ជាតិ
សេដ្ឋកិច្ច
សម្តេច ហ៊ុន សែន ស្នើឲ្យឥណ្ឌូណេស៊ីពង្រឹងពាណិជ្ជកម្ម ទេសចរណ៍ និងការហោះហើរត្រង់ ជាមួយកម្ពុជា ជំនួបរវាងនាយករដ្ឋមន្រ្តីកម្ពុជា និង អនុប្រធានាធិបតីឥណ្ឌូណេស៊ី
× សម្តេចនាយករដ្ឋមន្ត្រី ហ៊ុន សែន បានស្នើឲ្យពង្រឹងទំហំពាណិជ្ជកម្ម និងប្រឹងប្រែងជំរុញទេសចរណ៍រវាងកម្ពុជានិងឥណ្ឌូណេស៊ី។ ការស្នើរបស់នាយករដ្ឋមន្ត្រីកម្ពុជា គឺធ្វើឡើងក្នុងជំនួបជាមួយលោក លោក Jusuf Kalla អនុប្រធានាធិបតីឥណ្ឌូណេស៊ី នៅខេត្តសៀមរាប នាថ្ងៃទី១៦ ខែមករា ឆ្នាំ២០១៩នេះ។
ប្រមុខរដ្ឋាភិកម្ពុជា ក៏ស្នើឲ្យមានជើងហោះហើរត្រង់ រវាងកម្ពុជា និងឥណ្ឌូណេស៊ីផងដែរ។ ទំព័រហ្វេសប៊ករបស់សម្តេច ហ៊ុន សែន បានសរសេរពីខ្លឹមសារនៃជំនួបនោះយ៉ាងដូច្នេះថា៖«មេដឹកនាំនៃប្រទេសទាំងពីរ បានពិភាក្សាអំពីបញ្ហាក្នុងតំបន់មួយចំនួន រួមទាំងសន្តិភាព ដែលកម្ពុជានិងឥណ្ឌូណេស៊ីអាចចូលរួមជួយបាន ព្រោះប្រទេសទាំងពីរ ក៏ធ្លាប់បានឆ្លងកាត់សង្គ្រាមនិងបញ្ហាជាច្រើន ដែលអាចយកបទពិសោធទាំងនោះទៅជួយប្រទេស ដែលកំពុងមានបញ្ហាទាំងនោះ»។
លោក Jusuf បានដឹកគណៈប្រតិភូ មកកាន់កម្ពុជា គឺដើម្បីចូលរួមក្នុងកិច្ចប្រជុំលើកទី២៧នៃវេទិកាសភាអាស៊ី-ប៉ាស៊ីហ្វិក ( APPF) និងអបអរសាទរក្នុងការប្រកាសជាផ្លូវការនៃក្រុមប្រឹក្សាវប្បធម៌អាស៊ី (ACC)។ ក្នុងជំនួបជាមួយសម្តេច ហ៊ុន សែន លោក Jusuf បានលើកឡើងថា បេសកកម្មរបស់លោកនាពេលនេះ ក៏ដើម្បីសិក្សាឈ្វេងយល់ និងពង្រឹងបន្ថែមទៀតនូវកិច្ចសហប្រតិបត្តិការ ឲ្យកាន់តែល្អរវាងប្រទេសទាំងពីរដែរ។
បើតាមព័ត៌មានលើទំព័រហ្វេសប៊ុករបស់នាយករដ្ឋមន្ត្រីកម្ពុជាដដែល លោក Jusuf បានបញ្ជាក់យ៉ាងដូច្នេះថា៖«នេះ ជាសកម្មភាពមួយ ដែលបានឆ្លុះបញ្ចាំងពីការចូលរួមធ្វើយ៉ាងណារក្សានិងពង្រឹងទំនាក់ទំនង ឲ្យកាន់តែជិតស្និទ្ធរវាងប្រទេសទាំងពីរ ជាពិសេសនៅក្នុងខួបអនុស្សាវរីយ៍នៃទំនាក់ទំនងការទូត៦០ឆ្នាំ រវាងប្រទេសកម្ពុជានិងឥណ្ឌូណេស៊ី»។
សម្ដេច ហ៊ុន សែន ឆ្លើងតបថា ប្រទេសទាំងពីរ មានទំនាក់ទំនងល្អជាយូរឆ្នាំមកហើយ។ ប្រមុខរដ្ឋាភិបាលកម្ពុជា រម្លឹកដូច្នេះថា៖«កន្លងមក ឥណ្ឌូណេស៊ី បានដើរតួនាទីយ៉ាងសំខាន់ក្នុងការចូលរួមស្វែងរកសន្តិភាពឲ្យកម្ពុជា ដែលពេលនោះឥណ្ឌូណេស៊ី បានធ្វើជាម្ចាស់ផ្ទះដឹកនាំកិច្ចប្រជុំលើកទី១និងទី២ និងបានធ្វើជាសហប្រធាន នៃសន្និសីទក្រុងប៉ារីសផងដែរ»៕
Tag:
ហ៊ុន សែន
ឥណ្ឌូណេស៊ី
© រក្សាសិទ្ធិដោយ thmeythmey.com