ជាតិ
កម្ពុជា នឹងអនុវត្តន៍ភូមិគំរូវប្បធម៌នៅតាមបណ្តាខេត្តដើម្បីជួយកាត់បន្ថយភាពក្រីក្រ
× សៀមរាប៖ កម្ពុជា នឹងអនុវត្តន៍ភូមិគំរូនៅតាមបណ្តាខេត្តនានា ដើម្បីជួយកាត់បន្ថយភាពក្រីក្ររបស់ប្រជាជន ឆ្ពោះទៅរកប្រទេសដែលមានចំណូលមធ្យមកម្រិតខ្ពស់ នៅឆ្នាំ២០៣០។ លោក សួស យ៉ារ៉ា អគ្គនាយកក្រុមប្រឹក្សាវប្បធម៌អាស៊ីកម្ពុជា បានថ្លែងនៅក្នុងសន្និសីទសារព័ត៌មាននៅសណ្ឋាគារសុខា ខេត្តសៀមរាប នាថ្ងៃទី១៥ មករា ថា គម្រោងនេះឈ្មោះថា«តេជោភូមិ១០០» នឹងសាកល្បងគំរូភូមិនៅតាមចម្ការ ដោយក្នុងមួយខេត្ត អាចជ្រើសរើសយកភូមិមួយណា ជាតេជោភូមិ១០០។
លោក សួស យ៉ារ៉ា បានបញ្ជាក់ទៀតថា គម្រោងនេះជាគំនិតរបស់សម្តេចនាយករដ្ឋមន្ត្រីកម្ពុជា ប៉ុន្តែឈ្មោះ«តេជោភូមិ១០០» មិនមែនឈ្មោះតេជោ ហ៊ុន សែន ទេ។ លោកសួស យ៉ារ៉ា ពន្យល់ថាតេជោនេះសំដៅទៅលើបច្ចេកវិទ្យា, ការតភ្ជាប់មនុស្សជាតិ, ការគ្រប់គ្រងបរិស្ថានបានល្អ, ប្រជាជនមានសុខភាព និងសុខុមាលភាពល្អ ដោយផ្អែកលើកសិកម្មដែលជាចំណុចពិសេសដែលធ្វើឲ្យកម្ពុជាឈានទៅមុខទៀត។ «ការពឹងផ្អែកលើកសិកម្មនេះហើយយើងនឹងយកភូមិ១០០ ដើម្បីធ្វើជាគំរូ»។ លោក សួស យ៉ារ៉ា បន្ថែមដូច្នេះ។
សូមបញ្ជាក់ថា ការប្រកាសជាផ្លូវការនៃក្រុមប្រឹក្សាវប្បធម៌អាស៊ី (ACC)នេះ បានធ្វើឡើងនៅថ្ងៃទី១៥-១៦ខែមករា ឆ្នាំ២០១៨ ដែលរៀបចំនៅសណ្ឋាគារសុខា ខេត្តសៀមរាប និងដែលមានតំណាងភ្ញៀវជាតិ និងអន្តរជាតិ ប្រមាណ៨០០នាក់ មកពី ២៦ប្រទេស នៅតំបន់អាស៊ី ចូលរួម៕
Tag:
ជាតិ
វប្បធម៌
ភូមិគំរូ
ACC
សៀមរាប
© រក្សាសិទ្ធិដោយ thmeythmey.com