាយកដ្ឋានដដែលនេះ ក៏បានបញ្ជាក់ទៀតថា ឥទ្ធិពលខ្យល់ត្រជាក់ពីប្រទេសចិននឹងទៅដល់ប្រទេសថៃនៅថ្ងៃទី១៦ ឬថ្ងៃទី១៧ ខែមករា ដែលនាំយកទឹកភ្លៀងទៅកាន់ទីក្រុង៕
Tag:
ថៃ
ខ្យល់កខ្វក់
© រក្សាសិទ្ធិដោយ thmeythmey.com
