អន្តរជាតិ
វៀតណាម ចាប់ផ្តើមសមាហរណកម្មក្នុងកិច្ចព្រមព្រៀងពាណិជ្ជកម្មពិភពលោក CPTPP
× កិច្ចព្រមព្រៀងគ្រប់ជ្រុងជ្រោយ និងជឿនលឿនសម្រាប់ភាពជាដៃគូរអន្តរប៉ាស៊ីហ្វិក (CPTPP) ដែលជាកិច្ចព្រមព្រៀងពាណិជ្ជកម្មសេរីដ៏ធំមួយរបស់ពិភពលោក បានចូលជាធរមាននៅក្នុងបណ្តាប្រទេសសមាជិកមួយចំនួនហើយកាលពីចុងឆ្នាំ២០១៨ កន្លងទៅ។ នៅដើមឆ្នាំ២០១៩នេះ កិច្ចព្រមព្រៀងនេះ ក៏ត្រូវអនុវត្តផងដែរនៅក្នុងប្រទេសសេដ្ឋកិច្ចកំពុងលូតលាស់នៅក្នុងតំបន់ គឺវៀតណាម។
ចាប់ពីថ្ងៃ១៤ មករា តទៅ វៀតណាម បានក្លាយជាសមាជិកពេញសិទ្ធិមួយដែលអាចអនុវត្តកិច្ចព្រមព្រៀងពាណិជ្ជកម្មធំបំផុតមួយរបស់ពិភពលោក CPTPP បានហើយ។ នេះ ក៏មានន័យដែរថា ដល់ពេលហើយដែលសមាជិកអាស៊ាន ដែលមានសេដ្ឋកិច្ចលូតលាស់គួរកត់សម្គាល់មួយនេះ ត្រូវទទួលបន្ទុក ក៏ដូចជាមានឱកាសថ្មីក្នុងដំណាក់កាលនៃការធ្វើសមាហរណកម្មសេដ្ឋកិច្ច និងពាណិជ្ជកម្មឲ្យកាន់តែទូលំទូលាយ។
តាមការចុះផ្សាយរបស់សារព័ត៌មាន Vietnam News ក្រសួងផែនការ និងវិនិយោគវៀតណាម បានឲ្យដឹងថា កិច្ចព្រមព្រៀងពាណិជ្ជកម្ម CPTPP នឹងបង្កើតឱកាសថ្មីកាន់តែច្រើនសម្រាប់ការធ្វើពាណិជ្ជកម្ម និង ក្លាយជាកត្តាជម្រុញថ្មីសម្រាប់វៀតណាមក្នុងការធ្វើកំណែទម្រង់អង្គភាពសេដ្ឋកិច្ច និងបរិយាកាសធុរកិច្ចផងដែរ។
តាមក្រសួងដដែល តាមរយៈកិច្ចព្រមព្រៀងនេះ វៀតណាម រំពឹងថាបង្កើនផលិតផលក្នុងស្រុកសរុប បាន ១,៧ ពាន់លានដុល្លារ និងការនាំចេញ ៤ ពាន់លានដុល្លារ ត្រឹមឆ្នាំ២០៣៥។ ដើម្បីទទួលយកឱកាសនេះ រដ្ឋាភិបាលវៀតណាម ក៏ត្រៀមសហការជាមួយនឹងអ្នកជំនាញដើម្បីណែនាំដល់វិស័យសេដ្ឋកិច្ចជាតិជាមួយនឹងការស្រាវជ្រាវស៊ីជម្រៅឲ្យយល់ច្បាស់ពីលំហូរនៃកិច្ចព្រមព្រៀងពាណិជ្ជកម្មនេះផងដែរ។
គួរជម្រាបផងដែរថា CPTPP មានសមាជិកសរុបទាំងអស់ ១១ ប្រទេស។ កិច្ចព្រមព្រៀងនេះ បានចូលជាធរមានក្នុងជំហានដំបូងនៅថ្ងៃ៣០ ធ្នូ ឆ្នាំ២០១៨ ក្នុងប្រទេសសមាជិកដូចជា អូស្ត្រាលី កាណាដា ជប៉ុន ម៉ិកស៊ិក ណូវែលហ្សេឡង់ និងសិង្ហបុរី។ វៀតណាម គឺជាសមាជិកទី៧ហើយ ដែលចាប់ផ្តើមអនុវត្តកិច្ចព្រមព្រៀងនេះ ខណៈ ព្រុយណេ ម៉ាឡេស៊ី ស៊ីលី និងប៉េរូ កំពុងស្ថិតនៅក្នុងនីតិវិធីស្នើផ្តល់បត្យាប័នរបស់ប្រទេស។
សមាជិកទាំង១១ នៃកិច្ចព្រមព្រៀង CPTPP រួមគ្នាតែមួយ ស្មើនឹងទីផ្សារសរុប ៥០០លាននាក់ ដែលមានផលិតផលក្នុងស្រុកសរុប ១៣,៥ ទ្រីលានដុល្លារ និងស្មើនឹង ១៣ ភាគរយ នៃផលិតផលក្នុងស្រុកសរុបជាសកល។
ក្រោមកិច្ចព្រមព្រៀងនេះ សមាជិកទាំងអស់ត្រូវមានក្របខណ្ឌច្បាប់តឹងរ៉ឹងក្នុងវិស័យពាណិជ្ជកម្ម បន្ធូរបន្ថយរបាំងពន្ធគយ និងបើកចំហទីផ្សាររបស់ខ្លួន។ កិច្ចព្រមព្រៀងនេះក៏នឹងអនុវត្តស្តង់ដាការងារថ្មី ហើយចាប់បង្ខំឲ្យរដ្ឋាភិបាលប្រទេសសមាជិកខ្លះត្រូវបង្កើតការប្រកួតប្រជែងក្នុងវិស័យដែលកំពុងកាន់កាប់ដោយអ្នកវិនិយោគនៃប្រទេសទាំងនោះផងដែរ៕
Tag:
វៀតណាម
អាស៊ាន
CPTPP
© រក្សាសិទ្ធិដោយ thmeythmey.com